Meerelo a Arumiwi 13

Orumiwa wa Baranabe ni Sawuli

1Mu gerezha ya oAntiyokiya mwahikala anamavuhulela ni anamasuuziha ala: Baranabe, Simiyawu eethaniwa Nizheri, Lusiyu a oSirene, Manayemi onnuwile vamohi ni Heroddi, namathonga#13.1 Namathonga eeriwa tetararaka; athonga epaddi ya nennayi ya murudda mmohi. a elabo ya oGalileya, ni Sawuli. 2Aliwa yeebedhaga wa Nabwiya ni othuga, Muneba Woweela wahiiraga: <<Mugisakulelevo Baranabe ni Sawuli wi yahidde mabasa ayene gawiithaneliimi aliwa>>. 3Vano egathugile ni olobela, yahaahelaga madada waaruma.

Wakeliwa wa Muselu Wapama oXiperi

4Egarumiwe ni Muneba Woweela, aliwa yahikitela oSelusiya, ogwela mwanddeya, odhowaga eliga ya oXiperi. 5Vano egafiyile nluwa na oSalamina, yoolaleya madhu a Mulugu mu nyuba dha matugumano dha aZhudewu. Yaaligi ni Zhuwawu Maruku, aakamihedhaga aliwa.

6Egeeddile eliga yaatene, yahifiya nluwa na oPafosi.#13.6 Pafosi naali nluwa nuulubale na eliga ele, vakala kuminadori. Yahimfwanya mulobwana a masenga, namavuhulela ooratha, muZhudewu ndina naaye Bari-Yesu.#13.6 Bari-Yesu enatapulela Mwaana a Yesu. 7Aali mukwaaye a kuminadori a wewule, Serizhiyu Pawulo, aali a tthottho. Ola ahawiithanaga Baranabe ni Sawuli, afunaga wiiwa madhu a Mulugu. 8Mbwenye mulobwana a masenga ole, (Elimasi mu ewogelo ya eGerego), oovaanyihana ni aliwa. Asayela wi kuminadori ole ahiroromele. 9Mbwenye Sawuli, oyene eethaniwa teto ni ndina na Pawulo, oodhaaliwa ni Muneba Woweela, ahimusugwesesaga, 10wiira: <<Oodhaaliwa onyengetha! Oodhaaliwa dhootakala! Mwaana a muneba wootakala, mwiiddani a dhowogoowa dhaatedhene! Mwaha bwaddi kunahiya okoromaniha dila dhowogoowa dha Nabwiya? 11Vano dhiinova woone, moono wa Nabwiya wuurabulihe. We onaakale oohoona, kunoone nduwa mwa mudhidhi>>. Mowaaguva yiihi yuulubale yahimudheelaga Elimasi, wambeela weedda mowapeela amusayelaga oomwihiddeela ndada. 12Kuminadori agoonile nde, ahiroromela, okala ootikiniheya vajinji ni dhosuuziha dha Nabwiya.

Ofiya wa gerezha oAziya Mung'onong'ono

13Pawulo ni akwaaye yahigwelaga mwanddeya oPafosi, ofiya nluwa na oPerege, murudda wa oPamfiliya. Mbwenye Zhuwawu Maruku ahaahiyaga wewo, owelela oZheruzalemi. 14Aliwa egavenyile oPerege yahifiyaga nluwa na oAntiyokiya, murudda wa oPiziddiya. Nlabo na sabuddu yahivolowaga nyuba ya matugumano ya aZhudewu, okaraati. 15Nuwindo, egeelengile madhu a Malamulo a Mozezi ni madhu a maniivuru a anamavuhulela, asogoleli a nyuba ele yahirumihaga mutheenga wa aliwa, wiira: <<Addibila, akala muhukalana madhu oolibiha wa nlogo, muwoge>>.

16Vevale Pawulo ahivenyihaga ndada wiirihedha etoonyihedho, wambeela owoga, wiira: <<Alobwana aEzarayeli ni nyo mwaatene munamoova Mulugu, keewani. 17Mulugu a nlogo ndda na aEzarayeli ahaasakula abaabi eehu, wiinjiviha nlogo neehu egali anaweendda elabo ya wEgubuddu. Oliye ahaavenyihawo abaabi eehu ni owodha waaye wuulubale. 18Mwa yaaka makumi mannayi ahivilela ni aliwa mwiiddeddereni. 19Agabwanyulile malogo matanu ni meenddi a elabo ya Kanani, elaboya ahaavaha aEzarayeli wi ekale yeewa malabo maatene. 20Nda dhaatedhene dheereyile mwa yaaka mazana mannayi ni yaaka makumi matanu (450). Nuwindo, Mulugu ahaavaha aliwa anamathonga, ofiyedha mudhidhi wa namavuhulela Samuweli. 21Vevale yahimuloba kingi, Mulugu ahaavaha Sawuli, mwaana a Kiizhi. Sawuli aali mulobwana a nlogo na Benzhami, alamulele yaaka makumi mannayi. 22Mulugu agamvenyihilevo ola, ahimuhabihawo Davidi wi akale kingi eewa, oyene amwiireliiye onamoona, eeraga: <Gihimoona mwaana a Zhesi, Davidi, mulobwana oneewanana ni murima waaga,#13.22 Samuweli Owambeela 13.14. oneerena dhoofuna dhaaga dhaatedhene>. 23Mwa anamabaliwelamo a Davidi, mooligana ni ororomeliha wa Mulugu, ahimudhana wa aEzarayeli Mvulumusi, oli Yesu.

24<<Yesu ahinafiye, Zhuwawu oolaleya obathizo wootthwaruwa wa aEzarayeli aatene. 25Zhuwawu aakwanelihaga mabasa aaye oowoga, eeraga: <Munaguubuwelana okala aani? Miyo kagili Kirixtu. Mbwenye moone, ole onadha mundduli mwaaga, miyo kagifwaneele otapula mingoyi dha sapatho dhaaye>. 26Amudhi, anamabaliwelamo a Abarahamu ni nyo amohiwa munamoova Mulugu, mvuruwane! Wa hiyo aatene nahirumihedhiwa madhu ala oovulumusa. 27Ebaribari athu a oZheruzalemi ni apogo eewa kayamunonile wi Yesu aali Mvulumusi, yahaakwaneliha madhu a anamavuhulela, yeelengiwa masabuddu maatene. Mowindo yahaakwaneliha dhoovuhulela nda vamukoniliisu oliye wi akwe. 28Naari yahaafwanyileve mwaha wofwaneelela ompela, yahimuloba Pilatu wi Yesu apiwe. 29Dhigaakwanele dhaatedhene dhalebiwe dha oliye, yahimvenyihavo vamuraddini, omuhela munsiyeni.#13.29 Masiye a mudhidhi olene yakala wona nikungu. 30Mbwenye Mulugu ahimvenyiha muukwani. 31Yesu ahilogela malabo majinjeene ooneyelaga wa ale yamveleele okuma oGalileya, ofiya oZheruzalemi. Vevale ayene yaaligi anamoona aaye wa nlogo. 32Mowindo hiyo nnoolaleyelani Muselu Wapama: 33Nde dhaaroromelihiiye makolo eehu, Mulugu ohaakwaneliha wa hiyo, vamvenyihiliiye Yesu muukwani wona mulebeliwiiwa mu Saalimu a nabiili:

<We oli Mwaana aaga;

peeno miyo guhuubala>.#13.33 Masaalimu 2.7.

34Owoga dha ovenyihiwa wa Yesu muukwani wi ahidhe awelela omavuddelo, Mulugu ahiiraga:

<Ginowuuvahani mareeliho oweela,

oororomeleya wa Davidi>.#13.34 Ezaya 55.3.

35Saalimu mmohi ahiwoga:

<Nyo kamunamwihiye

Oweela eenyu avudde>.#13.35 Masaalimu 16.10.

36<<Ebaribareene Davidi agamwiimelele Mulugu mwiigumini mwaaye, ahikwa, ologohiwa ni makolo aaye, ovudda. 37Mbwenye ole Mulugu amvenyihiliiye muukwani kaavuddile. 38Mowindo, amudhi, munone wi odheela mwa Mozezi nnolaleya oleveleliwa dhoothega. 39Odheela mwa oliye aatene enamuroromela enowaakihedhiwa dhoothega dhaatedhene, dhoothega dhahaandeyile waakihedhiwa odheela mwa nlamulo na Mozezi. 40Moone wi dhuhuwiireyeleni dhawogile anamavuhulela, dheeriliisu:

41<Moone, nyo munamunyemula Mulugu!

Mutikiniheye, mukwe.

Vowi gihiirana yego mwa malabo eenyu,

si yego eneeriinyu muhurumeedhe,

naari mmohi owaaddelihemoni> >>.#13.41 Habakuki 1.5.

42Pawulo ni Baranabe egamaruwe, athu a wewule yahaalobaga wi sabuddu oowelela yaawogena muru mmohive olene. 43Mutugumano ole ogamalile, aZhudewu ajinji ni amohiwa yamweebedha Mulugu yahimuharaga Pawulo ni Baranabe. Aliwa yoowoga ni athu ale yahaakwekwetha wi ekalegeve mmahalani a Mulugu.

44Sabuddu ooharela mwa athu aatene a nluwa ndde yahitugumanaga wi yiiwe madhu a Nabwiya. 45AZhudewu egoonile muthithi ole, yahidhaaliwaga nrima, yahambeelaga ovaanyihanaga ni Pawulo, emunyemulaga.

46Vano Pawulo ni Baranabe yahawaakulaga moohoova, wiira: <<Yaali yoofuneya wi madhu a Mulugu elaleyiwe vowambeela wa nyo aZhudewu. Mbwenye vowi nyo kamunafuna waarumeedha, munoobuwela wi kamfwaneelele waakela egumi yoohumala, hiyo nnarugunuwela malogo mamohiiwa. 47Vowi eyo Nabwiya sinilamuleliiye:

<Miyo guhuuhela we wona waara

vaari va malogo mamohi,

wi othukulele ovulumusiwa

ofiyedha omagomelo wa elabo> >>.#13.47 Ezaya 42.6; 49.6.

48Athu oode veewiliiwa madhu ayo yahihagalala, yahambeela othithimiha madhu a Nabwiya. Aatene yasakuliwe wi ekanne egumi yahiroromela Muselu Wapama ola.

49Mowindo madhu a Nabwiya yahimwadheyela murudda ole waatene. 50Mbwenye aZhudewu yahaatuzha ahiyana yamweebedha Mulugu yanna mabasa a vadhulu teto apogo oofuneya a nluwa ndde, vamohi yahambeela waaharahara Pawulo ni Baranabe. Athu ale yahawiigara murudda ole. 51Vano arumiwi yahitata nthubi na sapatho dheewa wona etoonyihedho yowaaruniha, nuwindo yahidhowa nluwa na oIkoniyo.#13.51 Yesu ahaalamula anamasuuza aaye wi etate nthubi na manyalo eewa wooniha wi ale enakoodda Muselu Wapama enakala ookoneya. Moone Matewuzhi 10.14; Maruku 6.11; Luka 9.5; 10.11. 52Anamasuuza a nluwa ndde yahidhaaliwa ohagalala ni Muneba Woweela.

Currently Selected:

Meerelo a Arumiwi 13: tke

Highlight

Copy