Meerelo a Arumiwi 18

Ofiya wa Muselu Wapama oKorintu

1Dhigavirile dhoopadduwa nda, Pawulo ahivenyaga oAtena, odhowa oKorintu. 2Wewo ahimfwanyaga muZhudewu eeriwa Akwila ni mwihiyanaaye eeriwa Pirisila. Akwila aali a murudda wa oPonto. Ala yoofiyawene okuma wItaliya mwaha wi wewule Kingi Kalawudiyu ahilamula wi aZhudewu aatene evenyewo oRoma. Pawulo ahidhowa waweeddela, 3mwaha wowi mabasa aaye yaali mamohive, ookala ni aliwa wewule olabaga. Mabasa eewa yaali oosona misasa dha mooya a mbuzi. 4Masabuddu maatene oovaanyihanesa mu nyuba ya matugumano, aakwekwethaga aZhudewu ni aGerego. 5Vano Sila ni Timoteyo egadhiile oMasedoniya, Pawulo ahiiveleela olaleyela madhu, eerelaga onamoona wa aZhudewu wi Kirixtu ole Maleba Ootaleleya yaaroromelihiiwa di mulobwana ola Yesu. 6AZhudewu yoomvaanya Pawulo, emunyemulaga, mwaha wa ela ahitata guwo dhaaye, wiira: <<Mwazi weenyu okale vamuru veenyu, ovenya peeno odhowa osogolo ginaalaleyelege athu oode>>.

7Pawulo agavenyile vevale, ahidhowaga vaade va mulobwana eeriwa Tisiyu Zhuxtu, oomweebedha Mulugu. Vaade vaaye vaaddamele ni nyuba ya matugumano. 8Vano Kirixpu, musogoleli a nyuba ya matugumano, ahimuroromela Nabwiya ni emudhi yaaye yaatene; teto aKorintu ajinji egamwiiwile Pawulo, yahiroromela, obathiziwa.

9Omahiyuni Nabwiya ahooneyelaga wa Pawulo, wiira: <<Ohoove, olaleyegeve, ohumaale. 10Vowi miyo gili ni weevo, kalivo onowiirele yowoopiha, vowi gihikanna athu ajinji muluwani mu>>. 11Nuwindo, Pawulo ahikalave wewule yaaka ni mweeri mitanu ni mmohi, aasuuzihaga madhu a Mulugu.

Osumeliwa wa Pawulo

12Vano Galiyu agahabile vampanddoni va kuminadori a oAkaya, aZhudewu yahimwihidda Pawulo, omudhowana omuthegoni wa othonga muladdu, omusumela, 13wiira: <<Mulobwana ola onowaakwekwetha athu wi emweebedhege Mulugu ni mukalelo ohuneewanana ni nlamulo>>.

14Mbwenye Pawulo afunaga waakula, Galiyu ahimmaalihaga, wawaaddela aZhudewu, wiira: <<Mvuruwane, mwahaadhena muladdu wa ogwalagwambi, naari muladdu mmohi wowoopiha, miyo gowuuvuruwanani, githonge muladdu weenyu. 15Vano nyoovo munawanela madhu, mandina ni malamulo eenyu-eenyu; ndo dhikale ni nyo mwaanya, kaginafuna okala namathonga a dhego ndo!>> 16Nuwindo, ahawiigaraga mmuthegoni mwa othongi. 17Vevale anamwinji yahimwihiddaga Soxteni, musogoleli a nyuba ya matugumano, omuddwadhaga waaddamela vampanddoni voothonga vevale; mbwenye Galiyu kaapwathile dhowiireya nde.

Owelela wa Pawulo oAntiyokiya

18Pawulo ahikalave oKorintu malabo majinji, omamalelo wiwa, ahaapaganya aKirixtu a wewule, ogwela mmwanddeyani odhowaga oSiriya, vamohi ni Pirisila ni Akwila. Vano ahinamaruwe ahiiga mpala varuwoni va oSenkereya wi aakwanelihe yoororomeliha yeeriliiye ni Mulugu. 19Egafiyile oEfeso, Pawulo ahimwihiya Pirisila ni Akwila wewule, odhowa nyuba ya matugumano wi agumane ni aZhudewu. 20Aliwa yahimuloba Pawulo wi akale wewule mudhidhi mujinji, vano oliye kaarumeedhe; 21mbwenye ahaapaganyaga, wiira: <<Nabwiya afuna, ginoodha giwele>>. Nuwindo, ahigwelaga mmwanddeyani, ovenyawo oEfeso. 22Agalabuwele oSezareya, ahigwelelaga oZheruzalemi olojela gerezha; nuwindo ahikitela oAntiyokiya. 23Ahikala wewule mudhidhi vang'ono, ovenyawo, ovira dhilabo dha oGalasiya ni oFirizhiya, aalibihaga aKirixtu aatene.

Masuuziho a Apolo

24Mudhidhi olene ahifiya oEfeso muZhudewu mmohi eeriwa Apolo, mukadda Alixandiriya. Ola aali muthu ooyesa awogaga ni oonona Maleba. 25Oliye ahisuuzihiwa dila ya Nabwiya; teto owaaguva mmunebani owoga ni osuuziha dha Yesu ni ononelamo, mbwenye anonile obathizo wa Zhuwawu baahi. 26Vano oliye ahambeela owoga ahoovaga yego mu nyuba ya matugumano. Vevo Pirisila ni Akwila yahikala ni oliye okwibi, omutapulela mowaakwanela dila ya Mulugu.

27Apolo afunaga olabuwela oAkaya, aKirixtu yahimulibiha, yaalebelaga kaarata anamasuuza a wewule wi emwaakele ni madada meenddi. Apolo agafiyile, ahaakamihedha ale yaroromele odheela mwa mahala, 28vowi ni kopolo dhuulubale oliye owavaanya aZhudewu vathaddo, awoonihaga mMalebani wi Kirixtu aroromelihiwe di mulobwana ola Yesu.

Currently Selected:

Meerelo a Arumiwi 18: tke

Highlight

Copy