Okuma 10

Mulili wa pombo

1 Nabwiya ahimwaaddelaga Mozezi, wiira: <<Dhowa wa Farawo ni wa anamalaga aaye, guhummiha mirima dheewa wi gawoonihedhe dhitoonyihedho dhaaga vaari veewa. 2Gahiirana ndala teto wi wawaaddelege anaawo ni aniiwa waavevusa waaga aEgubuddu ni dhitoonyihedho dhedho giiragana vaari veewa, enone wi miyo gili Nabwiya>>.

3Mozezi ni Aroni yahidhowaga wa Farawo, wiira: <<Nabwiya, Mulugu a Heberi dinawoga, eeraga: Ofiyedha alini okooddaga wiiyeviha wa miyo? Waahiye athu aaga wi edhowe yagilabe. 4Wakooddave waahiya athu aaga wi emaruwe, menselo ginowuurumihedha mwiilaboni mwaawo pombo. 5Dhedho dhinadha dhidhaale elabo yaatene, theya ehooneyege. Enoodha eje dhoodhaliwa dhaatedhene ni mithanko dhaatedhene dhahalile mudhidhi wa muzongwe a maralala. 6Pombo dhedhi, dhinoodha dhidhaale mmanyubani mwaawo, mmanyubani mwa anamalaga aawo aatene ni mmanyubani mwa aEgubuddu aatene, yego ehinaabihege wiireya wa ababiinyu naari wa makolo eenyu, ovenya omambeelelo vamagiliiwa veva ofiyedha peeno>>. Mozezi ahirugunuwaga ovenyavo va Farawo. 7Vevale anamalaga a Farawo yahiiraga wa oliye: <<Ofiyedha alini mulobwana ola anireyelaga musapa ndala? Mwaahiye alobwana ala wi yamweebedhege Nabwiya, Mulugu eewa. Kamunoona wi Egubuddu onosadduwa nddebe?>>

8Mozezi ni Aroni yahidhowiwagana wa Farawo. Oliye ahiwogaga ni aliwa, wiira: <<Dhowani wi mwamulabe Nabwiya, Mulugu eenyu; ki enaadhowe baani?>> 9Mozezi ahimwaakulaga, wiira: <<Nnadhowawo ni azombwe eehu, ni owuuluvala eehu ni ahima eehu anaalobwana ni anaahiyana. Nnodhowana teto mabila eehu, mbuzi dheehu ni ng'ombe dheehu, vowi nnaya osasanya mathanga a Nabwiya>>.

10Farawo ahiwogaga ni aliwa, wiira: <<Goohiyani odhowa ni ahima, sowi Nabwiya oli ni nyoovo. Moone, obure oli osogolo weenyu. 11Mudhowe alobwanave wi mwamulabe Nabwiya; siiyene, mulobiliinyu>>. Ndala Mozezi ni Aroni yahiigariwaga vameentoni va Farawo.

12Vevale Nabwiya ahiwogaga ni Mozezi, wiira: <<Otoonye elabo ya wEgubuddu ni moono waawo wi dhidhe pombo mwiilaboni elena wi dhije dhoodhaliwa ni dhaatedhene dhedho muzongwe a maralala dhahiyiliiye>>. 13Mozezi ahogoolaga moono otoonya elabo ya wEgubuddu ni mukumbuzo vano Nabwiya ahidhiihaga pevo wewo onakuma nduwa wambeela obebehini ofiyedha omenseloni wiwa, eyene yadhiihile pombo. 14Nda dhaali dhijinji dhahimorela elabo ya wEgubuddu, dhahimwadheya okuneela elabo yaatene ele. Yoopadduwa ela kinaabihege wiireya wewule ovenya omambeelelo, ofiyedha peeno. 15Dhahihuruwedha elabo yaatene, vati viribaga; dhahija dhoodhaliwa dhaatedhene ni dhoovaha dha mithanko, dhende muzongwe a maralala dhahanoongiliiye. Kayaalivo yaali ekiiti, mmithankoni ni dhoodhaliwa dhaatedhene dha mmiddani mwiilaboni ya wEgubuddu.

16Mowaaguva Farawo ahimwiithanaga Mozezi ni Aroni, wiira: <<Gihimuthegela Nabwiya, Mulugu eenyu, ni nyoovo teto. 17Vano ginoloba wi mugikurumuwele yoothega yaaga olenddo olena. Mulobele wa Nabwiya, Mulugu eenyu wi agivenyihedhevo okwa wula>>.

18Mozezi avenyaga vameentoni va Farawo, ahilobelaga wa Nabwiya. 19Vevale Nabwiya ahidhiiha pevo emohi yuulubale, wewo onadhowela nduwa, eyene yavavihile pombo dhaatedhene wiithela muNyaza Yoofiila. Kawahalilege pombo emohi mwiilaboni yaatene. 20Naari ndala Nabwiya ahummiha murima wa Farawo, wahirumeedhela wi aEzarayeli emaruwe.

Mulili wa epipi

21 Nabwiya ahiwogaga ni Mozezi, wiira: <<Wogoole moono waawo otoonye odhulu. Enoodhawo wewo epipi mwiilaboni yaatene ya wEgubuddu wi athu yaababelanege>>.

22Vevale Mozezi ahogoolaga moono waaye, vano yahidhaaga epipi, oribiha elabo ele yaatene ofiyedha malabo maraaru. 23Athu kayoonanaga, vano kaalivo avenyagavo vevale vakaraatiligiiye ofiyedha malabo maraaru. Mbwenye aEzarayeli aatene yahikalagana waara mumburoni mweewa. 24Vevale Farawo ahimwiithanaga Mozezi, wiira: <<Dhowani ni mirala dheenyu mwamulabe Nabwiya, mbwenye kamuthukule mabila eenyu, mbuzi dheenyu naari ng'ombe dheenyu>>.

25Mozezi ahaakulaga, wiira: <<Munihiye wi nakuthe mukutho wa Nabwiya, Mulugu eehu. 26Nnothukula dhifuwo dheehu dhaatedhene, vowi kinahalave ya ddoddobwa naariwene. Dhaatedhene nnothukula wi nakuthe mukutho wa Nabwiya, Mulugu eehu, vowi kaninonile eneeriihu namulabegena Nabwiya wewo onayiihu>>.

27 Nabwiya ahummihave murima wa Farawo ohurumeedhela wi emaruwe. 28Farawo ahiwogaga ni Mozezi, wiira: <<Ogivenyedhevo, wiyiinanele teto kuwele woona kove yaaga. Wawelave ginowuupa>>. 29Mozezi ahaakulaga, wiira: <<Ohuwoga pama. Kagidha teto goona kove yaawo>>.

Currently Selected:

Okuma 10: tke

Highlight

Copy

Compare