Meerelo a Arumiwi 22

Wiyaakihedha wa Pawulo

1<<Addibilaga ni abaabi, vuruwanani madhu owiyaakihedha waaga vameentoni veenyu>>. 2Vevo egamwiiwile wi onaawogana eHeberi yahimaalaga pee. Vano Pawulo ahiiraga: 3<<Miyo gili muZhudewu, gibaliwe nluwa na oTarusu a oSilisiya, mbwenye gunnuwele va nluwa nendda. Gisuuzihiwe mwemu ni Gamaliyeli, ohugisuuziha mootibesesa Malamulo a makolo eehu, gididelaga dha Mulugu wona nyo malabo a peeno. 4Miyo gowaaharahara athu a Dila ela ofiyedha amohi opiwa. Gaamagihaga alobwana ni ahiyana, gaafugelaga mukaambura. 5Musogoleli a anamakutha ni asogoleli aatene a aZhudewu anamoona a dhedho. Aliwa yahigiinkelela makaarata wi gidhowena wa addibilihu aZhudewu a oDamasiku, gahivenya odhowaga wewo wi gaamage aKirixtu a wewule gaadhena oZheruzalemi wi yoonihiwe goyi.

6<<Vano ngali voolenddoni gaaddamelaga ofiya oDamasiku, wora vakukuuve ya kumi ni biili ya mutana, mowaaguva waara wookwaranya woodheela odhulu wahigimoneya mogaapeelela. 7Nuwindo, gahitongwelaga vati, gahiiwaga ndhu, niiraga: <Sawuli, Sawuli, onagiharaharela ddi?>

8<<Gahikohaga, wiira: <Muli aani, Nabwiya?>

<<Vano oliye wiira: <Miyo gili Yesu, muNazarethi, onamuharahariiwe>. 9Akwaaga yaaligi ni miyo voolenddoni yahoona waara, yahiiwaga ndhu ndde mbwenye kayeewelelegemo.

10<<Vevale gahikohaga, wiira: <Gineere ddi, Nabwiya?>

<<Oliye ahiiraga: <Ovenye, odhowe oDamasiku, wewo eneere wuwaaddela dhaatedhene dhedho dhithomeliwiiwe wiirana>. 11Vowi kagoonaga ni mwaha wowaara wule wa nthithimiho, akwaaga yaaligi ni miyo bagihiddeelege moono ogikogodhihaga ogifiyiha oDamasiku.

12<<Wewo wahikala muthu mmohi eeriwa Ananiya, owiiveleela mMalamuloni, ootthettheeliwa ni aZhudewu aatene yamagile wewule, 13ahidhaaga, wiimela vowaaddamela ni miyo, wiira: <Ddibilaaga Sawuli, owelele woonege>. Mudhidhi olene ngathukule meento, gahimoonaga oliye.

14<<Nuwindo, oliye ahiiraga: <Mulugu a makolo eehu ohuusakula wi onone ofuna waaye, omoone Owogoowa,#22.14 Owogoowa onaagiwana Yesu Kirixtu. teto wiiwe madhu a muwano mwaaye, 15mwaha wi onaakale namoona aaye vameentoni va athu aatene wa dhego dhooniliiwe ni dhiiwiliiwe. 16Ki dhiinova onajejiha ddi? Ovenye, obathiziwe, ohuwihe dhoothega dhaawo, wiithanaga mwa ndina naaye>.

17<<Ngawelele oZheruzalemi, gilobelaga mu nyuba ya Mulugu, gahoonaga yootikiniha, 18gahimoonaga Nabwiya, oliye ogiirela: <Ovenyemo mu Zheruzalemi mowaaguva, mwaha wi athu kinaakele onamoona waawo onawoga dha miyo>.

19<<Gahaakula, giira: <Nabwiya, aliweneene ehinona wi mu nyuba mwaatemwene dha matugumano gowaafugela mukaambura, gowaawaxula ale yoororomelani. 20Vevale apiwaga namoona eenyu Extevawu, miyo gahikalagavo gowaakulelaga teto miyo dalogolelege dhoowara dha anamapaya>.

21<<Mbwenye Nabwiya ahigaaddelaga, wiira: <Odhowe, ginowuuruma woolapelawene wa athu oode> >>.

Omagiwa wa Pawulo

22Nlogo nahimwiiwa Pawulo ofiyedha owoga madhu ayene. Nuwindo, nahikuwaga, niiraga: <<Muthu ola avenyihiwevo veelaboni va, kafwaneelele wi akalena egumi!>>

23Ekuwagave, yooburulaga maleya eewa, etatelaga nthubi odhulu, 24Musogoleli a anyakoddo ahilamulaga wi Pawulo adhowiwena muwari mwa mburo wa anyakoddo. Wawiirela wi emuwaxulege, emukohaga wi musogoleli ole anone mwahaya wamukuweleliisu. 25Emurunddumulaga ni mingoyi wi emuwaxulege, Pawulo ahimukohaga sinturiyawu aaligi vevale, wiira: <<Dhinorumeedheya omuwaxula mwanamurala a omwene wa oRoma, ahinathongiwe?>>

26Sinturiyawu veewiligiiye dhedhi, ahidhowaga wa musogoleli a anyakoddo, omwaaddela, wiira: <<Onafuna wiire ddi? Vowi muthu ola mwanamurala a omwene wa oRoma>>.

27Musogoleli ole ahidhaaga, omukoha Pawulo: <<Ogaaddele, we oli muRoma?>>

Oliye waakula, wiira: <<Ee, gili>>.

28Vevale musogoleli ole ahiwogaga, wiira: <<Miyo oRoma waaga boogula ni korowa dhijinji>>.

Pawulo ahimwaakulaga, wiira: <<Mbwenye oRoma waaga boobaliwana>>.

29Mowaaguva ale yaaligi vevale wi emukohege Pawulo yahivenyagavo. Musogoleli a anyakoddo ahoova voonona wi ammagile mwanamurala a omwene wa oRoma.

Otongiwa wa Pawulo ni apogo a aZhudewu

30Nlabo nooharela musogoleli a anyakoddo ole oofunaga onona mwaha wa ebaribari aZhudewu wamusumeleliiwa Pawulo. Ahilamulaga wi etugumane apogo a anamakutha, Nikuru nuulubale na apogo a aZhudewu, oliye ahimutapulihaga Pawulo, ahirumiha omudhana, omwiimeliha vaari veewa.

Currently Selected:

Meerelo a Arumiwi 22: tke

Highlight

Copy