Meerelo a Arumiwi 19

Masuuziho a Pawulo

1Apolo agali oKorintu, Pawulo ahivira mirudda dha omwaangoni, ofiya oEfeso. Ahaafwanyaga wewule anamasuuza amohi, 2ahaakohaga, wiira: <<Vambeeliinyu ororomela muhaakela Muneba Woweela?>>

Aliwa yahimwaakulaga, wiira: <<Naari, kanneewege wi ohukalawo Muneba Woweela>>.

3Vano Pawulo ahaakohaga, wiira: <<Ki vano, obathizo baani mwaakeliliinyu?>>

Aliwa yahaakulaga, wiira: <<Obathizo wa Zhuwawu>>.

4Vevale Pawulo ahiwogaga, wiira: <<Zhuwawu aabathiza ale yatthwaruwe mwa dhoothega dheewa. Owawaaddela wi emuroromele ole aadheege, oliye amuwogaga Yesu>>. 5Aliwa egeewile ndo, yahibathiziwa mu ndina na Nabwiya Yesu. 6Vano Pawulo agaahelile madada Muneba Woweela wahaadheela; aliwa wambeela owoga dhiwogelo ni ovuwiha mutheenga wa Mulugu. 7Alobwana ala yaali vakukuuve kumi ni abiili.

8Ofiyedha mweeri miraaru Pawulo oodhowa mu nyuba ya matugumano, oowogaga moohoova, oolaleyaga aakwekwethelaga athu dha Omwene wa Mulugu. 9Mbwenye amohi mwa athu ayo yoomvaanyaga kayarumeedha, yoovevusa Dila#19.9 Dila naali ndina navahiwe masuuziho a Yesu. vaari va anamwinji, mwa ela Pawulo ahaathukula anamasuuza waadhowana suubi mulubale a masuuziho a Tiraano, owaasuuziha wewo malabo maatene. 10Owaasuuziha mwemo yaaka biili, ofiyedha athu aatene a oAziya, aZhudewu teto ni aGerego, wiiwa madhu a Nabwiya.

Otthwaruwa wa akwiri

11Mulugu ahiirana dhootikiniha dhihineereyege odheela madada a Pawulo. 12Mwa ela athu yoothukula maleeso dhoowara dha mmwiilini mwa Pawulo, yadhowana wa aredda mareddaya yoovenyamo, mineba dhootakala dhookuma. 13Vano aZhudewu amohi yaali anamugu oweeddeedda yahixixa okopola mineba dhabure eromolaga ndina na Nabwiya Yesu, yooddoddobela, yiiraga: <<Ginowuuruma okumemo odheela mu ndina na Yesu onamulaleya Pawulo!>> 14Amohi yeerana ndo yaali ahima atanu ni abiili a Seva, musogoleli a anamakutha a aZhudewu. 15Mbwenye muneba wabure wahawaakulaga, wiira: <<Miyo gihimunona Yesu teto gihimunona Pawulo, mbwenye nyo kaguunonileni; muli aani?>> 16Vevale mulobwana ole ahiddiwe ni muneba wabure ahaalupelaga waahidda. Waagonjiha, nuwindo yahithawaga mba mule egali madave, egaporeyile. 17Nda dhiganoneye ni athu, yakala oEfeso, aZhudewu ni aGerego, aatene yahidhaaleliwaga woova. Vano ndina na Nabwiya Yesu nowunnuwihiwa. 18Vevo oororomela ajinji yoodha obwekaga, yoononiha vathaddo mabasa eewa. 19Teto ajinji yeerana dha okwiri yahidhana maniivuru eewa yahiddiisuna mabasa eewa, waapaha vathaddo. Mutheengoya waaligi macikwi mazana makumi matanu (50.000) a parata.#19.19 Korowa emohi ya parata waali mutheengo waliveliwa muthu alaba nlabo nimohi. 20Mowindo ndhu na Nabwiya noomwadheyave, nookalave ni kopolo moweenjedhedheya.

21Egavirile mapadduwo ala Pawulo ahuubuwela odhowa oZheruzalemi adheelaga oMasedoniya ni oAkaya. Ahiira: <<Vano gafiya oZheruzalemi enofuneya geddeedde oRoma>>. 22Nuwindo, ahimuruma Timoteyo ni Eraaxtu, oomukamihedha aaye, oMasedoniya, mbwenye oliye ahihala murudda wa oAziya mudhidhi vang'ono.

Otatamula ohiiwanana wa Demetiriyu

23Mudhidhi wankeene wahitatamuwa ohiiwanana wuulubale wa anamwinji mwaha wa Dila. 24Ahikalawo mulobwana mmohi ndina naaye eeriwa Demetiriyu, aali namahana a parata. Oosasanya dhoohadhihela dha parata dha nyuba yoweebedha ya Aritimi.#19.24 Aritimi aali mulugu eewa a mwihiyana. Athu yaroromela wi oliye dadhiiha dhilo, aneenyama, muzongwe mwiilaboni mule. Ohana parata mukalelo olena yaali mabasa yavaha mpurelo mujinji wa ale yahidda mabasa ayo. 25Demetiriyu ola ahaatugumanya anamalaba yalaba mabasa mamohive, waawogana, wiira: <<Alobwana, muhunona wi oreela weehu onadheela mwa mabasa alena. 26Vano munowoona, munowiiwa dhineera Pawulo ola ohuli oEfesove, mbwenye teto ni elabo yaatene ya oAziya. Oliye onowaakwekwetha athu ajinji aaholosaga, eeraga: <Amilugu enasasanyiwa ni madada a athu kahuwo a ebaribari>. 27Ehikalavo yowoopiha ehinaavahege thima ya mabasa eehu teto yowoopiha emohi eliwo sowi nyuba yoweebedha ya Aritimi athu kineerege yego. Teto nneere obwanyuwa nthithimiho na Aritimi, oyene athu aatene a oAziya ni a elabo yaatene ya vati enamweebedhiiwa>>.

28Athu egeewile madhu alena yahitakaleliwaga vajinji; yahambeelaga okuwa, yiiraga: <<Aritimi a aEfeso dili mpogo!>> 29Muluwani mwaatemwene mwahidhaalaga nthapa. Aatene yoothamagelaga obwalo#19.29 Bwalo waali mburo mulubale wa dhowoonihedha. Wahikala dhittengu dhamagiwe muddibani mwa mwaango mwakaraati athu yoonelaga dhowoonihedha. na dhowoonihedha, yahimuthukulaga Gayu ni Arixtariku a oMasedoniya, yadhiilege ni Pawulo. 30Pawulo afunaga ovolowa vatugumanege nlogo, aKirixtu yahimukooddihaga. 31Teto apogo amohi a murudda ole yaali akwaaye, yahimurumihedhaga mpaganyo, emulobaga wi ahivolowe mbwalo na dhowoonihedha.

32Amohi yakuwelaga yego emohi, amohiwa yakuwelaga emoheene, athu ale kayeewananaga, ajinji kayanonaga yatugumaneligiisu. 33Amohi mwa anamwinji yoobuwelaga wi mutugumano ole waali wa muladdu wa Alixandere, mwaha wowi aZhudewu yoomukakelaga osogolo. Alixandere ahigwelihaga ndada wi aamaalihe, afunaga wiyaakihedha vameentoni va mutugumano. 34Mbwenye athu ale vamudideligiiwa wi oliye muZhudewu, aatene ni madhu mamohi yahikuwaga wora biili, yiiraga: <<Aritimi a aEfeso dili pogo!>>

35Vevale namaleba a muluwani mule, agamaalihile nlogo, ahiiraga: <<AEfeso, baani ohunonile wi nluwa na aEfeso thili namaang'anela nyuba yoweebedha ya Aritimi ni namaang'anela a nifwanafwaniho naaye nimorile odhulu? 36Mwaha wowi dhego dhi kahuwo dhovaanyiwa, mmaale, kamwiirena yego moohuubuwelela. 37Vowi mwaadhiilena va athu ala, ehili ambava a nyuba yoweebedha, naari anamanyemula a mulugu eehu. 38Vano akala Demetiriyu ni ameesili akwaaye ehikalana muladdu ni muthu di muthu, dhihikalawo mburo dha othongi, ehikalawo teto anameesesula miladdu. Mwaahiye aliweene esumelanege wewo. 39Mbwenye mwakanna yego emohi wi yeesesuliwe mudheegena vamutugumano woononeya ni athu aatene. 40Vowi ehikalavo yowoopiha, enaadhe enivahe muladdu wona anamatatamula ovaanyihana wula. Mwa mwaha ola kannaakwanihe oruna ovaanyihana wula, vowi kavili mwaha wofwaneelela wi nivaanyihanege>>. 41Agawogile nda, ahaabalalesaga aatene.

Currently Selected:

Meerelo a Arumiwi 19: tke

Highlight

Copy