Okuma 12
12
Paxkwa
1Mwiilaboni ya wEgubuddu Nabwiya ahiwogaga ni Mozezi vamohi ni Aroni, wiira: 2<<Wa nyoovo mweeri olena oneere okale mweeri wowambeela wa yaaka. 3Mwaaddele mulogo waatene wa Ezarayeli, mwiire: Wa malabo kumi a mweeri olena, kadda muthu vaade vaaye athukulege nibila nimohi va emudhi yaaye. 4Veemudhini yaahinjivavo athu, egawanege nibila nimohi ni owaaddamanana eewa wona viinjiveliiwa, mooligana ni majelo a kadda muthu. 5Muthukulege nibila naari mbuzi, mbwenye ekalege yowaakwanela, yapogo emalile yaaka emohi. 6Mulogolele ofiyedha yaakwanaga malabo kumi ni mannayi a mweeri olena. Vevale mulogo waatene wa Ezarayeli funeeriiwa wiibege ociguwoni. 7Muthukule mwazi mudholihe vamulago wula ni wula ni vadhuluviwa, nyuba dhedho munaatakuniwege nyama ya aneenyama ale. 8Mahiyu alene mutakune nyama yowoosiwa veeko vamohi ni mikaathe dhoohuheliwa emela teto ni mataakuru oowaawa. 9Ehikalevo muneeriinyu mutakune ekiiti, naari yoopiyiwa ni mahinje, mbwenye yowoosiwa veeko. Mutakune teto muru ni meddo ni mirubo. 10Mutakune yaatene ehihalege; yeera ehala mmenseloni mwiwa mpahege veeko. 11Mutakune mugawarile dha voolenddoni ni sapatho dheenyu, mukogodho weenyu ogali mmadani. Muje mowaaguva; di Paxkwa a Nabwiya. 12Sowi mahiyu ayene ginoodha givire mwiilaboni ya wEgubuddu, vano ginoodha gaape mwiilaboni mwemo ahima aatene owambeela obaliwa, a athu ni aneenyama. Ginoodha gaathonge ni wawooniha goyi amilugu aatene a wEgubuddu. Miyo gili Nabwiya!
13<<Mwazi oneere okale etoonyihedho ya nyuba muneeriinyu mukalemo. Goonave mwazi kaginaavire wa nyoovo vano kudha wudheelani mulili wootolosa, gineeriimi gaape athu mu Egubuddu. 14Nlabo nenddi nneere nikale noothabela vano munoodha mwiirena wona mathanga malubale a Nabwiya; anamabaliwelamo eenyu a musogolo teto enoodha yiiregena wona nlamulo noohumala. 15Malabo matanu nameenddi munoodha mujege mikaathe dhoohuheliwa emela. Nlabo nowambeela mvenyihegemo emela mba mweenyu, vowi oyene oneere aje yego ya emela, ovenya nlabo nowambeela ofiyedha nlabo na neetanu nameenddi, muthu oyene onoodha avenyihiwemo mwa Ezarayeli. 16Nlabo nowambeela ni nlabo na neetanu nameenddi okalegewo otugumana woweela wa nyoovo. Kamwihiddege mabasa, ehili osasanya dhooja. 17Ndala mwiirihedhege mathanga a mikaathe dhoohuheliwa emela, vowi thi nlabo nenddo gaavenyihiliimi makuru eenyu a anyakoddo mwiilaboni ya wEgubuddu. Mowindala, muubuwelelege nlabo nenddi nyoovo ni anamabaliwelamo eenyu a musogolo wona nlamulo noohumala. 18Mujege mikaathe dhoohuheliwa emela, wambeela ociguwoni wa nlabo na neekumi nennayi na mweeri wowambeela, ofiyedha sumaana yaatene. 19Wa malabo alena matanu nameenddi, kamuhelege mba mweenyu yego ya emela; oyene oneere aje elena, naari agali namadha naari mwanamurala, onoodha avenyihiwemo munlogoni mwa Ezarayeli. 20Kamujege yego ya emela. Munlogoni mweenyu mwaatemwene mujege mikaathe dhoohuheliwa emela>>.
21Mozezi ahawiithanaga apogo aatene aEzarayeli, wiira: <<Emudhi ni emudhi musakulege nibila wi mupele Paxkwa. 22Mmaganye matadu, mbwinihe mbasiyani muli mwazi wa nibila, mudholihege mmilagoni mweenyu, wula ni wula ni vadhuluviwa. Ahikalevo oneere akumemo mba mwaaye ofiyedha mmenseloni mwiwa. 23Vowi Nabwiya onovira wi aape aEgubuddu. Vowoona vamulago vigadholihiwe mwazi, Nabwiya onoodha avire vevale vano kadha amurumeedhiha muliba otolosa wi avolowe mmanyubani mweenyu wi ape. 24Muharihege malamulo alena mudhidhi waatene, nyoovo ni aniinyu. 25Mwafiya elabo eyene Nabwiya eneeriiye oovaheni wona mwawogeliiye, muharihege malamulo alena. 26Ahima yookohagani, yiiraga: <Mabasa baani alaya?>, 27Mwaakulege, mwiiraga: <Ola mukutho wa Paxkwa#12.27 Paxkwa mu ewogelo ya eHeberi nnatapulela ovira vadhulu. a Nabwiya, oyene avirile vadhulu va nyuba dha aEzarayeli nigali wEgubuddu. Vevale vaapiliiye aEgubuddu, oobola mirala dheehu> >>. Athu yahikokoraga omutamaala Nabwiya. 28Vevale aEzarayeli yahidhowaga wiirana wona mwemo Nabwiya mwamulamuleliiye Mozezi ni Aroni.
Mulili wookwa ahima owambeela obaliwa
29Efiyedhaga vaari ni vaari va mahiyu, Nabwiya ahaapa ahima aatene owambeela obaliwa a elabo ya wEgubuddu, wambeela wa mwaana Farawo, oyene alamula, ofiyedha wa mwaana a oyene akala mukaambura; vamohi ni aneenyama aatene owambeela obaliwa. 30Farawo ahivenya mahiyu, vamohi ni anamalaga aaye ni aEgubuddu aatene. Wahiiweya kutho yuulubale mu Egubuddu vowi kuwahalile nyuba mwahaali muthu ookwa. 31Mahiyu alene Farawo ahimwiithanihaga Mozezi ni Aroni, wiira: <<Mvenyemo mwiilaboni mu, nyoovo vamohi ni aEzarayeli. Mudhowege mwamulabege Nabwiya wona munawogeliinyu. 32Muthukule teto dhoofuwa dheenyu dhaatedhene wona muwogeliinyu. Maruwani mudhowege, mweera ndo mugireelihe miyo teto>>. 33AEgubuddu yowawiigaraga aEzarayeli efunaga wi yaaguve ovenyemo mwiilaboni mweewa, yiiraga: <<Nnokwa hiyo aatene!>> 34AEzarayeli yahithukulaga saambale nookandda na mikaathe noohuheliwa emela mukarikoni, ohuruwedha ni guwo okapatha. 35AEzarayeli yahaalobaga aEgubuddu dhego dhoosasanyiwa ni parata ni oro, vamohi ni dhoowara, wona Mozezi mwawogeliiye. 36Nabwiya ahiiriha wi athu aaye erumeedhiwe pama ni aEgubuddu, yowaavahaga dhedho dhalobigiiwa. Ndala yahawaaka dhego dhijinji aEgubuddu.
Okuma wa aEzarayeli mu Egubuddu
37Ndala yahimaruwaga aEzarayeli, nluwa no oRamesesi odhowaga murudda wa oSukoti ni meddo, wiinjiva wiwa waali macikwi mazana matanu ni zana nimohi (600.000) alobwanave yaanda owana koddo, dhiheelengiwe mirala. 38Yahitaganyihedheyaga teto ni athu amohiwa ajinjeene, ayene yamaruwiliiwana vamohi, yahaathukulaga mabila ni ng'ombe dhijinji. 39Yahoosaga mikaathe dhedho dhadhiliiwana wEgubuddu ehihelile emela, mwaha wowiigariwa kayamusasanyedhe pooso.
40Mudhidhi wamaliliiwa wEgubuddu aEzarayeli dhaali yaaka mazana mannayi ni yaaka makumi maraaru (430). 41Vaakwaniliiwa yaaka dhedhi nlabo nendde makuru maatene a anyakoddo a Nabwiya yahivenyagamo mu Egubuddu. 42Mahiyu alene Nabwiya ahawaang'anela aEzarayeli ekumaga mu Egubuddu; ala bi mahiyu a Nabwiya aEzarayeli eneeriiwa ethabelege yiing'anelaga ni anamabaliwelamo eewa.
Magano a Paxkwa
43 Nabwiya ahiwogaga teto ni Mozezi ni Aroni, wiira: <<Ala magano ooja mathanga a Paxkwa: kakalevo mmarala oneere aje mathanga a Paxkwa. 44Mbwenye mudhaari ooguliwa ni korowa, aabihege wiineliwa wi ajege mathanga a Paxkwa. 45Anaweendda naari elabaga vevo kijewene. 46Nibila nitakuniwege mu nyuba emohive, kamudhowegena mburo mmohi naari opwesa nikuvaniwa. 47Mulogo waatene wa aEzarayeli othabelege mathanga ala a Paxkwa. 48Eera akalavo namadha mwa nyoovo afunaga omwiirana Paxkwa oomuthithimiha Nabwiya, mwambeelege wawiinela alobwana aatene a veemudhini viwa, vevale fineeriiye arumeedhiwe ofiya amwiirena. Mmwiire wona mwanamurala a mwiilaboni mwemu, mbwenye ahiineliwa kamujewene. 49Malamulo ala bi mamohive wa anamurala a mwemu naari wa anamadha enakala mwa nyoovo>>.
50AEzarayeli yahiiragana ndala wona mwemo Nabwiya mwamulamuleliiye Mozezi ni Aroni. 51Nlabo nendde Nabwiya ahaavenyihamo mu Egubuddu aEzarayeli, eharihaga makuru eewa a anyakoddo.
Currently Selected:
Okuma 12: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
