Okuma 24

Nipangano no waandana waaye Mulugu ni aEzarayeli

1Mulugu ahiwogaga ni Mozezi, wiira: <<Gwela wi wagumane omwaangoni ni Nabwiya, weevo ni Aroni, ni Nadabi, ni Abihu vamohi ni apogo aEzarayeli makumi matanu nameenddi. Mbwenye mugeebedhe mugali woolapela. 2Mozezi yeeka dinaagwele wi awoge ni Nabwiya. Amohi ehifiyewo naari athu ehimuhare aagwelaga>>.

3Vevale Mozezi ahawaaddelaga athu madhu maatene a Nabwiya ni magano aaye maatene. Ndala mulogo waatene wahaakulaga vamohi, wiiraga: <<Dhaatedhene Nabwiya dhiwogiliiye nnowiirana>>. 4Mozezi ahilebaga madhu maatene a Nabwiya. Agavenyile bebehi, ahisasanyaga ebuwa yookuthavo mukutho, seresere ya mwaango. Ahawiimesagavo mabwe kumi nameenddi yeemelela mahimo kumi nameenddi aEzarayeli. 5Ahaarumaga azombwe aEzarayeli, opa ng'ombe, okutha mukutho wa murenddele ni Nabwiya. 6Mozezi ahithukulaga mwazi vaari ni vaari ohela mmabasiyani, wahalilege akuthulelege veebuwani ya mukutho. 7Ahithukulaga niivuru na nipangano no waandana aheelengaga mulogo, wiiwaga. Aliwa yahaakulaga, wiira: <<Dhaatedhene Nabwiya dhiwogiliiye nnowiirana vano nneerege wiiwelela>>.

8Vevale Mozezi ahithukulaga mwazi ole waamidhela athu, wiira: <<Ola mwazi wowaandana, wewo Nabwiya onasasanyiiye ni nyoovo mwa madhu ala maatene>>.

9Mozezi ahigwelaga omwaangoni ni Aroni, Nadabi, Abihu, vamohi ni apogo a Ezarayeli makumi matanu nameenddi. 10Yahimoonaga Mulugu a Ezarayeli. Vati va manyalo aaye vahikalaga yego wona voonyingalavo va mabwe a safira, owi mbee wona odhulu. 11Oliye kaawiirelege yootakala athu ale oosakuliwa aEzarayeli. Yahimoonaga Mulugu kuhukwa, yahija ong'wa.

Mozezi oMwaangoni Sinayi

12 Nabwiya ahiwogaga ni Mozezi, wiira: <<Gwela odhe wa miyo omwaangoni, okale wewuno wi guwinke mabwe oosemiwa gitopiliimivo malamulo ni magano aaga wi waasuuzihege aEzarayeli>>. 13Mozezi ni namalaba aaye Zhozuwe yahivenyaga odhowa omwaangoni wa Mulugu. 14Yahiwogaga ni apogo aEzarayeli: <<Munijejihege veva ofiyedha niwelewo. Aroni ni Huri enohala; akalavo winna mwaha waaye adhowege wa aliwa>>.

15Mozezi vagweliligiiiye, murabo wahihuruwedhaga mwaango. 16Nthithimiho na Nabwiya nahikaraatigi vaMwaangoni Sinayi. Mwaango wahihuruwedheyaga ni murabo ofiyedha malabo matanu nammohi. Nlabo na neetanu nabiili Nabwiya ahimwiithanaga Mozezi mmuraboni mule. 17AEzarayeli yahoonaga nthithimiho na Nabwiya, nafwanafwanaga ni munddo woohidda vadhulu va mwaango. 18Mozezi ahigwelaga omwaangoni, ovolowa vaari va murabo, ahikala wewo malabo makumi mannayi mutana ni mahiyu.

Currently Selected:

Okuma 24: tke

Highlight

Copy

Compare