Meerelo a Arumiwi 14

Ofiya wa Muselu Wapama murudda wa oLikawoniya

1Nluwa na oIkoniyo, Pawulo ni Baranabe yahivolowa vamohi nyuba ya matugumano ya aZhudewu, yoolaleya ofiyedha aZhudewu ajinji teto athu aGerego ororomela. 2Mbwenye aZhudewu yaharoromele yahaatuzha oode wi yiiddane ni addibila yaali aKirixtu. 3Arumiwi yahikala malabo majinji elaleyaga madhu a Mulugu moohoova. Nabwiya owiirela onamoona dhawogiiwa dha mahala aaye, aavahaga owodha wowiirana dhitoonyihedho ni dhootikiniha ni madada eewa. 4Mbwenye athu a nluwa ndde yahigawanyeya; amohi yaali epaddi ya aZhudewu, amohiwa yaali epaddi ya arumiwi. 5Vano athu oode, aZhudewu ni apogo eewa, egaxixile wawooniha goyi ni waapa ni mabwe Pawulo ni Baranabe, 6arumiwi ale yahithawela oLixtara ni oDeribe, maluwa a murudda wa oLikawoniya ni dhipaddi dhowaaddamela. 7Wewule yahiwelela olaleya Muselu Wapama.

8OLixtara wahikala mulobwana ookwa meddo, alogelesa ookaraatene, abaliwe ndo, keedda. 9Oliye ahimwiiwa Pawulo awogaga, vano Pawulo agamusugwile ahimoona wi ahikanna nroromelo nowi eere oyilihiwa. 10Oliye ahiwoga ni ndhu nootaama, wiira: <<Wogoole manyalo aawo, wiimele!>> Vevo mulobwana ole ahivenya, wambeela weedda.

11Athu yaaligi vevale egoonile dheerile Pawulo, yahambeelaga okuwa mu eLikawoniya, yiiraga: <<Amilugu ehisadduwa athu, okitela wa hiyo!>> 12Mowindo yahimvahaga Baranabe ndina na Zhupiteri, yahimvaha Pawulo ndina na Merikuriyu mwaha wi Pawulo dawoga.#14.12 Mandina ala yaali a amilugu aGerego. Zhupiteri aali musogoleli a amilugu; Merikuriyu aali oothukula muselu adhowagana wa athu. 13Namakutha a nyuba ya mulugu Zhupiteri, nyuba eyene yaali ode wa nluwa, ahidha vamavolowelo agathukule ng'ombe ni kara dha todo. Oliye vamohi ni athu aaye yafunaga yaapelekele mikutho.

14Mbwenye arumiwi ala Pawulo ni Baranabe egeewile nde, yahitalaga dhoowara dheewa, olupela vaari va anamwinji, ekuwaga, yiiraga: 15<<Alobwana, muneerela ddi dhedho? Hiyo nili alobwana a mukalelo mmohive ni nyo. Nili wuno wuulaleyelani Muselu Wapama wi murugunuwe wa milugu dheebeweene, murugunuwele wa Mulugu mugumi, opaddusile elabo ya odhulu ni ya vati, nyaza ni dhaatedhene dhili mwaatemwene mwemo. 16Wale Mulugu ahaahiya malogo maatene weedda dhifunelo dheewa. 17Mbwenye Mulugu kahiyile wiyooniha, eeragana dhapama, oovahagani muzongwe okumela odhulu, oovahagani midhidhi dhoohadda, adhaalihaga mwiili dheenyu ni dhooja, mirima dheenyu ni ohagalala>>. 18Naari egawogile ndo dhaali dhoorusa wi yaatuzhe athu ale wi ehipeleke mukutho wa aliwa.

19Mbwenye yahifiya aZhudewu a oAntiyokiya ni a oIkoniyo, waatuzha athu ale omvonya Pawulo ni mabwe. Omburulela ode wa nluwa, omoonaga wona okwile. 20Anamasuuza egamwaapeelele oliye ahivenya, owelela muluwani mwemule. Omenseloni wiwa, ahimaruwa ni Baranabe, odhowa oDeribe.

Owelela oSiriya

21Pawulo ni Baranabe egamalile olaleyela Muselu Wapama ni osuuziha oororomela ajinji muluwani mule, yahiwelela maluwa, oLixtara, oIkoniyo ni oAntiyokiya murudda wa oPiziddiya. 22Aliwa yoolibiha mirima dha anamasuuza, yalobaga wi ekalegeve munroromeloni. Teto yowasuuziha, yiiraga: <<Nnaavolowe mu Omwene wa Mulugu odheela mu dhooharahariwa dhijinji>>. 23Mmagerezha mwaatemwene mwaviriisu, yowaasakulelamo apogo. Egaalobelele aatene ni othuga, yowaapeleka wa Nabwiya oyene apogo ale yamuroromeliiwa.

24Vano Pawulo ni Baranabe yahivira murudda wa oPiziddiya, ofiya murudda wa oPamfiliya. 25Egalaleye muselu nluwa na oPerege, yahikitela oAtaliya. 26Okuma vevale yahigwela mwanddeya, owelela oAntiyokiya oSiriya wewo vowambeela waaveleeliwiiwa mwa mahala a Mulugu wi mabasa ale dhiinova ehawaakwaneliha. 27Egafiyile wewule, yahitugumanya gerezha, Pawulo ni Baranabe wawaaddela dhaatedhene Mulugu dheeriliiye ni aliwa. Wawaaddela mwemo Mulugu mwaafuguleliiye athu oode dila ya nroromelo mwa Yesu. 28Vano yahikala mudhidhi mujinji ni anamasuuza a wewule.

Currently Selected:

Meerelo a Arumiwi 14: tke

Highlight

Copy