Meerelo a Arumiwi 25

Osumeliwa wa Pawulo vameentoni va Fexto

1Egavirile malabo maraaru Fexto ahifiya murudda ole, ahivenya nluwa na oSezareya, ogwelela#25.1 Sezareya oli seresere ya Nyaza Mediteraneyo; Zheruzalemi oli omwaangoni, bu mwahaya eneereliisu onadhowa oZheruzalemi onoogwelela. oZheruzalemi. 2Wewo apogo a anamakutha ni apogo a aZhudewu yahidhaaga wa oliye osuma miladdu dha Pawulo. 3Yahimulobaga wi aawomele murima aarumihedhe Pawulo oZheruzalemi, vowi yahimureyela musapa wi empe mundila. 4Fexto ahawaaddelaga, wiira: <<Pawulo onowaang'aneliwa oSezareya, miyo ginaya wewo voohulogela. 5Asogoleli eenyu edhowe vamohi ni miyo, akala oliye ohiirana yoothega, yamusumele wewo>>.

6Ahikala ni aliwa oZheruzalemi malabo matanu ni maraaru naari kumi, vano yahikitelaga oSezareya. Obebehini wiwa ahikaraatigi vampanddoni va othongi, olamula wi adhiiwena Pawulo. 7Agadhiiwena, aZhudewu yakitile oZheruzalemi yahimurijaga, wambeela omusumela ni dhego dhowoopiha dhijinji, dhedho aliwa dhahandigiiwa wooniha wi seebaribari.

8Nuwindo, Pawulo ahiyaakihedhaga ni madhu ala, wiira: <<Miyo kagithegele Malamulo a aZhudewu, naari nyuba ya Mulugu, naari kagimuthegele Sezari>>.

9Mbwenye Fexto voofuna waahagalasa aZhudewu, ahimukohaga Pawulo, wiira: <<Oneere odhiveliwa ogwela oZheruzalemi wi muladdu waawo wathongiwe wewo vameentoni vaaga?>>

10Pawulo, ahiiraga: <<Miyo gili vameentoni va othongi va Kingi Sezari, fiveva vifwaneeleliimi othongiwa. Miyo kagaathegele aZhudewu mwa yego eli yaatene wona nyo munoneliinyu pamadhene. 11Akala gihikanna yoothega teto akala gihiira yego yoofwaneelela opiwa, kaginakoodda opiwa, naari. Mbwenye akala ndo dhinagisumeliisuna kahuwo dha ebaribari, kalivo muthu onaakwanihe ogipeleka wa aliwa. Miyo ginafuna gathongiwe ni Sezari>>.

12Vevale Fexto agathapanyile ni nikuru na asamasowa aaye, ahimwaakulaga Pawulo, wiira: <<Vowi onafuna wathongiwe ni Sezari, wa Sezari onoodhowa>>.

Osumeliwa wa Pawulo vameentoni va Agiripa

13Egavirile malabo vang'ono mwene Agiripa ni murogoriye Berinise, yahifiyaga oSezareya wi yamulojele Fexto. 14Agalogelewo malabo majinji Fexto ahimwaaddelaga mwene ole mwaha wa Pawulo. Fexto ahimulobaga Agiripa wi amukamihedhe mmoobuweleloni mwaaye, wiira: <<Mulobwana mmohi ohuhiyiwa mukaambura ni Felixi. 15Ngadhowile oZheruzalemi, apogo a anamakutha ni apogo a mutugumano dha aZhudewu yahimusumela, elobaga wi Pawulo akoniwe ni opiwa.

16<<Miyo gahawaakulaga, giiraga: <ARoma kilemeelele omukona muthu ahinagumane vamohi ni aliba omusumelaya wi akalena mpatha wowiyaakihedha enamusumeliisuna>. 17Nuwindo, aliwa egadhiile wuno, nlabo nooharela, voohulogela, ngakaraatile vampanddoni va othongi, gahilamulaga wi adhiiwena Pawulo. 18Vano aliba omusumelaya egavenyile, kayaamusumelena dhego dhowoopiha nde dhajejihiimi wiiwa. 19Mbwenye yawogile ya dhilemeelelo dha aZhudewu teto dha muthu oneeriwa Yesu okwile, Pawulo amuwogiiye wi ohukalawo. 20Vowi miyo kaganonile masayeleloya mwaha ola, gahimukohaga akala oofuna odhowa oZheruzalemi wi muladdu waaye wathongiwe wewo. 21Mbwenye Pawulo ahilobaga wi afugeliwe mukaambura wi athongiwe ni Kingi Sezari. Vevo gahilamulaga wi aang'aneliwege ofiyedha gaande omurumiha wa Sezari>>.

22Nuwindo, Agiripa ahimwaaddela Fexto, wiira: <<Miyo teto ginofuna omwiiwa mulobwana oyo>>. Fexto ahimwaakulaga, wiira: <<Menselo onoomwiiwa>>.

23Nlabo nooharela ahidha Agiripa ni Berinise ni wiigayiha, yahivolowaga muthego mulubale vamohi ni asogoleli a anyakoddo ni alobwana oovuwa a muluwani. Fexto ahilamulaga wi adhiiwena Pawulo. 24Vevale Fexto ahiiraga: <<Mwene Agiripa ni nyo mwaatene muli veva ni hiyo, munomoona mulobwana ola. AZhudewu aatene a oZheruzalemi ni a wewuno yahiniloba mookuwa wi ola kafwaneelele okalawo. 25Mbwenye miyo goonile wi keerilena yego yoofwaneelela opiwa. Mwiinya afunaga wi athongiwe ni mwene a oRoma, gahuubuwelela wi gimurumihe. 26Mbwenye wa oliye kaginna yego yoofwaneelela omulebela nabwiya aaga. Mowindala gihimudhana wa nyo, tthabwa-tthabwa wa nyo mwene Agiripa wi namukohesesa, gikalena yoofwaneelela oleba. 27Miyo ginowoona wi kahuwo yapama omurumiha munyakaambura ohuwogiwe muladduya osumeleliwiiye>>.

Currently Selected:

Meerelo a Arumiwi 25: tke

Highlight

Copy