Meerelo a Arumiwi 27

Wambeela wa olenddo wa oRoma

1Dhigeewananeliwe wi nidhowe wItaliya ni mwanddeya, Pawulo ni anyakaambura amohi yahipelekiwa mmadani mwa sinturiyawu,#27.1 Asinturiyawu yaali asogoleli a anyakoddo zana (100) a aRoma. ndina naaye eeriwa Zhuliyu, a nikuru na anyakoddo neeriwa Aguxtu. 2Nahigwelaga mmwanddeyani wa oAdaramatinu, wafunaga ovira seresere ya oAziya, nahimaruwaga, oveleeliwa ni Arixtariku, mMasedoniya a murudda wa oTesalonika.

3Nlabo nooharela nahifiyaga oSidoni, vevale Zhuliyu ahimuwomela murima Pawulo, ahimurumeedhihaga wi awoone akwaaye wi emvahe dhamuhaleela. 4Nigamaruwe wewule, nahiwereweraga seresere ya moono wooja wa eliga ya Xiperi, nithawaga pevo yadheelaga wafunigiihu odhowa. 5Nigakwaranye seresere ya oSilisiya ni oPamfiliya, nahiimelaga nluwa na oMira, murudda wa oLisiya. 6Wewule sinturiyawu ole ahifwanyaga mwanddeya wa oAlixandiriya wadhowaga wItaliya, nuwindo oliye ahinigwelihaga. 7Malabo majinji needdaga vang'ono-vang'ono, nafiyile moorusa waaddamela oKiniddo. Pevo kayanihiyile odhowave, mowindo nagelege eliga ya oKereta, nahiviraga seresere wahaadheela pevo, waaddamela oSalimona. 8Naheeddaga seresere ya Kereta moorabula, nahifiyaga mburo oneeriwa Nruwo Napama, waaddamela nluwa na oLaseya.

9Mwaha woovira mudhidhi mujinjeene teto Nlabo Noothuga#27.9 Nlabo Noothuga Ndda nnatapulela nlabo nddo wakala mathanga aZhudewu neereya mweeri wa Owutuburu. Athu yahinona wi nddo navira weedda mu nyaza wakala wowoopiha mwaha wa pevo yuulubale. nahiviraga, olenddo waali wowoopiha, mwaha wa ela Pawulo ahawaaddelaga, wiira: 10<<Alobwana, miyo ginowoona wi olenddo weehu onaakale wowoopiha, mwanddeya ni dhoobodha teto dhigumi dheehudha dhinaakale mwa dhowoopiha>>. 11Mbwenye sinturiyawu ole ahikwekwethiwaga ni nameeddiha mwanddeya ni mwiinyaya wi ehiimele, okoodda dhawogile Pawulo. 12Mwaha wi nruwo ndde kanaali napama wi elogelevo mudhidhi wooddiddila, ajinji yahiiwananelaga dhookwaranyavo wi yoone akala yaafiye nruwo na oFenisi wi evireliwe wewo mudhidhi wooddiddila. Fenisi naali nruwo na oKereta nathiithihedhiwa pevo yuulubale ya mudhidhi wooddiddila.

Pevo yowoopiha munyaza

13Pevo yafunigiiwa egambeele wooba vang'ono-vang'ono, aliwa yoobuwelaga wi ehifwanya mpatha wowiirana dhoofuna dheewa, mowindo yahimaruwaga varuwoni vale, oharaga seresere ya eliga ya oKereta. 14Mbwenye vihinavire mudhidhi mwijinji, yahidhaaga mowaaguva pevo yuulubale, pevo eyo eneeriwa Yurakiloni. 15Mwanddeya ole wahithukuliwaga ni pevo, vowi kanaandile wang'anana ni pevo, nahihiyaga owana, nahirumeedhela wi mwanddeya othukuliwe ni pevo. 16Nigathiithihedhiwe ni eliga emohi yeethaniwa Kawuda, nahaakwanihaga moorusa omaga mwanddeya weehu mung'onong'ono.#27.16 Mwanddeya dhing'onong'ono dhamageleliwa ni mwanddeya dhili dhaatene dhuulubale. Dhaali dhedho dhaakamihedha athu wi evulumuwe vakala dhoorusa vaari va nyaza. 17Nuwindo, yahithukulaga mung'onong'ono ole, ohela mmwanddeyani mulubale, oranddela mulubale ni mingoyi wapeeleliha wi olibe, yoovaga wi pevo enaatukumele seresere ya oLibiya. Vano yahikitihedha aankora#27.17 Aankora waali mugogo woonyemela onalibihiwana mwanddeya weemela wi oheede. munyaza, mwanddeya weeddaga ni pevo. 18Wona noorabulihiwa vajinji ni pevo yuulubale, nlabo nooharela yahambeelaga ovokedha dhoobo mu nyaza. 19Nlabo na neethaaru aliwa ni madada eewa yahivokedhaga mu nyaza yeela dheeddihiwana mwanddeya. 20Vano nigali malabo majinji nihoonaga nduwa naari ttendderi, pevo yahididelave nahifiyedha ohiya ojejihedha wi nneere ovuluwa.

21Vigavirile malabo majinji aatene ehijaga, Pawulo ahiimelaga vaari veewa, wiira: <<Alobwana, mwaheewelele dhawogiimi nde wi nihivenyewo oKereta, dhego kadhanoongeye dhithathiya mowinda. 22Mbwenye vano ginowuwaaddelani: Mulibe mirima mwaha wi kalivo mmohi mwa nyo onaathathile egumi, mbwenye mwanddeya ononoongeya. 23Mwaha wi mahiyu a peeno alena, ohugooneyela mungero a Mulugu oli mwiinya a miyo, ginamweebedhiimi, 24wiira: <Pawulo, ohoove! Soofuneya wi wafiye vameentoni va Kingi Sezari. Mwaha woowoma murima waaye, Mulugu ohaavaha egumi aatene eli ni we>. 25Alobwana, mwa ela mulibe mirima! Miyo ginomuroromela Mulugu wi dhineere wiireya dhedho dhigaaddeliiye. 26Mbwenye enofuneya wi niburuleliwe veeligani>>.

Ovuluwa wa aatene yaali mmwanddeyani

27Vaari ni vaari va mahiyu va nlabo na neekumi ni mannayi, ntukumiwaga ni pevo munyaza ya oAdiriyatiku, anamalaba a mmwanddeyani yahuubuwelaga wi nnowaaddamela epaddi ya ode. 28Vano egapimile oddiiha wa nyaza yafwanyilege ogali meeturu makumi maraaru ni matanu ni nimohi. Nigeeddile vang'ono, yahipimaga teto ofwanya egali meeturu makumi meenddi ni meeturu matanu ni meenddi. 29Aliwa yahidhaaliwaga woova, yuubuwelaga wi mwanddeya onogumana ni mabwe a seresere. Yahaavokedhaga mahaankora mannayi mundduli mwa mwanddeya, olobela wi ode ose. 30Mowindo anamalaba ale yuubuwelaga othawa mmwanddeyani, yahikitelihaga mwanddeya mung'onong'ono munyaza, okalagahi enafuna yaavokedhe mahaankora osogolo wa mwanddeya mulubale ole, 31mbwenye Pawulo ahimwaaddelaga sinturiyawu ni anyakoddoya, wiira: <<Athu ala yahiikala mmwanddeyani mu, nyo kamunavuluwa>>. 32Mowindo anyakoddo yahipadhaga mingoyi dha mwanddeya mung'onong'ono, ohiya wi osuse.

33Ode ohunasese, Pawulo ahaalobaga aatene yaaligi mwemule wi eje yego, wiira: <<Peeno nlabo na neekumi ni mannayi mujejihedhaga ni woova, muhujaga yego. 34Ginowuulibihani wi muje yego, soofuneya wi mvuluwe. Vowi kalivo mmohi a mwa nyo onayeleele naari nthithi nimohi>>. 35Agawogile ndo ahithukulaga mukaathe, omutamaalela Mulugu vameentoni va athu aatene, oliye ogwaddanya, wambeela oja. 36Vevale aatene yahilibaga mirima, ojaga. 37Hiyo aatene mmwanddeyani naaligimo athu mazana meenddi ni athu makumi matanu ni meenddi ni athu atanu ni mmohi (276). 38Egajile yahirubalaga, omuthathilela tirigu munyaza, mwanddeya ovevuwa.

39Ogasile kayadidelege elabo yaaligiisu, mbwenye yahoona muwulo wanna museenga, yahiiwananela oxixa ovolosiha wewule. 40Yahipadhaga mingoyi dhamagiwena aankora, ohiya mwinko, otapula teto mingoyi dhahiddeliisuna lemi, yahigwelihaga vela yoosogolo wa mwanddeya wi weedde ni pevo, aliwa orugunusedha omuseegani wewule. 41Mbwenye ogafiyile vagumana mahinje oothamaga, mwanddeya ole wahisamaga. Epaddi yoosogolo oddora, kuheeddaga, epaddi ya mundduli okarakasuwa ni kopolo ya kuluzi.

42Anyakoddo yahiiwananelaga dhowaapa anyakaambura wi mwa aliwa ahikalevo onaarabe, athawe. 43Mbwenye sinturiyawu ole, afunaga dha omvulumusa Pawulo, ahaakooddihaga wiirana ndo. Vowambeela ahilamulaga wi aatene enaakwaniha oraba elupele mwinko, efiye ode. 44Nuwindo, ahaalamulaga ale yahalilege wi ethukule matabwa naari dhooparuwa dha mwanddeya wakarakasuwege. Mwa mukalelo oyene aatene yahifiyaga ode.

Currently Selected:

Meerelo a Arumiwi 27: tke

Highlight

Copy