Meerelo a Arumiwi 21

Olenddo wa Pawulo wa oZheruzalemi

1Nigamwalane nahimaruwaga ni mwanddeya, weedda mowogoola ofiya oKosi, nlabo nooharela nahifiyaga oRoddi, okuma vevo nahifiyaga oPatara. 2Nahifwanyaga mwanddeya wadhowaga oFinisiya, hiyo ogwela omaruwa. 3Naang'anaga eliga eneeriwa Xiperi nahikakelaga moono woong'oto, nahicapaga mwanddeya ofiya murudda wa oSiriya, wiimeliha mwanddeya oTiru, wewule anya a sapo pwafunigiiwa okitiha. 4Nigaafwanyile amudhi mwa Kirixtu awewule nahikalaga ni aliwa malabo matanu nameenddi. Aliwa, mwa Muneba Woweela, yahimulobaga Pawulo wi ahixixe odhowa oZheruzalemi. 5Nigaakwanihile waweeddela nahimaruwaga olenddo weehu. Alobwana aatene ni ahiyaniiwa ni aniiwa yahiniveleelaga ofiyedha ode wa nluwa. Nahikokoraga seresere ya nyaza, olobela. 6Vevale nahipaganyanaga, hiyo ogwela mwanddeya, aliwa owelelaga mmavade mweewa. 7Nigamalile olenddo weehu wa oTiru, nahifiyaga oPetolomayida. Wewo nahaalojela amudhi amohi mwa Kirixtu, okala ni aliwa nlabo nimohi. 8Nlabo nooharela nahimaruwaga odhowa oSezareya, ofiya vaade va Filipi, namalaleya a Muselu Wapama, mmohi mwa atanu ni abiili,#21.8 Mmohi mwa atanu ni abiili enaagiwana ale yasakuliwe oZheruzalemi wi yawiimelelege amaamukwele vowaagawela dhooja. Moone Meerelo a Arumiwi 6.1-7. okala vevale. 9Ola ahikalana ahima anamwali annayi yaali anamavuhulela, kayateliwe.

10Nigali wewule malabo majinjeene, ahidhaaga namavuhulela akumelaga oZhudeya, eethaniwa Agabu. 11Vadhiiligiiye, ahithukulaga sintu na Pawulo, Agabu omagana madada ni manyalo aaye, wiira: <<Nda sinawoga Muneba Woweela: <Mwiinya a sintu ndda, aZhudewu a oZheruzalemi enoommaga ndala vano empeleke mmadani mwa athu oode> >>. 12Nigeewile madhu alena hiyo ni athu a niburo ndde, nahimulobaga Pawulo wi ahigwelele oZheruzalemi. 13Nuwindo, ahaakulaga, wiira: <<Munanddela ddi, mugivoreyihaga murima? Vowi ginorumeedha ohuli ofugeliwave baahi, mbwenye ofiyedha okwa mwaha wa ndina na Nabwiya Yesu oZheruzalemi>>. 14Vooniliihu wi kannanda omukwekwetha, nahimaalaga, hiyo wiira: <<Ofuna wa Nabwiya wiireye!>>

15Egavirile malabo alene, nahisasanyedhaga olenddo weehu, omaruwa, ogwelela oZheruzalemi. 16Anamasuuza amohi a oSezareya yahiniveleelaga teto, onifiyiha oZheruzalemi, vaade va Menasawu, mukadda Xiperi. Ola aali mmohi mwa aKirixtu owambeela, nahayile vevo.

Weelihiwa wa Pawulo

17Nigafiyile oZheruzalemi, addibila ni arogora yahinaakelelaga ni ohagalala. 18Nlabo nooharela Pawulo ahivenyaga vamohi ni hiyo wi agumane ni Tiyago ni apogo aatene a gerezha yatugumanege wewule. 19Egalojelane, Pawulo ahawaaddelihagamo mooharana-harana dhaatedhene dhedho Mulugu dhiiriliiye vaari va athu oode odheela mwa meerelo a orumiwi waaye. 20Vevale egeewile dhedhi yahimuthithimihaga Mulugu. Vano yahimwaaddelaga Pawulo, wiira: <<We ddibilihu, onowoona pamadhene wi vihikala aZhudewu macikwi ni macikwi emuroromele Kirixtu, aliwa aatene enoharihamo moodidela Malamulo. 21Athu ehawaaddela dha nyo wi munowasuuziha aZhudewu aatene eli dhilabo dha ode wi ehiiwelelege Malamulo a Mozezi, wiiraga kayawiinelege aniiwa, naari ohariha meeddelo a aZhudewu. 22Ki veva nneere avi? Ebaribareene aliwa enowiiwa wi muhufiya. 23Vano wiirena enowaaddeliihu: Ehikalavo veva athu annayi elibele wa Mulugu. 24Mudhowe ni aliwa, mweyeelihe vamohi, olive mutheengo wa weelihiwa weewa wi yaande ojema miru dheewa. Ndo aatene enoonona wi kahuwo ebaribari dhinawogiwa dha we, eneerege woona wi onowiiwelela Malamulo. 25Mbwenye nihaalebela kaarata wa athu emuroromele Yesu ehili aZhudewu wi ehijege nyama ya aneenyama ookutheliwa a milugu eebeweene, ehijege mwazi, naari mwaneenyama oohogiwa wi ehikale ajeberuwe, anamararuwa>>. 26Nuwindo, omenseloni wiwa Pawulo ahikala vamohi ni alobwana ale aatene, wiyeeliha, oliye ovolowa mu nyuba ya Mulugu wi awaaddelihemo anamakutha omala wa malabo owiyeeliha weewa, waakuthiwe alini mukutho wa kadda muthu.

Omagiwa wa Pawulo

27Ehalaga vang'ono omala malabo matanu nameenddi owiyeeliha, aZhudewu a oAziya egamoonile Pawulo mu nyuba ya Mulugu, yahituzhaga nlogo naatenene, omwihidda Pawulo. 28Yookuwaga, yiiraga: <<Nyo aEzarayeli, munikamihedhe! Mulobwana ola di oyene onaasuuziha athu dhipaddi dhaatedhene dhoonyemula nlogo neehu, dhoonyemula Malamulo, dhoonyemula mburo ola. Ohiya ndo ohaavolosiha teto aGerego mu nyuba ya Mulugu, anoongaga weela wa mburo ola>>. 29Yawogele dhedhi vowi yahimoonaga Torofimu muEfeso vamohi ni Pawulo muluwani, vano yoobuwelaga wi Pawulo ahimvolosiha nyuba ya Mulugu.

30Athu aatene a muluwani mule yahitakaleliwaga, yahithamagaga, ogumanela, omwihidda Pawulo, omburulelaga ode wa nyuba ya Mulugu, mowaaguva misiwo dhahifugiwaga. 31Vevale athu ale efunaga ompa Pawulo, musogoleli a nikuru naatenene na anyakoddo a oRoma ahaaddeliwaga wi mu Zheruzalemi mwaatemwene mwahikala mbigiddi. 32Mowaaguva oliye ahaathukula anyakoddo ni asinturiyawu,#21.32 Asinturiyawu yaali asogoleli a anyakoddo zana (100) a aRoma. waathamagela anamwinji ale. Vevale athu ale vamooniligiisu musogoleli ole ni anyakoddoya yahimwihiyaga omuddwadha Pawulo.

33Musogoleli a anyakoddo ahimwaaddamelaga Pawulo, omwihidda, olamula wi emmage ni fingwi biili, vevale ahikohaga, wiira: <<Muthu ola baani? Okalile addi?>> 34Amohi mwa anamwinji yookuwaga ni mukalelo mmohi, amohiwa yookuwaga ni mukalelo mmoheene. Mwaha wa nthapa musogoleli a anyakoddo ole kaandile onona ebaribari, mowindo ahilamulaga wi Pawulo athukuleliwe mburo wa anyakoddo. 35Yaaddamelaga sikaadda ya vamavolowelo, anyakoddo ale yeerege omuthukula ni mwaha wootukumiwa ni anamwinji, 36vowi anamwinji aatene yowaaharaga ekuwaga, yiiraga: <<Mumpe!>> 37Vevale Pawulo agahalile vang'ono wi avolosihiwe, ahiwogaga ni musogoleli a anyakoddo, wiira: <<Ginorumeedhiwa wi giwoge ni nyo?>>

Oliye ahaakulaga, wiira: <<We onowoga eGerego? 38We kuli mwEgubuddu ole atatamule wiinyuwela malabo amundduli, ole aathukulele okokolani mapanga macikwi mannayi (4.000)?>>

39Nuwindo, Pawulo ahaakulaga, wiira: <<Miyo gili muZhudewu, mwanamurala a oTarusu, nluwa noovuweya na murudda wa oSilisiya. Ginowuulobani wi mugirumeedhihe owoga ni athu ala>>.

40Ahimurumeedhihaga, vano Pawulo wiimela musikaaddani, ovenyiha ndada naaye wiirana etoonyihedho wi emaale. Vano athu yahimaalaga pee, oliye owoga ni eHeberi, wiira:

Currently Selected:

Meerelo a Arumiwi 21: tke

Highlight

Copy