Meerelo a Arumiwi 24

Osumeliwa wa Pawulo vameentoni va Felixi

1Egavirile malabo matanu Ananiya, musogoleli a anamakutha, ahiveleeliwa ni apogo a aZhudewu, vamohi ni oononelamo nlamulo, eeriwa Teritulo, ala yahikitaga, ofiya vameentoni va Kuminadori, vevale omusumela Pawulo. 2Nuwindo, egamwiithanile, Teritulo ahambeelaga omusumela, eeraga: <<Ooriiheya Felixi, voovira malabo majinji hiyo nnakala mmurenddeleni onadheela mmathongelo mweenyu. Mwiilaboni mu nnowoona ocenjeya oneereya odheela mmoobuweleloni mweenyu. 3Mwa dhipaddi dhaatedhene ninowuutthettheelani mwaha wa dhapama dhedhi dhinaniireliinyu. 4Kamwiirena, kaginafuna wuwiiyelani mudhidhi, mbwenye ginowuulobani munivuruwane vang'ono moovilela mweenyu.

5<<Mwaha bowi muthu ola mulili, onodhiiha wiinyuwelana mwa aZhudewu aatene a elabo yaatene. Oliye musogoleli a nikuru nooholosa na aNazarethi. 6Ola teto ahixixa onoonga weela wa nyuba ya Mulugu, mwaha wa eyo nihimmaga [ni efunelo yowi nimuthonge wona mwa nlamulo neehu. 7Mbwenye agadhiile musogoleli a anyakoddo Lisiyasi ohunaaka mmadadani mweehu ni kopolo dhijinji, 8olamula wi aliba omusumela edhe vameentoni veenyu.]#24.8 Madhu ala kinafwanyeya mmaniivuruni awale. Mwamukoha munonona weekiinyu dhaatedhene dhinamusumeliihuna>>.

9AZhudewu teto yahitugumanya madhu eewa oomugunddana, yaakwanelihaga dhaatedhene wi seebaribari.

10Kuminadori ahimvahaga Pawulo etoonyihedho wi awoge. Vevale oliye ahiiraga: <<Gihinona wi muhukala yaaka dhijinji muthongaga nlogo ndda, mwa ela ginowiyaakihedha ni ororomela. 11Munowaanda waakwaneliha wi kavivirile malabo kumi ni meenddi gigweliliimi oZheruzalemi wi gamweebedhe Mulugu. 12Aliba ogisumela kigifwanyile gikanganaga ni athu naari gaaholosaga athu mu nyuba ya Mulugu, naari mu nyuba dha matugumano, naari muluwani. 13Ala kinaanda wooniha ebaribari wa nda dhinagisumeliisuna. 14Vano miyo mwa yego emohi ginorumeedhela vameentoni veenyu wi ginomweebedha Mulugu a makolo eehu mooligana Dila eyene aliwa eneeriisu sa nikuru nooholosa. Ginororomela dhaatedhene dha Malamulo teto ni dhilebiwe dha anamavuhulela. 15Gihikalana ojejihedha mwa Mulugu wona teto ojejihedha winna aliwa wi onoodha okalewo ovenyihiwa muukwani wa ale owogoowa mirima teto ni ootakala mirima. 16Mwaha wa dhedho ginowiilibihedha mudhidhi dhaatedhene weedda ni murima woweela vameentoni va Mulugu ni athu.

17<<Ngamalile yaaka dhijinji ode wa Zheruzalemi gihidha wi gidhena mvahi wa athu oorabula a nlogo naaga ni okutha mikutho. 18Giiragana dhedhi, aZhudewu yahigifwanya mu nyuba ya Mulugu ngali oweelihiweene, kawaatugumane athu, naari nthapa. 19Mbwenye ehikalawo aZhudewu amohiwa a oAziya, aliwa bafwaneelele okala va wi egisumele vameentoni veenyu akala ehikanna mwaha ni miyo. 20Naari alena eli va ewoge mwaha wootakala ogifwanyiliisuna, vaaliimi va Nikuru neewa na apogo a aZhudewu. 21Mbwenye gihiira yego emohi, gahikuwa vameentoni veewa, giira: <Peeno ginothongiwa mwaha wowi ginojejihedha ovenyihiwa muukwani> >>.

22Felixi anonelemo pama dha Dila ele, ahihiyedhedha muladdu ole, wiira: <<Afiya musogoleli a anyakoddo, Lisiyasi, gineere othonga muladdu waawo>>. 23Vevale ahimulamulaga sinturiyawu#24.23 Asinturiyawu yaali asogoleli a anyakoddo zana (100) a aRoma. wi amwiing'anelege Pawulo, mbwenye amvahege otapuwa omohi, aahiyege akwaaye edheege omukamihedha.

24Egavirile malabo vang'ono, ahidha Felixi ni mwihiyanaaye, Dirusila, aali muZhudewu. Ahimwiithanihaga Pawulo, ovuruwana dhawogigiiye dha omuroromela Yesu Kirixtu. 25Pawulo awogagave dha egumi yowogoowa teto oowogaga dhowihiiha weeka oli okoodda dhootakala ni dhowi Mulugu onoodha aathonge athu, Felixi ahoova, omwaaddela, wiira: <<Dhiinova baahi! Odhowe, gafwanya mudhidhi ginowuwiithana>>. 26Oojejihesa wi Pawulo eere omvaha korowa oomwiithanesa wiinddi-wiinddi, ethapanyaga.

27Dhigavirile yaaka biili, Porosiyo Fexto ahihaba omwene wa Felixi. Vano oliye afunaga waahagalaliha aZhudewu, ahimwihiya Pawulo mukaambura.

Currently Selected:

Meerelo a Arumiwi 24: tke

Highlight

Copy