Proverbs 22
22
1Nalliagnik piruksrauguvich iluaqtuakun iñuuniaġniġmik naagga umiallakpagniġmik,
iluaqtuakun iñuuniaġniq piuŋ.
2Umialguruavlu piiḷḷiuqtuavlu una atunim pigigaak:
Atanġum iluqaaktun savaaġiŋagaik.
3Isumaturuat iñuich iḷisimaniaġaat iluiḷḷiuġnaqtuaq tikiaruaq aasii nalautchaiḷiñiaġaat
aglaan isumatuitchuam nalautchaaġniaġaa aasii nunuurautigilugu aaqagukpan.
4Kamagisiuŋ Ataniq, qiñuiġḷusi,
aasii suiḷḷiuġniaŋitchusi, nanġausiqaġlusi, suli iñuusiqpaqaġlusi.
5Iñuggutin piqpagigupku,
piisinniaġiñ naniġiaŋiññiñ tigusisuktuat pigiiḷḷiqirauruat apqutiŋiññiñ.
6Iḷisautikkich miqłiqtut iñuuniaġniġmik,
aasii itqaumaniaġaat iñuuniqtutilaamiktun.
7Suiḷḷiuqtuat iñuich kivgaurut umialguruanun.
Maniatchiaġuvich maniatchiaġvikpich kivgaġigaatin.
8Naupkaiguvich piḷuktuanik iluitpaktuat isagutiniaqtut,
aasii nagliksaaqtitchiñiġiñ aġiuniaqtuq.
9Sigñataitchin aasii aitchuqtuutigikkich niqautitin piiḷḷiuqtuanun.
Tainna piguvich ikayuusiaqaġniaqtutin.
10Anitkuvsiuŋ pisaaŋŋatiqaqtuaq,
qapiqsaaġutaiññiaqtuq, qaniġviḷuutaiññiaqtuq, naagga atchiipał̣ł̣uktautaiññiaqtuq.
11Nakuaġiguvsiuŋ salumaruaq uumman suli uqaluqalluataġniq,
umialik avilaitqatiginiaġiñ.
12Atanġum iḷumun ittuaq qaunagisuugaa
piiyaqługich sagluuqtit uqaluŋich.
13Iqiasuuturuat aimmisuurut;
uqaqłutik lion-mun pisaġiniaġnivḷutik anigumik.
14Allatuġniq naniġiatun ittuq—
naniġuugaich Atanġum qinnautiraŋich.
15Miqłiqtut iñuusiġmiŋni iḷałhuyuguurullu, suaqłaayuitchullu
aglaan iqquaqtaqtuni iḷiññiaqtut iluakkuaġniġmik.
16Aitchuiguvich umialguruanun iñugnun naagga piiḷḷiuqtuat piññaktitchaiḷigupkich,
ilvich piiḷḷiuliġñiaġmiutin.
Iñuiññaq Qulit (30) Isumattutit
17Atta, iḷisautiniaġikpiñ isumaturuat uqaluŋiññik. Iḷisakkich iḷisaurrutiŋich, 18aasii quyaniaqtutin itqaumagupkich suli uqausiġiḷḷagupkich. 19Ukpiqqutiqaqugikpiñ Ataniġmun; tainnamik uqautigisukkitka ilignun akkupak. 20Aglaŋaruŋa iñuiññaq qulit (30) uqaluŋnik piksraġnik. Iḷisimmataurut suli nakuurut siḷġiqsuutit, 21suli iḷisautiniaġaatin iḷumutupiaq ittuamik. Tavraasii ivaqłiġiaqtitpatin iḷumun ittuamik, utiġniaqtutin iluaqtuamik kiggutiksraġnik.
-1-
22Aŋalamaqługnagi piiḷḷiuqtuat piḷḷanivaiḷḷutin;
aŋalamaqługnagi uqaqsitaaġvigmiittuat qanuġumiñaił̣ł̣utik.
23Ataniq uqaqtiginiaġaat aasii suli sivuuġasaaġniaġaich
ilaan sivuuġasaaqparruŋ iñuggutaa.
-2-
24Avilaitqasiutinak iñugnun qinnaliyaruanun.
25Iḷitpiaqtutin piḷġusiŋiññik aasii allaŋŋuyuitkaksiḷutin.
-3-
26Unniqsuqłiiñak allam iñuum akiiḷaŋa ilvich piñiaġniḷugu.
27Akiḷiġumiñaitkupku,
piññaktaaġiniaġaich tuŋiutitin unnii.
-4-
28Nuunniaġnagu nunakpich nalunaiñŋutaŋa
kiŋuniiqpich iḷiŋaraŋat.
-5-
29Qiñiqtinŋa savagluataġuuruamik,
aasiiḷi qiñiqtinniaġikpiñ piḷḷuatałhaaġuuruamik iñugiaktuaniñ suli aquppiqatauyumiñaqtuamun umialignun.
Currently Selected:
Proverbs 22: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
