Meerelo a Arumiwi 11

Wiyaakihedha wa Peduru

1Arumiwi ni addibila yaali oZhudeya, yahiiwa dhowi teto athu oode yahirumeedha madhu a Mulugu. 2Peduru vagweliliiye#11.2 Vagweliliiye enatapulela moononeya pama wi Zheruzalemi aali othuthumani, Sezareya aali seresere ya nyaza. oZheruzalemi, oororomela yaali owiineliwa yahimusumulula oliye, 3yiiraga: <<Ohuvolowa nyuba ya athu oohiineliwa, ohuja ni aliwa>>.

4Vano Peduru ahambeelaga wawaaddela mooharana-harana, eeraga: 5<<Miyo gaali nluwa na oZhope gilobelaga, gahikala wona giire okomowa. Gahoona yego yakalahi guwo yuulubale ekitaga odhulu egamagiwe mapiyo mannayi, edhaaga wa miyo. 6Ngasugwesese muwari mwa guwo ele, gahawoonaga aneenyama a meddo minnayi, owoopiha, owiiburula ni balame dha mukokolani. 7Teto gahiiwaga ndhu niiraga: <Peduru, kavenya, ompe mwaneenyama, omuje!>

8<<Gahiira: <Naari, Nabwiya, kaginaabihege oja yego yootakala, yookooddihiwa mMalamuloni>.

9<<Ndhu nahikumaga odhulu olenddo wa nabiili, wiira: <Ehuwile Mulugu, we ohuubuwele wi sootakala>. 10Dhedhi dhahiireya dila thaaru, guwo ele yahithukuleliwa odhulu.

11<<Mudhidhi olene alobwana araaru yarumiwege wa miyo ni Korineeliyu a oSezareya, yahifiya vaade vakaliihu. 12Vano Muneba Woweela wahigaaddelaga wi gidhowe ni aliwa gihaanganyedhe. Yahidhowa ni miyo addibila ala atanu ni mmohi. Nahivolowaga nyuba ya Korineeliyu. 13Oliye ahinaaddela wi ahimoona mungero ageemelile vaade vaaye. Mungero ole ahimwaaddela, wiira: <Waarume oZhope athu yamwiithane Simawu, ole oneethaniwa ni ndina na Peduru, 14oyene onowuwaaddela mwemo Mulugu munoovulumuseliiye we ni vaade vaawo vaatevene>.

15<<Miyo ngambeele owoga, Muneba Woweela wahaakitela wona wanikiteleliiwa hiyo vowambeela. 16Vano gahuubuwelela dha madhu a Nabwiya, yeeriliiye: <Zhuwawu ebaribareene abathiza ni mahinje, nyo munaabathiziwege ni Muneba Woweela>.#11.16 Moone Meerelo a Arumiwi 1.5. 17Akala Mulugu ahaavaha mvahi mmohive wona teto hiyo nnamuroromela Nabwiya Yesu Kirixtu, miyo gaali aani wi gihiihe ofuna wa Mulugu?>>

18Vano arumiwi ni addibila egeewile nda, yahikurumuwaga, omuthithimihaga Mulugu, wiira: <<Ebaribareene Mulugu ohaavaha athu oode otthwaruwa onadhana egumi yoohumala>>.

Ofiya wa gerezha oAntiyokiya

19Vano ale yamwadheyele mwaha wooharahariwa wambeele ni opiwa wa Extevawu yahimwadheya ofiya oFinisiya, oXiperi ni oAntiyokiya yaalaleyelaga aZhudewuve Muselu Wapama. 20Mbwenye vaari veewa yahikalavo yaali a oXiperi, a oSirene, ale yadhowile oAntiyokiya, yowaalaleyela teto aGerego muselu wa Nabwiya Yesu. 21Kopolo dha Nabwiya dhaali ni aliwa, athu ajinji yahiroromela, otthwaruwa, omuharaga Nabwiya.

22Gerezha ya oZheruzalemi veewiliiwa dhoowoga nda, yahimuruma Baranabe oAntiyokiya. 23Agafiyile, ahoonaga mahala a Mulugu, ahihagalala, waaloba wi emuroromelegeve Nabwiya ni murima waatene. 24Vowi Baranabe aali mulobwana apama, oodhaaliwa ni Muneba Woweela ni oororomela, athu ajinji yahimuroromela Nabwiya.

25Baranabe ahimaruwa, odhowa oTarusu, omusayela Sawuli; 26agamfwanyile, ahimudhowagana oAntiyokiya. Yahikala vamohi wewule yaaka emohi, yootugumana mu gerezha elene, yaasuuzihaga athu ajinji. Fu oAntiyokiya wewo anamasuuza ale wavahiwiisu vowambeela ndina nowi <<aKirixtu>>.

27Malabo alene yahikita oZheruzalemi anamavuhulela, odhowa oAntiyokiya. 28Mmohi mwa aliwa, ndina naaye eeriwa Agabu. Ahiwogaga ni owodha wa Muneba wi voohulogela weere odha dala yuulubale elabo yaatene. (Dala eyo yahidha mudhidhi wa Kalawudiyu.) 29Anamasuuza yahiiwananelaga ohidda mabasa owaakamihedha addibiliwa yakala oZhudeya, mooligana ni okalana wa kadda muthu. 30Vevo yahiirana ndo, waarumana dhoovaha nde, Baranabe ni Sawuli oveleela wa apogo a gerezha.

Currently Selected:

Meerelo a Arumiwi 11: tke

Highlight

Copy