Okuma 29
29
Osakuleliwa onamakutha
(Levitiku 8.1-33)
1<<Wiirena ndala waasakulelaga ale enaagilabege anamakutha aaga: Omuthukule nakoro a ng'ombe eng'onong'ono ni anakoro abiili a mabila oohukanna yoohaleela. 2Osasanye ni tirigu apama mikaathe dhoohuheliwa emela, mabolu oohuheliwa emela ootaganyihedhiwa ni makura, ni mabulaxa oohuheliwa emela ooheliwa makura. 3Ohele mmuddangani, ogidheelena teto ogidheelena ng'ombe ni mabila meenddi.
4<<Vevale ogidheelena Aroni ni anaaye vamavolowelo va musasa woogumanamo, waahabihe ni mahinje. 5Othukule dhoowara, omuwarihe Aroni mukanjo, maleya oolapa a efodi, ni efodi, yoowara ya omurimani; ommagelele efodi ni muddiddi wooborodaari. 6Omuwarihe leeso na mmuruni, ohelevo madhu ale oosakuleliwa Nabwiya.#29.6 Moone Okuma 28.36. 7Othukule makura, ommiminele vamuru vaaye, ndala onakala oosakuleliwa mabasa. 8Ogidheelena teto ahima a Aroni, waawarihe mikanjo dhoolapa. 9Waamagelele aliwa middiddi, waawarihe teto maleeso a mmuruni. Ndala waasakulele mabasa Aroni ni anaaye wi egilabege wona anamakutha malabo maatene.
10<<Ogidheelena ng'ombe eng'onong'ono odhowena vamavolowelo va musasa woogumanamo. Aroni ni anaaye ehele madada eewa vamuru va ng'ombe. 11Osije ng'ombe ele vameentoni va Nabwiya, vamavolowelo va musasa. 12Onyethihe ni embuno yaawo mwazi wa ng'ombe ele, osigihe manyaga a niburo na mukutho dhoopaha; mwazi mmohi othathilele vati vamburoni na mukutho. 13Othukule makura maatene enahuruwedha murubo, makura enamuhuruwedha nahaba, vamohi ni xo biili, ni makura enahuruwedhela, opahe dhaatedhene nda vamburoni na mukutho. 14Mbwenye nyamaya ni nikupaniwa vamohi ni opwetha, nda wapahe okwibi wa misasa dhaatedhene; bu mukutho wa dhoothega.
15<<Omuthukule nakoro a nibila nimohi, Aroni ni anaaye ehele madada eewa vamuru va nibila. 16Osije nibila ndde othukule mwaziya, omidhele vamburoni na mukutho ni mukwibi mwiwa. 17Opadhanye nibila ndde piddula, waahuwe maruboya ni mweddo dhiwa, ohele vamohi ni muru. 18Weera ndo opahe nibila naatenene vamburoni na mukutho. Ola mukutho woopahiwa woonukwela pama wa Nabwiya, mukutho wa vamunddoni woovahiwa Nabwiya.
19<<Othukule nibila nimohiniwa, Aroni ni anaaye ehele madada eewa vamuru va nibila ndde. 20Osije nibila, othukule mwaziya oddonddihedhe otompini wa nibaru na omoononi wooja na Aroni teto oddonddihedhe mabaru a anaaye, oddonddihedhe teto dhimbuno dheewa dhuulubale dha moono wooja dha mmadani ni dha mmanyaloni. Mwazi mmohiwa woohala omidhele vamburoni na mukutho ni mukwibi mwiwa. 21Veva othukule mwazi wa vamburoni na mukutho, ni makura oosakuleliwana mabasa, ommidhele Aroni ni dhoowara dhaaye, ni anaaye ni dhoowara dhiwa. Aatene ala ni dhoowara dhiwa-dhene ekale oosakuleliwa miyo.
22<<Othukule makura a nibila, makura a mwiila, makura enahuruwedha marubo, makura a vanahabani, xo biili ni makuraya, ni thabala ya omoononi wooja. (Vowi ndda nibila noosakuleliwana.) 23Othukule mukaathe mmohi, bolu noosasanyiwa ni makura ni bulaxa dhili mmuddangani wa mikaathe dhoohuheliwa emela ole oli vameentoni va Nabwiya. 24Dhego dhaatedhene nda ohele mmadani mwa Aroni ni wa anaaye, etedeedhele wa Nabwiya, eli yoovaha yootedeedhela yeewa. 25Egamalile wiirana elena, othukulemo mmadani mweewa, opahe vamburoni na mukutho, okale yoovaha yoopaha yoonukwela pama wa Nabwiya. Ela yoovaha, yoosasanyeliwa Nabwiya vamunddoni.
26<<Othukule ciddale ya nibila nenddo noosakuleliwana Aroni, otedeedhele wa Nabwiya; ela eneere ekale epaddi yeenyu. 27Ciddale ni thabala nde dhootedeedheliwa Nabwiya dhikalege dha Aroni ni anaaye. 28Ndda nnaakale nlamulo: dhipaddi nda dhinaadheegena aEzarayeli dhikalege dhaaye ni anaaye malabo maatene. Dhinaakale dhoosokela dhoolamuleliwa wiirana wa dhooveleela dha wa Nabwiya, dhipaddi nda dhookamihedha dheewa wa anamakutha.
29<<Musogolo, dhoowara dhooweelihiwa dha Aroni dhihalege ni mwaanaye mmohi, amimineliwa ni osakuleliwa mabasa#29.29 Osakuleliwa mabasa Athu amohi eneera othikitheliwa. awarege dhedho. 30Muthu oyene onaakale muliba mukutho mumburoni na Aroni, aadhaaga wambeela olaba mmusasani woogumanamo Mburo Woweela, awarege dhoowara nda malabo matanu nameenddi.#29.30 Nda dhinatapulela wi osakuleliwa musogoleli a anamakutha woologela malabo matanu ni meenddi.
31<<Othukulege nibila noosakuleliwana, opiye nyamaya vamburoni noweela. 32Aroni ni anaaye etakunege nyama ya nibila ni mikaathe dhedho dhili mmuddangani waaddamela vamulago va musasa woogumanamo. 33Aliwa eje dhego dhedho dhiveleeliwe wi dhikurumuweliwe dhoothega dheewa, dhego dhiveleeliwe ni osakuleliwa mabasa eewa. Muthu bure kaje vowi soweela. 34Yahala nyama yoovaha voosakuleliwa naari mikaathe ofiyedha omenseloni wiwa, opahe ni munddo eyene ehalile. Ehijiwe vowi soweela. 35Omwiirele dhedho guulamuleliimi Aroni ni anaaye. Waasakulele mabasa eewa ofiyedha malabo maatene matanu nameenddi.
36<<Nlabo ni nlabo omveleelege nakoro a ng'ombe emohi wi dhikurumuweliwe dhoothega dha athu. Mweelihe niburo na mukutho ni dhooveleela wi dhikurumuweliwe dhoothega. Omiminele makura niburo ndde wi nisakuleleye, nikale noweela. 37Wiirena ela malabo matanu nameenddi weelihaga niburo na mukutho ni dhooveleela nda wi nisakuleleye nikale noweela. Ndala nnoodha nikale noweelesesa teto yego enaakahinyege vevale enaakalege yoweela>>.
Dhoovaha dha malabo maatene
(Numero 28.1-8)
38<<Vano nlabo ni nlabo vamburoni na mukutho oovahegevo mabila meenddi a yaaka emohi. 39Nibila nimohi osasanyege bebehi, nimohi osasanyege omadhowelo nduwa. 40Ni nibila nowambeela, ovahege kilu biili dha saambale napama, nootaganyihedhiwa ni niituru nimohi na makura azeeti. Okuthulelevo teto niituru nimohi na vinyu. 41Ociguwoni, wiirena emodha-modhave ni nibila nimohi, vamohi ni saambale, makura ni vinyu. Ekale yoovaha yoonukwela pama ya vamunddoni va Nabwiya.
42<<Ela yiireyege malabo maatene wa nyoovo ni aniinyu a musogolo, mukuthege mukutho ola vamavolowelo wa musasa woogumanamo, vameentoni va Nabwiya. Vevale gineerigiimi gigumanegevo ni nyo wi giwogege ni weevo. 43Vevale gineerigiimi gigumanegevo ni aEzarayeli. Nthithimiho naaga nnoodha nsakulele mburo ole. 44Ginoodha geelihe teto musasa woogumanamo vamohi ni niburo na mukutho. Ginoodha gimweelihe Aroni ni anaaye wi egihiddelege mabasa oonamakutha. 45Ginoodha gimage mwa aEzarayeli, ginoodha gikale Mulugu eewa. 46Enoodha enone wi miyo gili Nabwiya Mulugu eewa, gaavenyihile mwiilaboni ya wEgubuddu wi gimage mwa aliwa. Miyo gili Nabwiya, Mulugu eewa>>.
Currently Selected:
Okuma 29: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
