Meerelo a Arumiwi 15

Mutugumano mulubale wa asogoleli a oZheruzalemi

1Athu amohi yakitele murudda wa oZhudeya, yahifiya oAntiyokiya, yahambeela waasuuziha addibila, yiiraga: <<Nyo mwahiineliwa wona munasuuzihela nlamulo na Mozezi, kadhinaandeya wi mvulumusiwe>>. 2Vahikala orunihana wuulubale, Pawulo ni Baranabe kayarumeedhe aliwa dhawogiiwa. Gerezha ya oAntiyokiya yahimusakula Pawulo ni Baranabe ni amohiwa mwa aliwa wi egwelele wa arumiwi ni apogo a gerezha ya oZheruzalemi wi yeewananele muladdu ola. 3Vano gerezha yahaaruma odhowa, aliwa yahivira mirudda dha oFinisiya ni dha oSamariya ewogaga mooharana-harana wona mwemo athu oode mwamurumeedheliiwa Mulugu. Addibila aatene yaali oohagalala ni muselu olena. 4Egafiyile oZheruzalemi yahaakeliwa pama ni gerezha ni arumiwi ni apogo. Oorumiwa ale yahawaaddelamo dhaatedhene Mulugu dheeriliiye ni aliwa. 5Mbwenye athu amohi oororomela yaali aFarizi wale yahivenyaga, wiira: <<Soofuneya athu oode yiineliwe, elamuliwe eharege Malamulo a Mozezi>>.

6Arumiwi ni apogo a gerezha yahitugumana wi yoone muladdu ole. 7Aliwa egawogile mudhidhi mulubaleene, vano Peduru ahiimelaga, wiira: <<Addibilaga, muhunona wi wale Mulugu ahigisakula vaari va nyo wi odheela vamulomoni vaaga athu oode yiiwe Muselu Wapama erumeedhe. 8Oliye ononile mirima dha athu ohooniha wi onowaarumeedha athu oode, vowi ohaavaha Muneba Woweela aliwa wona teto hiyo mwanivaheliiye. 9Kanihiyanihile ni aliwa, mwa nroromelo oheeliha mirima dheewa. 10Ki vano, munamweehela ddi Mulugu? Munafuna waahela fingwi mukohi anamasuuza, hiyo nihinandiihu, naari makolo eehu kayaandile. 11Mbwenye nnororomela wi nili oovulumusiwa mwa mahala a Nabwiya Yesu Kirixtu, hiyo ni aliwa nihivulumusiwa ni mukalelo mmohive>>.

12Aatene yaaligi vevale yahimaalaga, omvuruwanaga Baranabe ni Pawulo, yahawaaddelaga dhitoonyihedho, dhootikiniha dhaatedhene Mulugu dheeriliiye ni aliwa vaari va athu oode. 13Baranabe ni Pawulo egamaalile, Tiyago ahaakulaga, wiira: <<Alobwana, addibila, mugivuruwane. 14Simiyawu (Peduru) ohunaaddelihamo wona Mulugu vowambeela ahipwatha waasakula amohiwa vaari va athu oode wi ekale nlogo naaye. 15Madhu a anamavuhulela enowiiwanana ni ndo. Dhihilebiwa ndala:

16<Nabwiya dinawoga:

Nda dhavira, miyo ginowela:

Gineere owelihedha Omwene wa Davidi.

Gineere owelihedha nddebe, giimelihe Omwene.

17Wi athu aatene amohiwa yaande omusayela Nabwiya,

ale gawiithaniliimi wi ekale aaga>.#15.17 Amosi 9.11-12.

18Di Nabwiya onoonihile dhego dhedhi wambeela mudhidhi dhawale>>.

19Vano Tiyago aheenjedhedhaga owoga, wiira: <<Gihoona wi kahuwo pama wi naarusihege athu oode enarugunuwela wa Mulugu, 20mbwenye naalebele kaarata enawoga dhowi ehijege dhooja dhooveleeliwa mukutho wa amilugu oosemiwa, kayiiregena dhooraruwa, kijege nyama dhoothithikuliwa naari mwazi. 21Vowi wambeela wale, mwa maluwa maatene mu nyuba dha matugumano dha aZhudewu, nlamulo na Mozezi nnolaleyiwa nlabo na sabuddu nili naatenene>>.

Kaarata yowaalebela athu oode

22Vevale arumiwi, apogo a gerezha ni gerezha yaatene yahiiwananela waasakula amohi vaari veewa wi yaarume oAntiyokiya ni Pawulo ni Baranabe. Yahaasakulaga asogoleli eewa abiili: Zhuda, eethaniwa teto Barasaba ni Sila. 23Vevale yahileba kaarata, yeera: <<Hiyo arumiwi ni apogo a gerezha, addibilinyu nihilebela kaarata ela wa nyoovo athu oode, addibilihu a oAntiyokiya, a oSiriya ni a oSilisiya. Mwaakele malojelo eehu. 24Nihiiwa wi athu amohi ookumela mwa hiyo yahifiya wewo wuurusihagani ni wuukukumulani ni masuuziho eewa. Ayene kayarumiwe ni olamulo weehu. 25Hiyo muumohini noonile okala yapama waasakula alobwana wi naarume wa nyo vamohi ni oodhivela akwiihu Baranabe ni Pawulo, 26alobwana enaveleela dhigumi dheewa mwaha wa ndina na Nabwiya eehu Yesu Kirixtu. 27Nihaarumiha Zhuda ni Sila wi ewoge ni nyo dhego dhedhi vameentoni veenyu. 28Vowi Muneba Woweela vamohi ni hiyo, noonile wi kahuwo yapama wuunyemelihani sapo dhimohi ehili oharihamo magano oofuneya ala: 29kamujege dhooja dhooveleeliwa mukutho wa amilugu, kamujege mwazi, naari nyama ya aneenyama oothithikuliwa; kamwiiregena dhooraruwa. Mweewelelaga dhaatedhene ndo, muneerana dhapama. Akelani malojelo eehu>>.

Oveleeliwa wa kaarata oAntiyokiya

30Aliwa egapaganyiwe, yahikitelaga oAntiyokiya, yahaatugumanya aKirixtu aatene, oveleela kaarata ele. 31Egeelengile, yahihagalalaga, olibihiwa ni madhu a kaarata ele. 32Zhuda ni Sila ayene teto yaali anamavuhulela, yahiwogaga ni aliwa mudhidhi woolapa, yaakurumulaga mirima addibila ni waawaraaliha. 33Egali wewule malabo majinji, addibila yahaarumaga owelela mundduli mwa murenddele wa ale yaarumile. 34[Mbwenye Sila oobuwele wi yaali yapama ologela wewule.]#15.34 Madhu ala kinafwanyeya mmaniivuruni awale. 35Pawulo ni Baranabe yahikalave oAntiyokiya, aliwa ni amohi ajinji yahisuuziha ni olaleya madhu a Nabwiya.

Olenddo wa nabiili wa Pawulo

36Vigavirile malabo mamohi Pawulo ahiiraga wa Baranabe: <<Ndowe niwelele, waweeddela addibila aatene mmaluwani maatene mwemo mwalaleyiliihu madhu a Nabwiya. Nawoone akala eli pama>>. 37Baranabe afunaga amuthukule Zhuwawu eethaniwa Maruku. 38Mbwenye Pawulo ahilibihedhaga wi ahimuthukule, mwaha wi oliye ahaanyanyala oPamfiliya, kaaveleele aliwa ofiyedha omala olenddo wowambeela woolaleya. 39Pawulo ni Baranabe yahikanganaga vajinji, ofiyedha omwalana. Baranabe omuthukula Zhuwawu Maruku, ogwela mwanddeya, odhowa eliga ya oXiperi. 40Mbwenye Pawulo amusakulege Sila. Amudhi mwa Kirixtu egaaveleele aliwa mwa mahala a Nabwiya, vano yahambeelaga olenddo weewa. 41Yahivira murudda wa oSiriya, murudda wa oSilisiya, alibihaga dhigerezha dhaatedhene.

Currently Selected:

Meerelo a Arumiwi 15: tke

Highlight

Copy