Meerelo a Arumiwi 23

1Pawulo ahisugwaga Nikuru nuulubale na apogo a aZhudewu, wiira: <<Addibilaga, ofiyedha peeno ginoweeddave ni murima woweela vameentoni va Mulugu>>. 2Vevale musogoleli a anamakutha Ananiya ahaarumaga yamwaaddamelege Pawulo wi emuddwadhe owanoni. 3Vano Pawulo ahiwogaga ni oliye, wiira: <<Mulugu onowuuddwadha, we nsiri noweelihiwa! We kukaraatile wi ogithonge moohara Malamulo? Mbwenye we kunahariha Malamuloya, onalamula wi giddwadhiwe>>.

4Ale yaaligi vakukuuve va oliye yahiiraga: <<Onamuruwana musogoleli a anamakutha a Mulugu?>>

5Pawulo ahaakulaga, wiira: <<Addibilaga, kaganonile wi oliye musogoleli a anamakutha; vowi dhihilebiwa: <Ohumuruwane ole oli musogoleli a nlogo naawo>#23.5 Okuma 22.28. >>.

6Vano Pawulo vooniligiiye wi amohi mwa aliwa ba nikuru na aSaduseyi, amohi ba nikuru na aFarizi, ahikuwaga, wiira: <<Addibilaga, miyo teto gili mFarizi, mwaana mFarizi! Ginothongiwa mwaha wi ginojejihedha ovenyihiwa muukwani!>> 7Agawogile madhu alena aSaduseyi ni aFarizi wambeela okangana, ogawanyeya. 8Vowi aSaduseyi kinaroromela wi ohukalawo ovenyihiwa muukwani teto kaliwo mungero naari muneba, mbwenye aFarizi enororomela dhaatedhene dhedhi. 9Ndala vahikalaga nthapa nuulubale. Vano yahivenyaga anamasuuziha amohi a Malamulo a nikuru na aFarizi wambeela opambihana, wiira: <<Kanifwanyile yoovirigana naari yowi emohi mwa muthu ola. Akala muneba naari mungero diwogile ni oliye?>> 10Ovaanyihana wahitthabwaga musogoleli a anyakoddo ofiyedha woova wi eneere omvarula Pawulo. Ahaalamulaga anyakoddo wi ekite, emwaakihedhe mwa aliwa, emudhowena omburoni wa anyakoddo.

11Mahiyu ooharela Nabwiya ahimooneyela Pawulo, omwiirela: <<Murima waawo olibe. Wona ogiireliiwe onamoona wuno oZheruzalemi, soofuneya wi teto ogiirele onamoona oRoma>>.

Opanganela dha ompa Pawulo

12Ogasile, Azhudewu yahipanganela dhabure, olibelela vamohi, yiiraga: <<Kannaja, naari ong'wa ofiyedha nimpe Pawulo>>. 13Yaali okwaranya athu makumi mannayi yavolowile mmawujeni. 14Aliwa yahidhowaga wa apogo a anamakutha ni apogo a nlogo, wiira: <<Hiyo nihiiwanana olibela mmirimani mweehu wi kannaja yego naari ong'wa ofiyedha nimpe Pawulo. 15Vano nyo vamohi ni Nikuru naatenene mmulobe musogoleli a anyakoddo wi amudhena Pawulo wa nyo, mukalegehi munafuna muwelele osuuzela muladdu waaye ofiyedha othongiwa. Vano hiyo nnakala owiisasanyedheene nimpe ahinafiye wa nyo>>.

16Mbwenye mwaana-mulobwana a murogoriye Pawulo ageewile dha mawuje ale, ahidhaaga, ovolowa mburo wa anyakoddo, omwaaddela Pawulo dhaatedhene. 17Vevale Pawulo ahimwiithanaga sinturiyawu#23.17 Asinturiyawu yaali asogoleli a anyakoddo zana (100) a aRoma. mmohi, wiira: <<Mumveleele muzombwe ola wa musogoleli a anyakoddo. Ohukanna madhu enafuniiye omwaaddela>>.

18Sinturiyawu ahimuthukulaga muzombwe ole, omudhowana wa musogoleli a anyakoddo, wiira: <<Munyakaambura Pawulo ohugiithana, ogiloba wi gimudhena muzombwe ola vameentoni veenyu. Pawulo wiire ola ohukanna madhu wi owaaddeleni>>.

19Musogoleli a anyakoddo ahimwihiddeelaga ndada muzombwe ole, omudhowana nikukuru, omukoha, wiira: <<Onafuna ogaaddele ddi?>>

20Oliye ahimwaakulaga, wiira: <<AZhudewu ehipanganela wi yuulobeni mmudhowena menselo Pawulo wa Nikuru neewa na apogo, mukalegehi munafuna musuuzele muladdu waaye. 21Kwaahiye wi yuukwekwethe wiirana ndo, vowi eli okwaranya athu makumi mannayi ayene yiisasanyedhe omwiipitelela Pawulo. Ehiiwanana olibela wi kinaaje yego naari ong'wa ehimpile Pawulo. Dhiinova ehiisasanyedhela, ejejihedhelaga yoorumeedha yeenyu wa yoolobiiwa>>.

22Vevale musogoleli a anyakoddo ahimpaganyaga muzombwe ole, omusumulula, wiira: <<Ohumwaaddele muthu mmohi wi ohugaaddela dhego dhedhi>>.

23Nuwindo, ahawiithanaga asinturiyawu abiili, waalamula, wiira: <<Ehinafiye wora tanu ni nnayi ya mahiyu alena mwaasasanyedhe anyakoddo mazana meenddi edhowe oSezareya teto anyakoddo makumi matanu ni meenddi owaagwela akavalo teto mazana meenddi aliba mwaalago. 24Mmusasanyedhe kavalo Pawulo amugwele wi afiye pama wa Kuminadori Felixi>>.

25Vano musogoleli a anyakoddo ole ahilebaga kaarata, wiira:

26<<Ooriiheya Kuminadori Felixi, ginowuulojelani. Di miyo, Kalawudiyu Lisiyasi ginaleba. 27Mulobwana oyo aZhudewu bamwihiddile, yeera wi empe gigafiyile ni anyakoddo aaga gihimwaakihedha, mwaha gihiiwa wi oliye muRoma. 28Gifunaga onona mwahaya wamusumeleliisu, gahimudhowana muddibani mwa Nikuru neewa na apogo a aZhudewu. 29Gahoona wi emusumelele mwaha wa dhego dha Malamulo eewa, mbwenye kavili muladdu wofwaneelela okwa, naari mukaambura. 30Gigeewile wi vahikala owogiwa mawuje odheela wa muthu oyo, mowaaguva gihimurumiha wa nyoovo. Gihawaaddela aliba omusumela ayo wi edhe ewoge muladduya vameentoni veenyu>>.

31Vevale anyakoddo ale yahimuthukulaga Pawulo wona mwalamuleliwiiwa, omudhowana ni mahiyu ofiyedha oAntipatiride. 32Nlabo nooharela nikuru nimohi na anyakoddo yahiwelelaga omburoni weewa, waahiya aliba waagwela akavalo emveleelaga Pawulo. 33Aliba akavalo egafiyile oSezareya, egapelekile kaarata wa Kuminadori teto yahimpelekaga Pawulo. 34Kuminadori ageelengile kaarata ele, ahimukohaga Pawulo, wiira: <<Oli a murudda baani?>> Vano aganonile wi muSilisiya, 35ahimwaaddelaga, wiira: <<Ginowiiwa muladdu waawo yadha teto aliba wuusumela>>. Nuwindo, ahilamulaga wi aang'aneliwege munyuba yoolibihiwa yamagiwe ni Heroddi.

Currently Selected:

Meerelo a Arumiwi 23: tke

Highlight

Copy