Ruth 3
3
Ruth Paqittuq Uiksramiñik
1Ikpaksraaġulimman Naomi-mim uqallautigaa Ruth, “Uiksraġnik uvva paqittuksrauruŋa, ilikkulli aimaaġviñikkumautin. 2Itqaumalutin taamna Boaz, aġnanik savaktiqaqtuaq savaqatigiraġnik, iḷagigikpuk. Naalaġniŋŋa. Unnuksraaqpan amma palauvaksrat katagaalatchiñiaġaich. 3Ivvaqsaqtutin, tivraġiksaġutillu, annuġaalluataġlutillu. Taamuŋaqsaqtutin savagvianun, aglaan taamaniitilaaġnik iḷitchuġipkaġnagu niġianigataqtillugu imianigataqtillugulu. 4Sumun nallaqtilaaŋa naipiqtuqsaġiñ aasii siquanikpan uliŋich makpiġḷugich nallaqsaqtutin isigaŋiññun. Uqallautiniaġaatin sutqugumisin.”
5Ruth-gum kiugaa Naomi, “Sutqupayaaġumŋa kamaginiaġikpiñ.”
6Tavraasii Ruth palauvaksrat katagaalatchiviannuŋaruq aasii maliġuaŋagaich aakaruaġmi uqalupayaaŋi. 7Boaz niġianikkamiḷu imianikkamiḷu quviasuŋaruq. Ullakługich palauvaksrat katitat nallaŋaruq siqusaqhuni. Ruth-gum ullaŋagaa siaksruiḷaamik, uliŋich makpiqł̣ugich nallaŋaruq isigaŋiññun. 8Unnuaġruiññakun itiniqłaŋaruq, mumiŋaruq, aasii tupaŋaruq tautukkamiuŋ aġnaq nalaruaq isigamiñi. 9“Kiñailvich?” apiġigaa.
“Ruth uvaŋa, aŋuun,” Ruth-gum kiugaa. “Nanmiñiq iḷagikapkiñ, qaunagiruksraġigiŋma. Tavraasii katinŋa.”
10“Atanġum quviasuusiqsimaaġlisin,” Boaz uqallaktuq. “Qiñiqtitkiñ aŋayuqaaġiiñi piqpakkun akkupak piḷġusikkun aŋiłhaaqługu unnii piḷġusiġñiñ aakaruaġnun. Ivaqłiayumiñaġaluaqhutin nukatpiamik umialguruamik naagga piiḷḷiuġaluaqtuamik tainna ivaqłiaŋiññiqsutin. 11Isumaalugnak, Ruth. Kamaginiaġikpiñ; iñuich maani iluqaġmik iḷisimarut aġnaq ilvich iñugiksilaaġnik. 12#Ruth 2.20.Iḷumun ittuq nanmiñiq iḷautilaamnik iliŋnun suli qaunagiruksraġitilaaġnik uvaŋa, aglaan imma aŋun ittuq iliŋnun iḷaułhaaqtuaq uvamniñ. 13Tavraniittin unnuapak aasii uvlaami iḷitchuġisaġniaqtuguk ilaanun qaunagisugmagaaqpich. Tainna pisukpan suŋitchuq; pisuŋitpan aasii sivuġaani iñuuruam Atanġum unniqsuqłiiruŋa qaunaginiaġniḷutin. Nallaġutin tavraniittin uvlaaġataqtillugu.”
14Tavraasii nalaŋaruq isigaŋiññi, aglaan makinŋaruq qaummaġiksianiŋaiñŋaan tautugnaqsiḷuni qanukkii Boaz-gum iḷitchuġitquŋił̣ł̣ugich iñuich tavraniinŋatilaaŋanik. 15Boaz-gum uqallautigaa, “Qaliġuan piiġḷugu mauŋa isivirruŋ.” Kamagiŋagaa aasii Boaz kuvisiŋaruq palauvaksramik tikitqayaqługu malġukipiaq qulitun (50) uqumaisilaaq aasii ikayuŋagaa kiviŋmauŋ tuiqqaagmiñun. Tavra utiŋaruq inimun nanmakługu. 16Tikiñman aimaaġvigmiñun aakaruaŋata apiqsruġaa, “Qanuq pivich, paniiŋ?”
Ruth-gum quliaqtuaġutiŋagaa Boaz-gum surapayaaŋiññik. 17Ruth uqallavsaaqtuq, “Uqallautiraani utiġniaŋiññivḷuŋa iliŋnun tigumiagiḷaaġluŋa, tavraasii ukuniŋa palauvaksranik aitchuqłuŋa.”
18Naomi-m uqallautigaa, “Aasii qiñuiġutin utaqqiiñ, Ruth, tautugataġlugu qanuq taamna piñiaqtilaaŋa. Boaz aġiuniaŋitchuq uvlupak taamna natqikkaluaġnagu.”
Currently Selected:
Ruth 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)