Okuma 25
25
Dhoovaha dha vamburoni woweela
(Okuma 35.4-9)
1 Nabwiya ahimwaaddelaga Mozezi, wiira: 2<<Waarume aEzarayeli edhena dhoovaha dheewa. Aatene ayene enarumeedha ni murima weewa edhena dhoovaha dheewa. 3Mvahidha muneeriinyu mwaakelege si dhi: oro, parata, ni mukuwa; 4osalu wamataakuru,#25.4 Nthoje mu ewogelo ya Ezugu nneeriwa liinyu. waroxa, ni woofiila; osalu wa nthoje nookwima, ni mooya a mbuzi; 5makupa a mabila ookathiwa wi ekale oofiila, makupa a aneenyama amwinko, ni mithanko dhoosema dha akaasiya, 6makura a mpantini ni dhoonukwela pama dhootaganyihedhana makura oosakuleliwana mabasa, dhoonukwela pama dha libani; 7ni mabwe oofuneya eneethaniwa onikisi ni mabwe a misawo-misawo teto oosemiwa oowomihana yoowara ya anamakutha: efodi#25.7 Efodi yaali maleya owaakapatha wona avintalo. Moone Okuma 28.6-14. yoowara ya omurimani. 8Mugisasanyedhe musasa woweelihiwa wi gikalege vaari veenyu. 9Musasanye ndala wona ginowoonihiimi makaleloya, a musasa waaga oyo vamohi ni dhookalamo dhiwa>>.
Kaxa ya nipangano no waandana
(Okuma 37.1-9)
10<<Musasanye kaxa ya mithanko dha akaasiya, olapa wiwa ekale meeturu nimohi ni meya (1,5m), orambalala wiwa ekale vaari ni vaari wa mpimo wowambeela (75cm), otaama wiwa teto okale wooliganiha (75cm). 11Muhuruwedhe kaxa eyo ni oro apama, ode ni muwari ekale yootopiwa. 12Munyunguluse teto mangooza mannayi a oro wi muhele mmonddoni mwa kaxa; mangooza meenddi epaddi ya kaxa, meenddi teto epaddi emohi. 13Musasanye teto dhimiri dha mithanko dha akaasiya vano muhuruwedhe ni oro. 14Mvolosihedhe muwari mwa mangooza a kaxa wi ni dhimiri ndo, ovenyihegena. 15Dhimiri dhedho dhikalege mmangoozani mwemo, dhihivenyihiwegemo. 16Muhelemo mabwe ayo ootopiwa a nipangano no waandana mukaxani mwemo, ayene gineeriimi guwiikeni.
17<<Musasanye teto yookuneelanaavoya, ni oro apama, ekalena meeturu nimohi ni meya (1,5m) olapa wiwa ni orambalala wiwa okale vaari ni vaari va mpimo. (75cm). 18Musasanye ni oro oohaniwa dhoopaddusiwa dha odhulu dha mompelo#25.18 Dhoopaddusiwa dha odhulu dha mompelo mu ewogelo ya eHeberi akeerubi. Dhaali musawo wa angero. Moone Wambeela 3.24. mwaahele ayo wula ni wula wa yookuneelanaavo. 19Mmohi mmuhele omagomelo wa epaddi wa yookuneelanaavo mmohiya teto omagomelo wiwa. 20Dhoopaddusiwa dha odhulu ndo mompelo eewa yaatapulele vadhulu, ekuneele vayookuneelana yaatene, dhisugwanege mmohi ni mukwaaye egaworomihedhe kove dheewa vayookuneelana. 21Muhelemo muwari mwa kaxa mabwe ootopiwa a nipangano no waandana, vano mukuneelevo. 22Gineerege ogumana ni weevo vaari vevale, va dhoopaddusiwa dha odhulu dha mompelo. Vevale gineerigiimi guwaaddelegevo dhego dhaatedhene ginoolamuleligiimi wi aEzarayeli yiiregena>>.
Meeza a mikaathe dhowooniha okalavo wa Mulugu
(Okuma 37.10-16)
23<<Musasanye teto meeza ni mithanko dha akaasiya. Ekalena olapa wiwa meeturu nimohi, orambalala wiwa meya ya meeturu, ni otaama wiwa masentimeeturu makumi matanu nameenddi ni masentimeeturu matanu (75cm). 24Muhuruwedhe yaatene ni oro apama, vano ekalena kara yootopiwa ya oro mowaapeeleliha mwiwa. 25Mowaapeeleliha musasanyedhe mukaleloya wa masentimeeturu matanu ni meenddi (7cm). Musasanye kara wa mukalelo mootopiwa. 26Musasanyedhe teto mangooza mannayi mwaahele moomelela meddo, 27waaddamela kara, vikale nikungu moovira dhimiri dhoothebana. 28Dhimiri dhoothebana meeza dhisasanyiwe ni mithanko dha akaasiya vano teto muhuruwedhe ni oro. 29Musasanyedhevo teto ni oro apama miziwo dhiwa ni biya dhiwa vamohi ni milinga ni mihadha dhoohelamo mvahi dhookuthula. 30Vameezava dhikalegevo malabo maatene mikaathe dhowooniha Okala Waaga ni nyoovo>>.
Extanti voohela panti
(Okuma 37.17-24)
31<<Musasanye teto extanti voohela panti ni oro apama oohaniwa. Okalena nthiwa, mulongothi, kopo, dhiwuduburu ni tododhiwa wona dha muthanko wa amendowa, dhaatedhene dhisasanyedhiwe yego emohive eyene. 32Okalena teto mijindda dhiwa mitanu ni mmohi: dhedho dhinaakale miraaru epaddi emohi, miraaru epaddi emohiwa. 33Mujindda ni mujindda, okalegena kopo thaaru ni mukalelo wona dhiwuduburu ni todo dha amendowa. 34Vamulongothini wa extanti voohela panti ela ekalegena kopo nnayi dha mukalelo wona dhiwuduburu ni todo dha amendowa. 35Ohelegevo dhikopo thaaru munaamelege mapura a mijindda miinddi. 36Mijindda ni dhiwuduburu dhisasanyedhiwe yego emohive eyene, extanti yaatene ohane wa yego emohive eyene ni oro apama. 37Osasanye mijindda moohela panti, tanu nabiili wi dhimoneyelege dhipaddi dhoosogolo. 38Dhoohiddihana ni dhoothimihana dhiwa, dhikale dha oro apama. 39Wi mwaakwanelihe osasanyiwa wa extanti yaatene ni dhookamihedha dhiwa, muthukule oro onyemela onakwaranya kilu makumi maraaru. 40Osugwe pama wi wiirena mukalelo ola ginowoonihiimi omwaangoni wuno>>.
Currently Selected:
Okuma 25: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
