Psalms 145
145
Nanġautikun Atuun
Aglaaŋa David-gum.
1Kamanaqsiḷiġniaġikpiñ, God-iiŋ, umialiiŋ;
nanġaġlugulu atqiñ taimuŋa isuitchuamun.
2Uvlutuaġaġikpan quyyatiqaġniaqtuŋa iliŋnun;
Nanġaġniaġiga atqiñ taimuŋa isuitchuamun.
3Ataniq kamanaqtuaguruq suli nanġaqtaksraupiaqtuq;
kamanaġniŋa kaŋiqsianignaġumiñaitchuq.
4Kiŋuniġiiksuaguruat nanġaqsimaaġniaġaat savaaġiŋaran kiŋuvaaġillaaramignun;
quliaqtuaġiniaġaich kamanaqtuat savaatin.
5Uqautiginiaġaat kamanaqtuaguniġiñ,
aasii suli isumalaaġutigilugich aliuġnaqtuat savaatin.
6Uqautiginiaġaich suaŋŋatikkun savaatin,
aasii suli uqautigilugu kamanaqtuagutilaan.
7Quliaqtuaġiniaġaat qanutun ilvich nakuuruagutilaan,
atuutigilugulu quviasuunmi nalaunŋaruaguniġiñ.
8Ataniq piqpaksriruq suli nagliktauruq,
qinnaliqsiġiitchuq, siḷvinŋaruġlu nakuaqqunmik.
9Atanġum nakuugutisuugaa kiñapayauraq;
suli nagliktuutiqaqtuq iluqaiññun suliaġiramiñun.
10Iluqaġmiŋ iñuggusiŋaraqpich, Ataniiq, nanġaġniaġaatin,
suli iñugipayaaqtaqpich quyyaviginiaġaatin.
11Uqautiginiaġaat kamanaqtuaguniŋa umialgutikpich
suli quliaqtuaġilugu suaŋŋatin,
12iñupayaurat iḷitchuġuyumagaich suaŋŋatignik savaaġiŋaratin
suli kamanaqtuaq umialgutin.
13Umialgutin taimuŋa isuitchuamun umialgutauruq,
suli umialguniaqtutin iluqaiññun kiŋuvaaġiiksuaguruanun.
Ataniq iḷumun ittuq, unniqsuqłiisipayaani nalautitchuugaich;
nagliktuutiqaqtuq surġaġnipayaamiñi;
14Atanġum ikayuġuugaich iluiḷḷiuqtuat;
suli kiviguugaich kataŋaruat.
15Iñuggutiqapayauraqtuat iliŋnun qiñiġaqtut nigiukłutiŋ,
aasii niqiksritchuugitin niqiqaqtuksraummata.
16Naamapkaġitin
piqaqtiłługich naamaruanik pigiraksraġiraŋiññik iñuggutiqapayaaqtuat.
17Ataniq nalaunŋaruaguruq piḷġusipayauramiñi,
suli nagliktauruq surġausipayaamiñi.
18Ataniq qanittuq iluqaiññun ququularuanun ilaanun,
iluqaiññun ququularuanun iḷumutuuqłutiŋ.
19Piqaqtitchuugaich sunik pigiraksraġiraŋiñik qiksriksrautiqaqtuat ilaanun;
tusaasuugaich qirratiŋich aasii annautivlugich.
20Ilaata munaġisuugaich iluqaisa piqpaksriruat ilaanik,
aglaan suksraunġiġñiaġaich pigiiḷḷiqirauruat.
21Nanġaġuuniaġiga Ataniq ataramik;
Iluqaġmiŋ savaaġiŋaraŋisa nanġaġlirruŋ ilaata atqa isuitchuamun.
Currently Selected:
Psalms 145: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
