Ruth 4
4
Boaz-gum Tuvaaqasiutigaa Ruth
1Boaz katirviannuŋaruq upkuaqpaum pianiittuamun aasii aquviłłuni. Elimelech-gum nanmiñiq iḷaŋa, Boaz-gum uqallausiġiŋaraŋa, tamaunnaaġman, Boaz-gum ququulagaa, “Qaiñ, avilaitqatiiŋ, aquvittin.” Taimma ullakługu aquvittuq. 2Boaz qaitqurivḷuni qulinik nunaaqqim aullarriŋiññik aquvitqummigaich. Aquvinmata, 3uqallautigaa taamna nanmiñiq iḷani, “Naomi utiġami Moab-miñ tunisukkaa nunaŋa iḷamnuk Elimelech-gum, 4iḷisimaruksrausugnaqtutin. Pigisukkupku tauqsiġuŋ ukua aŋutit takkuanni. Aglaan pigisuŋitkupku, uqallagiñ, qanukkii ilvich sivulliulutin piviqaqtutin tauqsiġukkupku taimaasiiḷi uvamnun tulluni.”
Aŋun uqallaktuq, “Tauqsiġñiaġiga.”
5Boaz uqallaktuq, “Kiami, tauqsiġupku nunaŋa Naomi-miñ tavra taputiniaġiñ Ruth, Moab-miuguruaq uiḷgaġniq, taamna nuna taiptuma aŋutim tuquŋaruam nanmiñiq iḷagiraŋiññiñ piiŋitchumauq.”
6Aŋutim kiugaa, “Tainnainniaqpan qaitkiga iliŋnun tauqsiḷḷasiḷugu nuna, qanukkii uvaŋa miqłiqtuġma piññaktaaġiyumiñaiññiaġaat. Ilvich tauqsiġuŋ; uvaŋa pisuŋitkiga.”
7 #
Dt 25.9. Taimani uvluni, tauqsiqsuaq naagga simmiqsuak sumik suġauttamik nalunaiqsaqługu, pitqusiġiŋagaa tuniriruam mattaqługik aluġutigni qaitchuugaik tauqsiqsuamun. Tainnaġamik Israel-miuguruat nalunaiġaat taamna piraqtik itqanaiqsilaaŋanik.
8Tavraasii aŋutim uqallautigamiuŋ Boaz, “Ilvich tauqsiġuŋ,” mattaŋagaa aluġutini aasii qaił̣ł̣ugu Boaz-mun. 9Tavra Boaz-gum uqallautiŋagai aullarrich allallu tavraniittuat, “Iluqasi qiñiqtusi uvlupak tauqsiqapki Naomi-miñ iluqaisa Elimelech-guvlu iġñiŋiksa Chilion-guvlu Mahlon-guvlu suġauttapayaaŋich. 10#Dt 25.5, 6.Aasiisuli Ruth, Moab-miuguruaq, Mahlon-gum nuliakkaluaŋa, tuvaaqatiliutiniaġiga uvaŋa. Tainnaitpan suġauttat taaptuma tuquŋaruam iḷaŋiñiinniaqtut, kiŋuniġiich nauniaqtut suli aimaaġviqaġutik taimuŋa. Ilivsi iḷisimaraurusi taaptumuŋa uvlupak.”
11 #
Gn 29.31. Aullarriḷḷu allallu tavraniittuat uqallaktut, “Ii, iḷisimarauniaqtugut. Atanġum savagliuŋ tuvaaqatin piusimisun Rachel-mullu Leah-mullu, iñugiaktuanik miqłiqsiruaktun Jacob-mun. Umiallaksaqtutin kiŋuniiŋiññi Ephrath-gum suli qutchigutin iñuŋiññiñ Bethlehem.
12 #
Gn 38.27-30. “Miqłiqtut aitchuutiginiaqtaŋich Atanġum taaptumuuna aġnakun iḷisaġaasi aimaaġviqatauruatun Perez-mun, iġñiġuruaq Judah-mullu Tamar-mullu.”
Boaz-lu Kiŋuniiŋiḷḷu
13Tavraasii Boaz-gum aggisiŋagaa Ruth tuvaaqasiutivlugu. Atanġum ikayuŋagaa aasii siŋaiyauŋaruq aasii iġñiqaqłuni.
14Aġnat uqallautiŋagaat Naomi, “Nanġaġli Ataniq! Ilaan tutaaluksritkaatin aŋutaiyaamik uvlupak nanmiñiq qaunaksriksraġnik. Taamna aŋutaiyaaq qutchikkumauq Israel-mi! 15Paniksrakpich piqpagigaatin, suli piutiłhaaġaatin tallimat malġugniñ iġñiġutigniñ. Uvvasuli tutaaluksriñmigaatiŋ nutaqsaqtiksraŋanik iñuggutikpich suli utuqqaliguvich qaunaksriksraġnik.” 16Naomi-m tiguŋagaa miqłiqtuuraq, iqimmalaaqługu, suli ilaan qaunagiŋagaa.
17Aġnaŋisa taaptuma inaaqqim atchiŋagaat taamna nukatpiaġruk Obed-mik. Uqallautiŋagaich iñupayaat inna, “Aŋutaiyaaq aniruq Naomi-mun!”
Obed aapaġuŋaruq Jesse-mun, aapauruamun David-mun.
18-22Uvva aŋayuqaaġiich Perez-miñ David-mun: Perez, Hezron, Ram, Amminadab, Nahshon, Salmon, Boaz, Obed, Jesse, suli David.
Currently Selected:
Ruth 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)