Meerelo a Arumiwi 12
12
Oharahariwa wa Tiyago ni Peduru
1Mudhidhi olene, Samasowa Heroddi ahilamula wi ehiddiwe athu amohi a gerezha wi awoonihe goyi. 2Ahimpiha ni supaadda Tiyago,#12.2 Tiyago ola aali murumiwi. ddibila a Zhuwawu. 3Heroddi agoonile wi dhahaadhivela aZhudewu, ahimmaga teto Peduru. (Yaali malabo a Mathanga a Mikaathe Dhoohuheliwa Emela.) 4Agammagihile, ahimuhela mukaambura, ahimpeleka wa makuru mannayi a anyakoddo annayi-annayi. Afunaga wi amuthonge vameentoni va athu Paxkwa agavirile. 5Peduru aali oofugeliweene mukaambura; mbwenye gerezha yoomulobelela wa Mulugu moohumaaliha.
6Omahiyuni wiwa Heroddi vafunigiiye omuthonga, Peduru agonaga eeng'aneliwaga ni anyakoddo abiili, egammagile ni fingwi biili ni anamaang'anela vamusiwo yowiing'anelaga kaambura. 7Mowaaguva, mungero a Nabwiya ahikumelelaga, vano waara wahimoneyaga suubi ole. Mungero ahimukahinyaga Peduru wi arurumuwe, wiira: <<Kavenya mowaaguva!>> Fingwi omora mmoononi mwaaye. 8Mungero ahimwiirelaga: <<Omagele sintu naawo, oware sapatho dhaawo>>. Ahiirana ndale. Mungero teto ahiiraga: <<Oware kasaako yaawo, ogiharege>>. 9Vano ahimaruwa, omuharaga, ahinonaga wi ebaribari dheereya ni mungero ole, oobuwelaga wi onooroha. 10Egakwaranye nikuru na owaang'anela owambeela ni na nabiili, yahifiya esewo ya mugogo vaakumeleliiwana muluwani. Esewo ele yahifuguwaga weekiiwa. Aliwa okuma, weedda vang'ono, mowaaguva mungero ole ahimwihiya.
11Vano Peduru aganonelemo, ahiiraga: <<Vano gihinona ebaribareene wi Nabwiya ahimurumiha mungero aaye ogivulumusa mmadani mwa Heroddi, ogivulumusa mwa dhootakala dhaatedhene aZhudewu dhoobuweliiwa ogiirela>>.
12Peduru aganonile nda, ahidhowa vaade va Mariya, maaye Zhuwawu Maruku, vaaligi athu ajinji egatugumane, elobelaga. 13Peduru vagogoddiligiiye musiwo, ahidhaaga mwiimeleli mwaana-mwihiyana ndina naaye Rodda wi amoone aali aani. 14Agadidele ndhu na Peduru, kaafugulile vamavolowelo mwaha woohagalala. Ahithamagela mba, wawaaddela athu, wiira: <<Peduru oli vamavolowelovo!>>
15Athu yahiiraga: <<We ohusavuwa!>> Mbwenye oliye oolibihedhagave wi ebaribari. Aliwa yoowiiraga: <<Di mungero aaye oyo>>.
16Mbwenye Peduru oogogoddagave; aliwa egafugulile, yahimoonaga wi duuliyeene, yahitikiniheyaga vajinji. 17Peduru ahiirihedhaga etoonyihedho ni ndada wi emaale, ahawaaddelaga wona Nabwiya mwaamvenyiheliiye mukaambura. Aheenjedhedhaga, wiira: <<Mmwaaddele dhedho Tiyago ni addibilihu>>. Nuwindo, Peduru ahivenyagavo, odhowa mburo mmohiwa.
18Ode ogasile anyakoddo yahisimwelaga vajinji, yahiiraga: <<Ii! Peduru emwiireyele ddi?>> 19Heroddi agamusayele kamfwanyile. Ahaakoha anamaang'anela, oliye olamula wi aliwa evenyihiwevo, yapiwe. Vano Heroddi ahivenya oZhudeya, okita odhowa oSezareya, okala wewo.
Okwa wa Heroddi
20Wahikala ohiiwanana wuulubale wa Samasowa Heroddi ni athu a oTiru ni a oSidoni. Vano aliwa yahiiwanana odhowa owoga ni oliye. Vowambeela yahimukwekwethaga Balasito, oyene aali musogoleli mulubale a nyuba ya samasowa wi aakamihedhe. Vevo yahimuloba Heroddi wi eerihedhe murenddele ni aliwa, mwaha wi dhooja dheewa dhakuma elabo yaaye. 21Heroddi ahipangana nlabo ni aliwa, nigafiyile nlabo ndde, oliye ahiwaraga guwo dha osamasowa, okaraati vampanddoni vaaye va othongi, wambeela owoga wa aliwa. 22Athu yoowogaga moogweliha madhu wa Heroddi, yiiraga: <<Ndda ndhu na mulugu mmohi, kahuwo muthu onawoga!>> 23Mowaaguva mungero a Nabwiya ahimutatamula oredda Heroddi, vowi kaamvahile nthithimiho Mulugu, mihago dhahimuja marubo okwa.
24Mbwenye madhu a Mulugu yowunnuwa, yooweenjedhedheyave.#12.24 Verisikulu ela enatapulela wi gerezha yowunnuwa, athu ajinji yoomuroromelave Nabwiya.
25Vano Baranabe ni Sawuli yahaakwaniha ohidda mabasa yarumiwiiwa, yahiwelawo oZheruzalemi, omuthukula Zhuwawu Maruku.
Currently Selected:
Meerelo a Arumiwi 12: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
