Okuma 11

Ovuwihiwa wa mulili wookwa ahima owambeela obaliwa

1Vevale Nabwiya ahiwogaga ni Mozezi, wiira: <<Ohukalawo mulili woogomihedha gineeriimi gimwiirele Farawo ni a wEgubuddu. Ndo onoodha oohiyeni wi mudhowege, mbwenye oneere owiigareni mwaatene muhuwele. 2Wawaaddele athu wi alobwana aatene yaalobege amwaaddamani eewa, ahiyana aatene yaalobege amwaaddamani eewa, dhego dhoosasanyiwa ni parata ni oro>>. 3Nabwiya ahiirana wi a Ezarayeli erumeedhiwege pama ni a wEgubuddu. Mulobwana ole Mozezi aali oovuweya mwiilaboni ya wEgubuddu, oovuweya wa anamalaga a Farawo ni wa athu aatene.#11.3 Ofwanafwanihe ni Abarahamu muniivuru na Wambeela 12.3.

4Mozezi ahiwogaga, wiira: <<Ndala Nabwiya dinawoga wi: Vaari ni vaari va mahiyu ginoodha gimweeddelele Egubuddu. 5Dhowambeela obaliwa dhaatedhene dhinoodha dhikwe, wambeela wa mwaana a Farawo, oyene onalamula, ofiyedha mwaana owambeela a mwihiyana mudhaari, oyene oli vasiloni. Enoodha ekwe teto aneenyama oofuwiwa aatene owambeela obaliwa. 6Onoodha wiiweye wuundda wuulubale mwiilaboni yaatene ya wEgubuddu, wuundda wewo ohunaabihege wiireya, kudha wiireya teto dila emohi. 7Mbwenye wi munone yowi Nabwiya ohaahiyaniha aEgubuddu ni aEzarayeli, kadha awoopopiha aliwa naari aneenyama, naariwene mwanabwa kadha awoobela muriga>>. 8Vevale Mozezi ahiwogaga teto, wiira: <<Enoodha egifwanye anamalaga aawo alena aatene egikokorele, yiiraga: <Mvenyemo, we vamohi ni athu aawo aatene yuuharege>. Egeereyile ela fineeriimi givenye>>. Mozezi ootakaleliweene ahivenyavo va Farawo.

9Ndala Nabwiya ahiwogaga ni Mozezi, wiira: <<Farawo kadha owiiwani wi dhootikiniha dhaaga dheenjedhedheye mwiilaboni ya wEgubuddu>>. 10Mozezi ni Aroni yahiirana dhootikiniha dhedhi dhaatedhene vameentoni va Farawo, mbwenye Nabwiya ahummiha murima wa Farawo, kaarumeedhile wi aEzarayeli emaruwe mwiilaboni mwaaye.

Currently Selected:

Okuma 11: tke

Highlight

Copy

Compare