Meerelo a Arumiwi 16

Osakuliwa wa Timoteyo

1Pawulo ahifiya nluwa na Deribe, vooharela oLixtara. Wewule wahikala namasuuza mmohi ndina naaye Timoteyo. Maaye aali muZhudewu oororomela, mbwenye babe aali muGerego. 2Addibila aatene a oLixtara ni a oIkoniyo yoowoga dha opama wa Timoteyo. 3Pawulo ahifuna omuthukula wi yeeddege muulenddoni vamohi. Oliye ahimwiinela mwaha wa aZhudewu yaali mburo dha wewule vowi aatene yahinona wi babe a Timoteyo aali muGerego. 4Maluwa maatene mwaviriiwa Pawulo ni amohiwa, yowawaaddela dha nlamulo arumiwi ni apogo a gerezha ya oZheruzalemi nakaraatihiliiwa wi aliwa eharihege. 5Mowindo, gerezha dhaatedhene dhoolibihiwa munroromeloni, aKirixtu yoweenjedhedheya nlabo ni nlabo.

Yooroha ya Pawulo oTorowaddi.

6Yahivira mirudda dha oFirizhiya, oGalasiya. Muneba Woweela kawaahiyile olaleya Muselu Wapama murudda wa oAziya. 7Egafiyile murudda wa oMisiya, yahifuna wi edhowe oBitiniya, mbwenye Muneba wa Yesu kawaahiyile. 8Egavirile oMisiya, yahikitela nluwa na oTorowaddi. 9Mahiyu Pawulo ahimoonaga mulobwana a murudda wa oMasedoniya ageemelile, amulobaga, eeraga: <<Ovire oMasedoniya, onikamihedhe>>. 10Mowaaguva nahiisasanyedha odhowaga oMasedoniya, vowi nahikanna ebaribari wi Mulugu ononiithana wi nalaleye Muselu Wapama wa aliwa.

Ofiya wa gerezha oEropa

11Nigagwelile mwanddeya oTorowaddi, naheedda mowogoola odhowa eliga ya Samotarasiya. Omenseloni wiwa nahifiya varuwoni va oNeyapolisi. 12Okuma vevale nagele oFiliposi, nili nluwa nowambeela na murudda wa oMasedoniya, murudda walamuliwa ni aRoma. Nahilogela malabo majinji wewule. 13Nlabo na sabuddu nahikuma muluwani, okala waaddamela mwihinje woobuweliihu wi okale mburo wa malobelo. Nahikaraatigi owogaga ni ahiyana yatugumanege. 14Vahikalaga mwihiyana mmohi eethaniwa Lidiya a nluwa na oTiyatira, namaguliha a guwo dhapama dha roxa, amweebedha Mulugu. Nabwiya ahifugula murima waaye wi arumeedhe dhawoga Pawulo. 15Mwihiyana ole ni emudhi yaaye yahibathiziwa. Vano Lidiya ahiniloba, wiira: <<Akala nyo munorumeedha wi miyo gihimuroromela Nabwiya, mudhe mwakale vaade vaaga>>. Mowindo ahiniwaddihedha okala vaade vaaye.

Okumiha muneba mu ndina na Yesu

16Nlabo nimohi nidhowaga mburo wa malobelo, nahigumanaga ni namwali mudhaari ahiddiwe ni muneba wamooniha dhoosogolo. Anyaya yowaakelela korowa dhijinji ni omapitela weeriiyena. 17Namwali ole ahambeela onihara, akuwaga mowindala: <<Alobwana ala amwiimeleli a Mulugu a Mudhulu-dhulu, enalaleya dila yoovulumuwela>>. 18Oliye owiiresana dhedho malabo majinjeene. Voomariha Pawulo ahitakaleliwa, ahirugunuwelaga mundduli, olamula muneba ole, wiira: <<Mwa owodha wa ndina na Yesu Kirixtu, miyo ginowuulamula wi we okume mwa namwali ola!>> Mowaaguva muneba wahikuma. 19Anya a namwali ole egoonile wi vano kinaakalegena yowaakela okumela mwa oliye, yahimwihidda Pawulo ni Sila, waadhowana vampanddoni va othongi. 20Yahaasumela wa anamathonga, yiiraga: <<Alobwana ala aZhudewu enozuzumiha muluwani mweehu. 21Enosuuziha dhilemeelelo dhinahiiha nlamulo dhihinarumeedheya naari wiirana hiyo nigali aRoma>>. 22Vevo mulogo teto wahitakaleliwa vajinji ni Pawulo ni Baranabe, vevo anamathonga yahaakuguula dhoowara dheewa olamula wi ewaxuliwe. 23Egawaxuliwe vajinji, anamathonga yahaavokedha mukaambura. Yahimulamulelaga mpogo a okaambura wi awiing'anelege pama. 24Mpogo a okaambura agaakele nlamulo ndda, ahaavokedha suubi aali muwari-wari mwa kaambura, waamaga meddo ni kugulu.

25Vaari ni vaari va mahiyu Pawulo ni Sila yoolobelaga, emwiibelaga jibo Mulugu, anyakaambura amohi yoovuruwanaga. 26Mowaaguva, wahidha othikeya wuulubale vati, yahithikeya matibelelo a kaambura; mowaaguva misiwo dha kaambura dhahifuguwaga, fingwi dha mmeddoni ni mmoononi mwa anyakaambura dhahimora. 27Mpogo a kaambura ahirurumuwaga, woona misiwo dha kaambura dhigafuguwe. Ahiladda supaadda wi eepena, oobuwelaga wi anyakaambura ehithawa. 28Mbwenye Pawulo ahikuwaga ni ndhu nootaama, wiira: <<Kwiyiirele yootakala, hiyo aatene nili veva!>> 29Vevale mpogo a kaambura ole ahiithaniha panti, othamagela muwari, ahikonaantigi ogurumelaga vameentoni va Pawulo ni Sila. 30Ageere ndo ahaakumihedha ode, waakoha, wiira: <<Anabwiya, giire havi wi gavulumusiwe?>> 31Pawulo ni Sila yahimwaakulaga, wiira: <<Omuroromele Nabwiya Yesu, oneere ovulumusiwa, we vamohi ni vaade vaawo>>. 32Pawulo ni Sila yahimulaleyela ni athu aatene a vaade vaaye madhu a Nabwiya. 33Mudhidhi olene wa mahiyu mpogo a kaambura ahaakameela, waahuwa makwadda eewa oowaxuliwa. Mowaaguva mpogo ole ahibathiziwa ni emudhi yaaye yaatene. 34Nuwindo, ahaadhowana vaade vaaye, waavaha yooja; vano mpogo ole ni emudhi yaaye yaatene yahihagalala valubale mwaha woomuroromela Mulugu.

35Ode ogasile, anamathonga yahaarumaga anyakoddo ni madhu owi: <<Mwaatapule alobwana ale>>. 36Mpogo ole ahidhowaga omwaaddela Pawulo madhu ayene, wiira: <<Anamathonga ehilamula wi mutapuliwe dhiinova. Vano mmaruwe mudhowege ni murenddele>>.

37Pawulo ahaakulaga, wiira: <<Eganiwaxulile vaari va athu, hiyo nigali anamurala a omwene wa aRoma teto onivokedha mukaambura nihithongiwe, vano enafuna enikumihe mowiipiteya? Ii, naari. Kadhikale ndo! Edhe aliweene enitapule>>.

38Anyakoddo yahidhowaga wawaaddela anamathonga; aliwa veewiliiwa wi yaali anamurala a omwene wa aRoma, yahoova. 39Vano yahidhowaga wa aliwa, oloba nlevelelo. Waatapula, wiira: <<Evenyemo muluwani mule>>. 40Pawulo ni Sila egakumihiwe mukaambura, yahidhowaga vaade va Lidiya. Vevale egagumanile ni aKirixtu yahaalibiha, vano aliwa omaruwa.

Currently Selected:

Meerelo a Arumiwi 16: tke

Highlight

Copy