Okuma 1
1
AEzarayeli egali wEgubuddu
1Baala mandina a ahima aEzarayeli, naari wi Yakobo,#1.1 Moone Wambeela 32.28. ayene yavolowile wEgubuddu ni oliye, mmohi ni mmohi ni emudhi yaaye: 2Rubeni, Simiyoni, Leevi ni Zhuda, 3Esakari, Zebuloni ni Benzhami, 4Dani ni Nafitali, Gadi ni Azeri. 5Athu aatene a emudhi ya Yakobo yaali makumi matanu nameenddi (70). Mbwenye mwaanaye Zhuuze aali wEgubuddu.
6Vano ahikwa Zhuuze ni addibile aatene vamohi ni athu aatene a mudhidhi waaye. 7Mbwenye aEzarayeli yahirelana wiinjiva okala akopolo vajinji. Mowindala yahidhaala mwiilaboni mule.#1.7 Moone Wambeela 1.28. 8Vevale ahihabawo mwene mmohiwa wEgubuddu, oyene ahaapwathile dha Zhuuze. 9Mwene ole ahawaaddela athu aaye, wiira: <<Moone, athu aEzarayeli ehitthabwa wiinjiva, ba kopolo onikwaranya hiyo. 10Nisasanye malango wi eheenjedhedheyege. Enaadhe etaganele ni amwiiddani eehu mukoddoni ewanege ni hiyo, evenyemo mwiilaboni mu>>.
11Vano aEgubuddu yahaasakula asupayi a mabasa oohiddeliwa wi yaalabihege mwa owali. AEzarayeli yahimmagela Farawo#1.11 Farawo Sowi mwene a wEgubuddu. maluwa oologolelamo dhooja: Pithomi ni Ramesesi. 12AEzarayeli yarabulihiwave yootthabwa wiinjiva yahimwadheyela mwiilaboni. AEgubuddu yowoopopiheya ni aEzarayeli. 13Ndala yowaalabiha ni owali aEzarayeli. 14Yowawooniha goyi, wawiira adhaari, yoopondda ologo, wuubaga njola ni ohidda mabasa maatene a mmiddani. Mabasa maatene yaali oorusa.
15Vevale mwene a wEgubuddu ahawiithanaga Sifara ni Puwa, anamabaliha a aHeberi, wiira: 16<<Mwaakamihedhaga ahiyana aHeberi, mwiing'anege. Akala mwaana-mulobwana mumpege, mbwenye akala mwaana-mwihiyana mmwihiyege>>. 17Mbwenye anamabaliha ale yoomoova Mulugu. Kiyeerilena wona dhalamuleliwiisu ni mwene a wEgubuddu, yowaahiya ahima ni egumi yeewa. 18Mwene a wEgubuddu ahawiithanaga, aliwa, wiira: <<Mwaha bwaddi munaahiyeliinyu ahima muhaapaga?>> 19Yahimwaakulaga Farawo, wiira: <<Sowi ahiyana aHeberi ba kopolo, kinafwanafwana ni ahiyana aEgubuddu. Hiyo nadhaaga nnaafwanya egaabalile aniiwa>>. 20Mulugu ahawiirela yapama anamabaliha. Vevale mulogo wa Ezarayeli wahinjiva okala teto wakopolo. 21Vowi ahiyana ale yoomoova Mulugu, oliye ahaavaha emudhi yeewa.
22Vevale Farawo ahaalamulaga teto athu aaye aatene, eeraga: <<Voobaliwa ahima anaalobwana a aHeberi, mwaavokedhege aatene mmahinjeni a muNilu. Mbwenye ahima anaahiyana aatene kamwaapege>>.
Currently Selected:
Okuma 1: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
