Meerelo a Arumiwi 26

Wiyaakihedha wa Pawulo

1Agiripa ahimwaaddelaga Pawulo, wiira: <<Nnowuurumeedhiha wi owoge madhu owiyaakihedhana>>. Nuwindo, Pawulo ahivenyihaga ndada naaye, wambeela owoga dhowiyaakihedhana, wiira: 2<<Nyo mwene Agiripa, miyo ginowuubuwela wi gihireelihiwa okala vameentoni veenyu peeno wi giyaakihedhe dhaatedhene aZhudewu dhinagisumeliisuna, 3mwaha wowi miyo gihinona wi nyoovo muhunona pama meeddelo maatene a aZhudewu teto muhunona mwaha wa dhoovaanyihana dheehu. Mwa ela ginowuulobani wi mugivuruwane ni ovilela.

4<<AZhudewu aatene ehinona dha meeddelo aaga wambeela wiihimani waaga, naari elabo yaaga yoobaliwela, naari oZheruzalemi. 5Aliwa ehiginona wale. Yafuna enowiirela onamoona wi gaali mFarizi, goweeddela magano maatene a nikuru noolibihedha ndda. 6Peeno ginothongiwa mwaha woojejihedha Mulugu waaroromelihiiye makolo eehu. 7Mahimo kumi ni meenddi a nlogo neehu enojejiha waakwanelihiwa yoororomeliha emohive, emweebedhaga Mulugu mwa ntidi mutana ni mahiyu. Mwene Agiripa, bu mwaha woojejihedha wula onagisumelela aZhudewu. 8Nyo aZhudewu, mwaha bwaddi munoobuweleliinyu wi kadhinaandeya Mulugu waavenyiha athu muukwani?

9<<Vowambeela ebaribareene miyo goobuwela wi yaali yoofuneya wi giirena dhego dhijinji gihiihe ndina na Yesu muNazarethi. 10Mowindo gahiirana dhego nda oZheruzalemi. Ngaakelile owodha wa apogo a anamakutha, gowaafugela mukaambura aKirixtu ajinji, goorumeedhela yaakoniwaga ni opiwa. 11Dila dhijinji mu nyuba dha matugumano dhaatedhene gowaarabuliha, gooxixa wawiiriha wi emunyemulege Yesu. Mwaha wa owali waaga goovenya waaharaharaga aliwa naari mmaluwani oode.

12<<Mwaha wa mabasa alena gahimaruwa odhowaga oDamasiku ni othongi wa apogo a anamakutha. 13Mbwenye, Mwene, gidhowaga mundila, yaakwanaga wora neekumi nabiili, gahoona waara woodheela odhulu, waara wule waali wookwaranya nduwa, wahigaapeelela ni alobwana yadhowaga ni miyo. 14Aatene nahitongwelaga vati, vano gahiiwaga ndhu nigaaddelaga ni mu ewogelo ya eHeberi, niiraga: <Sawuli, Sawuli, onagiharaharela ddi? Ndo oneeporosa weeka wona ng'ombe enaddwadha mukumbuzo wa makambuzi aaye>.

15<<Nuwindo, miyo gahikohaga, wiira: <Muli aani, nabwiya?> Vano ahigaakula, wiira: <Miyo gili Yesu, oyene onamuharahariiwe. 16Ovenye wiimele, miyo guhuwooneyela wi guusakule okale mwiimeleli aaga ni namoona wa dhedho dhooniliiwe naari dhedho dhinadhiimi guwoonihe. 17Gineere wuuvulumusa wa athu aawo ni wa athu oode, wa ayene ginoorumiimi 18wi waafugule meento eewa wi erugunuwe oyiihini, ekale mowaara, erugunuwe mu othongi wa Sathana, yiipeleke mu othongi wa Mulugu wi yaakele oleveleliwa wa dhoothega dheewa, yaakele mburo vamohi ni athu aatene eli oweelihiwa odheela mwa nroromelo na miyo>.

19<<Mwene Agiripa, miyo kagavaanyile dhego Mulugu dhagoonihiliiye. 20Mbwenye gahilaleyela, vowambeela a oDamasiku, a oZheruzalemi, a mirudda dhaatedhene dha oZhudeya ni athu oode wi etthwaruwe, erugunuwele wa Mulugu, yiiregena mabasa enooniha wi ehitthwaruwa. 21Mwaha wa dhedhi aZhudewu amohi yahigihidda ngali mu nyuba ya Mulugu oxixa wi egipe. 22Mbwenye mwaha wa okamihedhiwa ni Mulugu, gihikalawo ofiyedha peeno, siyeene giimeleliimi giirelaga onamoona wa ang'onong'ono ni alubale, gihiwogaga dhego dhimohi, dhihili dhedho dhawogile anamavuhulela ni Mozezi wi dheere opadduwa: 23Soofuneya wi Kirixtu arabulihiwe, akale muraaji ovenyihiwa muukwani wi alaleyele waara wa nlogo naaye ni athu oode>>.

24Vevo Pawulo awogagave madhu owiyaakihedhana ndale, Fexto ahigwelihaga madhu, wiira: <<Ohukalana aneba, Pawulo! Osuuzesesa waawo ohuutatamula aneba!>>

25Vano Pawulo ahimwaakulaga, wiira: <<Fexto ooriiheya, kaginna aneba! Moohiyaniha, ginawoga madhu a ebaribari atthottho. 26Dhaatedhene dhedhi soononeya wa mwene Agiripa ginoowoganaani moohoova, gihinona wi kavili yego yahinoniliiye, kilivo yiireyile mburo wooviteya. 27Mwene Agiripa, munorumeedhela dha anamavuhulela? Gihinona wi munorumeedhela>>.

28Vano mwene Agiripa ahimwiirelaga Pawulo: <<Onoobuwela wi mwa mudhidhi wooyeva ola onogikwekwetha wi gikale muKirixtu?>>

29Pawulo ahimwaakulaga, wiira: <<Ginomuloba Mulugu wi mwa mudhidhi wooyeva, naari mudhidhi woolapela, ahili nyeeneve mbwenye athu aatene enagiiwa peeno ekale wona miyo, nihiyane fingwi dhi>>.

30Mwene Agiripa ni kuminadori Fexto teto Berinise ni aatene yakaraatilege ni aliwa yahivenyagavo, 31ekumaga yoowogaga kadda muthu ni mukwaaye, yiiraga: <<Muthu ole kaneera yootakala yoofwaneelela opiwa naari omuhela mukaambura>>.

32Vano mwene Agiripa ahiwogaga ni Fexto, wiira: <<Mulobwana ola neere omutapula aheere ahiloba wi athongiwe ni Sezari>>.

Currently Selected:

Meerelo a Arumiwi 26: tke

Highlight

Copy