Meerelo a Arumiwi 20

Olenddo wa Pawulo wa oMasedoniya ni oGeresiya

1Ovaanyihana wule ogamalile, Pawulo ahawiithanaga anamasuuza ale, waalibiha, waapaganya, omaruwa odhowaga oMasedoniya. 2Vafiyiliiye oweedda mirudda daatedhene aalibihaga aKirixtu ni madhu majinjeene, nuwindo ahifiya oGeresiya, 3walogeliiye mweeri miraaru. Pawulo agahalile vang'ono wi agwele mwanddeya woodhowa oSiriya, ahoona wi aZhudewu yahimureyela musapa, mowindo ahuubuwela owelela mundduli avirelaga oMasedoniya. 4Pawulo aveleeliwe ni: Sopatoru muBereya, mwaana a Piru, Arixtariku ni Sekundu a oTesalonika, Gayu muDeribe, Timoteyo vamohi teto Tikiku ni Torofimu a oAziya. 5Ala yahisogola, onijejihaga#20.5 Onijejihaga enatapulela wi namaleba a kaarata ela, Luka, aaligi vamohi ni Pawulo. oTorowaddi. 6Ogavirile mudhidhi wa Mathanga a Mikaathe Dhoohuheliwa Emela, nahigwelaga mwanddeya oFiliposi voovira malabo matanu nahifiya oTorowaddi. Wewule nahigumanaga ni aliwa, okala malabo matanu ni meenddi.

Ovenyihiwa wa mulobwana ookwa

7Nlabo nowambeela na sumaana nahitugumanaga wi nigwaddanye mukaathe. Pawulo oojejihaga odhowa obebehini wiwa, mowindo ahiwogaga ni athu moolapeliha ofiyedha vaari ni vaari va mahiyu. 8(Suubi a mudhulu watugumaniligiihu mwahikalaga panti dhijinji dhoomoneya.) 9Muzombwe mmohi eethaniwa Ewutiku akaraatilege vazhaneelani, dhahimudheelaga kove ogonaga. Pawulo owogagave mudhidhi mujinjeene. Muzombwe ole agonaga ahimoraga, okuma wootandaanyihedheya wa neethaaru, yamfwanyilege ookweene. 10Vevale Pawulo ahikitaga, omukonaantela, omukubaarela mulobwana ole, wiira: <<Muhukubanye! Ola ohukanna egumi>>. 11Agagwelile odhulu wa nyuba elene ahigwaddanyaga mukaathe oja, nuwindo ahiwelelaga owoga mudhidhi woolapeleene ofiyedha ode osa. Vano omaruwa. 12Nuwindo, akwaaye yahimudhowagana mulobwana ole agali mugumi, aatene yahilibihiwaga vajinji.

Olenddo wa Pawulo okuma oTorowaddi odhowa oMileto

13Nahimwihiyaga Pawulo wewule, hiyo ogwela mmwanddeyani odhowa oAsosi, wewo wamwaakeleliihu Pawulo vowi anilamule ndo, mwaha afunile weedda ode. 14Pawulo aganifwanyile oAsosi, nahimwaakelelaga mmwanddeyani, hiyo odhowa vamohi oMitileni. 15Vevale omenseloni wiwa nahigwelaga mwanddeya nahifiyaga vakukuuve ni oKiyo. Nlabo nooharela nahifiya oSamo, nuwindo nlabo nooharela nahifiyaga oMileto. 16Vowi Pawulo ahimaruwela wi akwaranye oEfeso wi onaadhe athathile mudhidhi oAziya, aaguvelaga wi nlabo na Pentekoxte nimwiireyele oZheruzalemi dhakala dhowaandeya.

17OMileto Pawulo ahirumihaga mpaganyo oEfeso wawiithaniha apogo a gerezha. 18Egafiyile ahawiirelaga: <<Muhunona meeddelo aaga mudhidhi waatene okaliliimi ni nyo, okuma nlabo nowambeela givolowiliimi oAziya wuno, 19gimwiimelelaga Nabwiya moowiiyeviha waatewene, mitori ni dhooweehiwa dhagipadduwela mwaha wa misapa dha aZhudewu. 20Vowi kagilogohile dhego dhoofuneya, wuulaleyelani ni wusuuzihani dhaatedhene voweela teto nyuba ni nyuba 21giirelaga onamoona wa aZhudewu teto wa aGerego wi etthwaruwe, emuharege Mulugu, emuroromelaga Nabwiya eehu Yesu.

22<<Dhiinova gihisogoleliwa ni Muneba ginadhowa oZheruzalemi gihinonaga dhinafuna ogiireyela wewo. 23Dhinoniliimi sowi Muneba Woweela woogiwaraaliha nluwa ni nluwa wi omagiwa ni orabula dhili osogolo waaga dhinogijejiha. 24Naari ndo miyo ginodhowawo, vowi kagineelengela egumi yaaga wona yoofuneya, eli yoofuneyesesa sowi gaakwanihela dhirumiwiimi wiirana ni ohidda mabasa egivahile Nabwiya Yesu. Ela sowi giirele onamoona Muselu Wapama wa mahala a Mulugu. 25Vano gihinona nyo mwaatene a mirudda mweeddiimi guulaleyelagani Omwene kamudha moonave kove yaaga. 26Mowindo ginowiirela onamoona peeno wi miyo kaginna muladdu ni mmohi a mwa nyo aarimeelaga, 27mwaha wi kaguulogohedheni yego, guhuulaleyelani dhaatedhene dha dila ya Mulugu. 28Mwiyiing'anele teto wiing'anela nikwedda nenddo Muneba Woweela wuuheliliiwani wi mukale anamaang'anela wi mukameelege gerezha ya Mulugu, eyene eguliliiye ni mwazi waaye-waaye. 29Miyo gihinona wi gavenyavo eneere ovolowa mugerezha amagaaddi enaakale wona miiji dhooguwa vaari va nyo, kidha ebebeedhela mabila. 30Naari mwa nyeeneve eneere oovenya amohiwa enasuuzihege dhoovirigana wi yaaburulele anamasuuza mundduli mweewa. 31Mowindo mukale owiyaang'anela, muubuwelelaga wi va yaaka thaaru, mahiyu ni mutana, kagimalile wuuwaraalihani kadda muthu ni mitori.

32<<Dhiinova ginowuupelekani mmadani mwa Mulugu, mwa mutheenga wa mahala aaye. Mutheenga oyo ohukanna owodha woowaraaliha munroromeloni ni wuuvahani mareeliho oliye yinniiyena wa aatene ayene eli oweelihiwa. 33Kagikalele nrima parata, naari oro, naari dhoowara dha muthu mmohi. 34Nyo muhunona wi madada aaga ala ehihidda mabasa wi gifwanye nde dhagihaleela ni dhaahaleela ale yaali ni miyo. 35Mwa dhego dhaatedhene nda guhuwoonihani wi voohidda mabasa moolibihedha ndala soofuneya wi mwaakamihedhege oohaleeliwa, muubuwelelaga madhu a Nabwiya Yesu oliyeene yiiriliiye: <Ovaha onodhana ohagalala vajinji, ohiya waakela> >>.

36Pawulo agawogile dhego nda, ahikokoraga ni aatene ayene, olobela. 37Vevale aatene yahiindda vajinji, omukubaarela, ombezharigi. 38Aliwa yahukuuwaga vajinji mwaha wa madhu ale yawogiligiiye owi kidha yoonave kove yaaye. Nuwindo, yahimveleelaga omwanddeyani.

Currently Selected:

Meerelo a Arumiwi 20: tke

Highlight

Copy