Meerelo a Arumiwi 28

Ofiya veeligani ya oMalata

1Vano nigavulumuwe fooniligiihu wi eliga ele yeeriwa Malata. 2Athu a wewule yahinaakela, oniirela dhapama vajinji, mwaha wa muzongwe arubwaga ni oddiddila yahitubaanyaga munddo. 3Pawulo ahidhowaga oddodda kuni, ahihelaga vamunddoni. Mwaha wooviha, mukunini mule mwahikumaga evili, omuluma, omuwadeelela vandadani. 4Athu a wewule egoonile nyowa ele egamuwadeelele vandadani vaaye, yoowogaga mmohi ni mukwaaye, yiiraga: <<Ebaribareene, muthu ola nipanga, naari agavuluwile munyaza, mbwenye Wogoowa#28.4 Wogoowa naali ndina na mmohi mwa amilugu eewa. kanamwihiye wi akale mugumi>>. 5Mbwenye Pawulo ahitatelaga vamunddoni nyowa ele, kayamporosilege. 6Athu ale yajejihedhaga wi mwiili waaye weere odhiba, naari eere otongwa mowaaguva akwe. Voovira mudhidhi woolapeleene emwiing'anaga, egoonile wi kilivo yego enamwiireyela, yahicenja moobuwelo eewa, wiira: <<Ola mulugu>>.

7Murudda olene wahikala midda dha Pubiliyo, oyene aali mpogo a eliga ele, ahinaakelaga, onivaha mburo, nahikalavo malabo maraaru. 8Baabi a Pubiliyo oobulela vakamani mwaha wa nipaddawe ni ovaluwa. Pawulo ahivolowaga wi amoone, ahimulobelelaga, omuhela madada, omuyiliha. 9Dhigapadduwe nda, aredda ajinji a veeligani vale yoodhaaga wa Pawulo, oliye waayilihaga. 10Vano yoonivahaga nriiho vajinji teto nimaruwaga, yahinivahaga dhaatedhene dhanihaleelaga.

Ofiya wa Pawulo oRoma

11Dhigavirile mweeri miraaru, nahimaruwaga ni mwanddeya wa oAlixandiriya wavireliwe vevale mudhidhi wooddiddila, wanna etoonyihedho osogolo yowi Anapata Milugu.#28.11 Anapata Milugu yaali yoohadhihela ya alobwana abiili yatopiwe osogolo wa mwanddeya. Eyene mu eGerego yeethaniwa Diyosikuru. 12Nigafiyile nluwa na oSirakusa nahikala wewo malabo maraaru. 13Nigavenyile wewo nahifiyaga oRezhiyo. Nlabo nooharela yahambeelaga pevo yoofuneya, nahimaruwaga, nlabo nooharela ofiya oPutiholi. 14Wewule nahaafwanya aKirixtu amohi, yanilobile wi nikale ni aliwa malabo matanu nameenddi, mowindo nahifiya oRoma. 15Addibila a wewule egeewile, yahidha, ogumana ni hiyo omusika wa Apiyo, amohi oNyuba Thaaru dha Aleddo, onijejihaga. Pawulo agawoonile ahivahedha mahala wa Mulugu, oliba murima. 16Nigavolowile nluwa na oRoma Pawulo ahirumeedhihiwa okala vaayevene ni munyakoddo oomwiing'anela.

Mabasa oolaleya a Pawulo oRoma

17Vigavirile malabo maraaru Pawulo ahawiithanihaga asogoleli a aZhudewu aatene a wewo, egatugumane ahawaaddelaga, wiira: <<Addibilaga, miyo gihithegele nlogo naaga, naari dhilemeelelo dha makolo eehu, gihimagiwa oZheruzalemi, opelekiwa mmadani mwa aRoma, 18aliwa vagikohiliiwa, yoofuna ogitapula mwaha wi kayagifwanyilena muladdu wofwaneelela opiwa. 19Mbwenye mwaha wookoodda aZhudewu, miyo gahiwaddihedhiwa odha wuno wi githongiwe ni Sezari, kaginna yoosumela nlogo naaga, naari. 20Mwahaya buuyene guulobeliimini wi guwooneni, guuwogenaani, gihimagiwa ni fingwi ela mwaha wa yoojejihedha ya aEzarayeli>>.

21Vano aliwa yahaakulaga, wiira: <<Hiyo kanaakelile kaarata yookumela oZhudeya enawoga dha we teto kadhiile muKirixtu mmohi wi awoge obure wa we. 22Mowindo dheere oniriyela waheere onaaddela dhinoobuweliiwe, mwaha wi nihinona wi vili vaatevene nikuru nooholosa nddo nnokooddiwa>>.

23Vevo aliwa yahiiwanana nlabo nowi egumanele, yahidhaaga athu ajinji vaade va Pawulo. Vano wambeela bebehi ofiyedha ciguwo, aatapulelaga, eerelaga onamoona dha Omwene wa Mulugu. Ahixixaga wakwekwethela Yesu wi di Misiya, alabihaga Malamulo a Mozezi ni anamavuhulela. 24Yahikalagavo amohi yakwekwetheye ni nde dhawogiliiye, mbwenye amohi kayarumeedhe. 25Yahambeelaga okangana vakaleligiiwa, Pawulo agoonile wi amohi kayafunaga wiiwa efunaga obalaleya, ahiwogaga, wiira: <<Muneba Woweela wahiwoga pama wa makolo eenyu, odheela wa namavuhulela Ezaya, veeriliiwa:

26<Odhowe wa nlogo nddo wawaaddele wi:

Nyo muneerege ovuruwana,

mbwenye kamudha mwiiwelelagamo.

Nyo muneerege osugwa,

mbwenye kamudha mudidelaga.

27Vowi mirima dha athu ala dhili dhovaadda,

mabaru eewa kineewa, ehaafuga meento eewa

wi ehoone ni meento eewa.

Yaheere ehiira ndo,

meento eewa yeerege woona,

obaruni weewa weerege wiiwa,

yeerege ononelamo moobuwelo eewa,

aliwa yeere owelela wa miyo,

miyo geere waayiliha!> >>#28.27 Ezaya 6.9-10.

28Pawulo aheenjedhedhagave, wiira: <<Vano munone wi ovulumusa wula wa Mulugu wahirumihiwa wa athu oode. Aliwa enoodha yiiwe>>. 29[Agawogile madhu alena aZhudewu yahimaruwa, vaari veewa kavaali wiiwanana.]#28.29 Madhu ala kinafwanyeya mmaniivuruni awale.

30Pawulo ahilogela wewule yaaka biili akalaga vaade vooboliha vawaakeliiye aatene yamusayela. 31Owaalaleyela dha Omwene wa Mulugu, owaasuuziha dha Nabwiya Yesu Kirixtu mooliba murima, ahilivo amwihiiha.

Currently Selected:

Meerelo a Arumiwi 28: tke

Highlight

Copy