Meerelo a Arumiwi 10

Otthwaruwa wa sinturiyawu Korineeliyu

1Nluwa na oSezareya wahikala mulobwana eethaniwa Korineeliyu. Aali sinturiyawu#10.1 Asinturiyawu yaali asogoleli a anyakoddo zana (100) a oRoma. a kumpaniya ya anyakoddo a oRoma yeethaniwa <<Kumpaniya ya oItaliya>>. 2Oliye ni emudhi yaaye yaatene yoomwiiwelela ni omoova Mulugu. Owaakamihedhesa oorabula, oolobelesa wa Mulugu.

3Nlabo nimohi, mudhidhi wa wora ya neethaaru ya ciguwo,#10.3 Mudhidhi wa wora ya neethaaru ya ciguwo yaali elemeelelo ya aZhudewu mudhidhi walobeliiwa. Korineeliyu ahimoonaga pamadhene mungero a Mulugu afiyaga, wiira: <<Korineeliyu!>>

4Oliye oomusugwaga mungero ole, oomoovaga vajinjivene, wiira: <<Munafuna ddi, Nabwiya?>>

Vano mungero ahimwiirelaga: <<Malobelo aawo ni waakamihedha waawo oorabula dhihimudhivela Mulugu wona mukutho woonukwela. 5Dhiinova waarume alobwana edhowe nluwa na oZhope, wa muthu oneethaniwa Simawu, oneethaniwa teto ni ndina na Peduru. 6Onakala vaade va Simawu mmohiwa, namakutha makupa. Nyuba yaaye eli waaddamela seresere ya nyaza>>.

7Agadhowile mungero ole awogigiiyena, Korineeliyu ahawiithanaga anamalaba aaye abiili ni munyakoddo mmohi mwa ale yaaligi vamabasani vaaye. Munyakoddo ola teto oomweebedhesa Mulugu. 8Korineeliyu agawaaddele dhaatedhene dhapadduwile, ahaaruma wi edhowe oZhope.

Dhootikiniha dhoonile Peduru

9Nlabo nooharela mudhidhi waaddamelaga wora ya neekumi nabiili ya mutana, ale yaarumilege Korineeliyu yaaddamelaga oZhope, Peduru ahigwelaga vadhulu va nyuba wi alobele.#10.9 Nyuba dha mudhidhi olene dhookalana nthaddo odhulu wiwa. 10Agali wewule ahivoliwaga dala, oofunaga oja. Vevale athu esasanyaga yoojaya, Peduru ahikalaga wona wiire okomowa. 11Ahoonaga odhulu ogafuguwe, ekitaga yego wona guwo yuulubale, ekitihedhiwaga vati ni mapiyo mannayi. 12Muwari mwa guwo ele mwahikalaga aneenyama a meddo minnayi ni owiiburula ni balame dha mukokolani. 13Peduru ahiiwa ndhu niwogaga ni oliye, niiraga: <<Peduru, kavenya, ompe mwaneenyama, omuje!>>

14Mbwenye Peduru ahiira: <<Naari, Nabwiyani. Kaginaabihege oja yego yootakala, yookooddihiwa mMalamuloni!>>

15Vano ndhu nahiwoga dila ya nabiili, wiira: <<Ehuwile Mulugu, we ohuubuwele wi sootakala>>.

16Dhedhi dhahiireya dila thaaru, mowaaguva guwo ele yahithukuleliwa odhulu.

17Mudhidhi Peduru woobuweligiiye yootapulela ele yooniliiye, alobwana ale yarumiwege ni Korineeliyu ekohedhelaga vaade va Simawu egeemelile va mulago. 18Aliwa wiithana, okoha, wiira: <<Simawu ononiwe ni ndina na Peduru, onakala veva?>> 19Mudhidhi Peduru oobuweligiiye ya ele yooniligiiye, Muneba wahimwaaddelaga, wiira: <<Peduru, woone! Alobwana araaru enoosayela weene. 20Mowindo ovenye, okitele muddibani, odhowe ni aliwa ohaanganyedhe vowi di miyo gaarumile>>.

21Vevale Peduru ahikitaga, wawiirela athu ale: <<Dimiyeene onamusayeliinyu. Mudheele mwaha wa ddi?>>

22Aliwa wiira: <<Sinturiyawu oneethaniwa Korineeliyu dinirumile. Oliye muthu ooharihamo, oomoova Mulugu. AZhudewu aatene enowoga dha opama waaye. Mungero a Mulugu dimwaaddele wi owiithaneni mudhowe vaade vaaye, owiiweni dhinafuniinyu owoga>>. 23Vevale Peduru ahawiithanaga wi evolowe, waavaha mburo. Nlabo nooharela Peduru ahiisasanyedhaga, odhowa vamohi ni aliwa. Addibila amohi a oZhope yahidhowa vamohi ni oliye.

Wakeliwa wa Muneba Woweela ni athu oode

24Nlabo nooharela aliwa yahifiya oSezareya. Vano Korineeliyu owaajejihedhaga, ahaatugumanyaga amudhi aaye, akwaaye a vamurimani. 25Peduru avolowagawene, Korineeliyu ahidhowaga ogumanana ni oliye, vevale ahiworomaga okokora vameentoni vaaye, wooneyiha nriiho. 26Mbwenye Peduru ahimvenyihaga, wiira: <<Ovenye, vowi miyo gili muthu wona weevo>>.

27Awogagave ni Korineeliyu, yahivolowaga mba, Peduru ahaafwanyaga athu ajinjeene egatugumane mwemule. 28Vevale ahawiirelaga aatene: <<Nyo muhunona wi kadhinarumeedhihiwa wi muZhudewu aandane naari omweeddela muthu a nlogo nimohi. Mbwenye Mulugu ohuginoniha wi gihimwiire muthu di muthu ootakala.#10.28 Peduru onatapulela ele yiiweleliiyemo odheela yooniliiye wi dhinorumeedheya aZhudewu waandana ni athu oode. 29Mwahaya buuyene ngeethaniwe, gihidha kagivaanyile. Dhiinova ginowuukohani: mwagiithanela si ddi?>>

30Korineeliyu ahiiraga: <<Malabo mannayi amundduli wora yowindala, wora ya neethaaru ya ciguwo, miyo gaali vaade vaaga, gilobelaga. Mowaaguva, osogolo waaga ahikumelelaga muthu agawarile dhoowara dhoweela. 31Ogiirela: <Korineeliyu, olobela waawo ohiiwiwa, vano Mulugu ohaakula okamihedha waawo onawiirelesiiwe oorabula. 32Omurume muthu adhowe oZhope amwiithane Simawu, ononiwe ni ndina na Peduru. Oliye onakala vaade va Simawu, namakutha makupa, nyuba yaaye eli waaddamela seresere ya nyaza>. 33Nuwindo, gihirumiha wuwiithana mowaaguva, vano nyo mwihiira pama muhudha. Dhiinova nili va aatene vameentoni va Mulugu wi niiwe madhu maatene Nabwiya yuurumiliiyeni osoriha>>.

34Vevale Peduru wambeela owoga, wiira: <<Dhiinova gihinona wi Mulugu kanna nsakulo! 35Moohiyaniha, dhilabo dhaatedhene ale enamoova yiiragana dhapama enorumeedhiwa wa oliye. 36Ala bi madhu Mulugu yaarumihedhiiye nlogo na Ezarayeli: athu yeere okanna murenddele ni Mulugu odheela mwa Yesu Kirixtu, ola di Nabwiya a athu aatene. 37Nyo muhunona dhedho dheereyile murudda dhaatedhene dha oZhudeya, wambeela oGalileya, agamalile Zhuwawu olaleya obathizo. 38Nyo muhunona dha Yesu a oNazarethi wona Mulugu mwamukuthuleliiye Muneba Woweela ni owodha. Oheedda dhipaddi dhaatedhene eeragana dhapama, aayilihaga aatene alene yarabulihiwa ni Sathana, vowi Mulugu aali ni oliye. 39Hiyo nili anamoona a dhaatedhene dhiiriliiye oZhudeya ni oZheruzalemi. Vano aliwa ompa, omutomeya vamuraddini. 40Nlabo na neethaaru, Mulugu ahimvenyiha muukwani, wiiriha wi ooniwe. 41Kooniwe ni athu aatene, mbwenye wa hiyeeneve anamoona Mulugu yanisakuleliiye, hiyo nijile, ning'wa ni oliye agamvenyihile muukwani. 42Oliye ohunilamula olaleya ni owaraaliha nlogo wi ola di oyene Mulugu omusakuliiye wi akale namathonga a athu ookalawo ni ookwa. 43Wa oliye anamavuhulela aatene enomwiirela onamoona wi odheela mwa ndina naaye aatene enamuroromela enoleveleliwa dhoothega dheewa>>.

44Peduru awogagave madhu alena, Muneba Woweela wahaakitela aatene yeewaga madhu ala. 45Vano oororomela yamveleelege Peduru, aZhudewu owiineliwa yahitikinaga, mwaha teto athu oode yahikuthuleliwa mvahi wa Muneba Woweela; 46vowi yoowawiiwaga ewogaga dhiwogelo dhimohi ni omuthithimiha Mulugu.

Nuwindo, Peduru ahiwogaga, wiira: 47<<Athu ala ehaakela Muneba Woweela wona hiyo. Ohukalavo onaakooddihe wi ehibathiziwe ni mahinje?>> 48Ahilamula wi ebathiziwe mu ndina na Yesu Kirixtu. Nuwindo, yahimuloba wi akale ni aliwa malabo vang'ono.

Currently Selected:

Meerelo a Arumiwi 10: tke

Highlight

Copy