Meerelo a Arumiwi 17

Waakeliwa wa Muselu Wapama oTesalonika

1Egavirile maluwa oAmfipolisi ni oApoloniya yahifiya oTesalonika waali nyuba ya matugumano ya aZhudewu. 2Mooligana ni elemeelelo ya Pawulo, yahivolowaga mwemule masabuddu maraaru, aalaleyelaga aliwa dha Maleba Ootaleleya, 3awaaddelaga, awoonihaga wi yaali yoofuneya wi Kirixtu arabule ni ovenyihiwa muukwani. Pawulo oowoga, eeraga: <<Yesu ola ginoolaleyeliimini di Kirixtu oyene anamavuhulela yamuwogiliisu wi onoodha>>. 4AZhudewu amohi yahikwekwetheya, otaganela ni Pawulo ni Sila. AGerego ajinji yamweebedha Mulugu teto yahimuroromela Yesu, vamohi ni ahiyana apogo ajinji. 5Mbwenye aZhudewu amohi yahikalana nrima, odhowa waagula athu abure, osasanya nikuru nowiirana dhoovirigana muluwani mule, vano odhowa othamagela vaade va Zhasoni, emusayelaga Pawulo ni Sila wi yaapeleke wa anamwinji. 6Nuwindo, vahaafwanyiligiiwa, yahimburulaga Zhasoni ni aKirixtu amohi, waadhowana wa apogo a nluwa, ekuwaga, yiiraga: <<Ala ba ayene yatatamule ohiiwanana elabo yaatene, ehifiya teto wuno. 7Vano Zhasoni ola ahawaakela vaade vaaye. Aatene ala yahithegela nlamulo na Kingi Sezari, evuwihaga wi ohukalawo kingi mmohi, oneeriwa Yesu>>. 8Madhu alena yahitatamula nlogo ni apogo yeewile ndo. 9Aliwa yahimuwaddihedhaga Zhasoni ni amohi wi elive korowa, egalivile yahaahiyaga odhowa.

Waakeliwa wa Muselu Wapama oBereya

10Mowaaguva ode oribaga aKirixtu yahaapoothowihaga Pawulo ni Sila wi ethawele oBereya. Egafiyile yahidhowaga nyuba ya matugumano ya aZhudewu. 11AZhudewu ale yoofuna wiiwelela waakwaranya aZhudewu a oTesalonika, yahaakela Muselu Wapama ni madada meenddi; malabo maatene yootugumana esuuzaga wi yoone akala Maleba Ootaleleya yowiiwanana. 12Mowindo athu ale ajinji vamohi ni apogo ajinji aGerego ahiyana ni alobwana yahimuroromela Yesu.

13Mbwenye aZhudewu a oTesalonika veewiliisu wi Pawulo onolaleya madhu a Mulugu oBereya, aliwa teto yahithamagelagawo, oligawo dhoorusa. 14Mowaaguva aKirixtu yahimpoothowihaga Pawulo, omudhowana seresere ya nyaza; mbwenye Sila ni Timoteyo yahihalaga oBereya wewo. 15Ale yamveleelege Pawulo, yahidhowaga ni oliye oAtena. Nuwindo, yahiwelela oBereya ni mpaganyo wi Sila ni Timoteyo edhowe mowaaguva wa Pawulo.

Ofiya wa Muselu Wapama oAtena

16OAtena Pawulo aajejihaga akwaaye, ahukuuwaga vowoona wi muluwani mule mwahidhaala dhingamuthu dhoosema. 17Malabo maatene mu nyuba ya matugumano ya aZhudewu teto ni mmusika, Pawulo oowoga ni aZhudewu, vamohi ni aGerego yamweebedha Mulugu teto ni kadda muthu amfwanyiiye mwemo. 18Oononelamo a nikuru na aEpikurewu ni amohiwa a nikuru na Esitoyiko teto yoowogaga ni Pawulo. Amohiwa vevale yookoha, yiiraga: <<Muddabwareya ola onawoga ddi?>> Amohi yowiiraga: <<Onakalahi namalaleya a amilugu oode>>. Yoowoga nda mwaha wi Pawulo oolaleya Muselu Wapama wa Yesu ni ovenyihiwa muukwani. 19Vevale oononelamo ala yahimuthukulela o nikuru na asogoleli a nluwa othuthumani ya Areyopago, wiira: <<Nnafuna nnone masuuziho maxa enaalaleyiiwe. 20Vowi weevo ononiiwiha dhego dhootikiniha, nnafuna nnone dhedho dhinatapulela ddi?>> 21(Vowi akadda Atena ni anaweendda yakala wewule yooviriha mudhidhi weewa waatene ewogaga ni wiiwa dhixa.)

22Vano Pawulo ahiimelaga va nikuru na Areyopago, wiira: <<Nyo athu oAtena, miyo ginoona wi munaweebedha amilugu ajinji. 23Vowi giviraga muluwani mweenyu gihisuuzela mule ni mule dhingamuthu dhoosema dheenyu. Gihifwanya emohi egalebiwe ayi: <Eheleliwe mulugu oohunoniwa>. Ndala muluguya onamweebedhiinyu muhumunonile, duuyeene ginoolaleyeliimini dhiinova. 24Mulugu opaddusile odhulu ni vati ni dhaatedhene dhilimo; oli Nabwiya a odhulu ni a vati, kanakala nyuba dha dhoweebedha dhoomagiwa ni madada a athu. 25Naari kaneemeleliwa ni madada a athu, vowi kanahaleeliwa yego; oliyeene dinavaha egumi ni ovuma dhoopaddusiwa dhaatedhene. 26Mwa muthu mmohi baahi Mulugu ohupaddusamo malogo maatene wi ekale mwiilaboni mwaatemwene, aapimelaga mudhidhiya ni mburo mweeriisu ekalegemo. 27Eeragana nda afunaga wi athu emusayelege naari emwaababelaga, emfwanye, vowi oliye kalapelane mwa mmohi mwa hiyo. 28Hiyo nnakala mwa oliye, nneedda mwa oliye, nilive mwa oliye. Naari anamaleba eenyu a musibe yiiraga: <Hiyo nili teto athu a nlogo naaye>. 29Vowi nili anamabaliwelamo a Mulugu, nuhuubuwelege wi makalelo aaye eli oofwanafwana ni dhingamuthu dhoosemiwa dha oro, naari dha parata, naari dha mabwe; dhi dhisasanyiwe ni madada ni moobuwelelo a athu. 30Naari wona mudhidhi ovirile Mulugu ahilevelela ohunonelamo wa athu, dhiinova onowaalaleyela athu aatene, a mburo dhaatedhene wi etthwaruwe, 31mwaha wi ahithoma nlabo nimohi nneeriiye athonge elabo yaatene ni oharihamo odheela mwa muthu mmohi omusakuliiye, vano ola aheehiwa vameentoni va aatene, voomvenyiha muukwani>>.

32Alobwana ale a oAtena egeewile dha ovenya muukwani, amohi yoombeddaga, mbwenye amohi yowiiraga: <<Nneere wuwiiwa owogaga ndo nlabo nimohi>>. 33Mowindo Pawulo ahivenyagavo vaari veewa. 34Vano athu amohi yahimuharaga Pawulo eroromelaga madhu aaye; mwa ala aali Diyoniziyu a nikuru na Areyopago ni mwihiyana eeriwa Damarizi teto amohi ni aliwa.

Currently Selected:

Meerelo a Arumiwi 17: tke

Highlight

Copy