Proverbs 19
19
1Iluałhaaqtuq suiḷḷiuġniq pitqiksiġautaiḷḷuni
saglutuluni isumalluaġiiññiġmiñ.
2Suyummaqtuniq nalugaluallaġmi iluaŋitchuq;
qiñuisaaŋitkuvich iłuiḷḷiuġunmun tikiññiaqtutin.
3Iñuich iḷaŋich inmignun maqutchuurut pimaqłuktautimiksigun
aasii taimma pasivḷugu Ataniq.
4Suġalliruat iñuich avilaitqataukkaġuurut,
aglaan suiḷḷiuqtuam avilaitqataiḷḷiuġuuruq.
5Sagluuġuvich uqaqsitaaġvigmi, tatavsaqtauniaqtutin—
qimagviksraitchuq.
6Iluqatiŋ iñuich iviġaumagitqusuurut nuimaruanun iñugnun;
iluqatiŋ iñuich avilaitqatausuguurut iñugnun ikayuisuuruanun.
7Nanmiñiqunnii iḷauruat piiḷḷiutuamun suliqutigisuitkaat;
avilaitqataitkaluaqtuġluuna. Pisuqtilaaġaluaġami, avilaitqatinnayuitchuq.
8Iliŋnun ikayuġukkuvich iḷisaġiñ pisuqtilaaqtun;
itqaumalugich iḷisaapayaatin aasii piḷḷuataġniaqtutin.
9Kiñaliqaa sagluuqtuaq uqaqsitaaġvigmi tatavsaunmiñ qimagviksraitchuq;
suksraunġiqsauruq.
10Isumalluaġiitchuat iñuuniaqtuksrauŋitkaluaqtut suiḷḷiuŋiḷḷutik,
suli kivgat umialguruksrauŋitkaluaġmiut atanġuruanun.
11Isumatuguvich piavsaktayuiññiaqtutin.
Iñuum aŋalamaqłukpatin, ilvich piḷġusiġiksutin suliqutigiŋitkupku.
12Umialgum qinnautaa ittuq ugiallaqpaktuatun lion-tun,
aglaan iviġaummataa ittuq uġġuksraatun ivigaani.
13Isumalluaġiitchuat miqłiqtut maqullagaich aŋayuqaatik.
Qaniġviḷusuŋaiññaġniŋa tuvaaqatauruam kusiqsuasuŋaiññaqtuatun ittuq.
14Aŋun kiŋuvaannakkumiñaqtuq iglumiglu manigñiglu aŋayuqaamiñiñ,
aglaan Atanġum kisimi piññaktillagaa isumaturuamik tuvaaqatiksraŋanik.
15Iqiasuktuaġiñ;
siñikpauraaġiñ, aglaan kaaksiuliġñiaqtutin.
16Kamagikkich God-im pitquraŋich aasii iñuusugrugniaqtutin;
suliqutigiŋitkupkich, tuquniaqtutin.
17Aitchuiguvich piiḷḷiuqtuamun, atukkitchiruatun Ataniġmun ittuq,
aasii Atanġum utiqtitchiñiaġaatin.
18Iḷisautikkich iluaqtuakun miqłiqtutin iḷitchiḷḷaŋŋaisa.
Iḷisautiŋitkupki, ikayuutaurutin inmignun maqunniŋannun.
19Iñuk piavsayakpan, igḷutuġligich aquvaaksraŋich.
Ikayutuaġupku pimaqłuktautiŋiññiñ, tainnasuŋaiññaq piruksrauniaqtutin.
20Naalaġnigupkich siḷġiqsuutauruat suli iḷitchiyummatiqaġlutin,
uvlut iḷaŋanni isumatusiñiaqtutin.
21Iñuich sivunniuġniaġaluaqtut uumatimigñiñ qanusiḷimaanik,
aglaan Atanġum pisuutaa nalautinniaqtuq.
22Kanŋunaqtuq suqaġummaqtuniq;
suiḷḷiuqtuat iñuich iluałhaaqtut sagluturuaniñ.
23Qiksiksrautiqaġniq Ataniġmun apqutauruq iñuggunmun,
tutqiutiqaġniaqtutin anayanniuŋiḷḷutillu.
24Iñuich iḷaŋich iqiasuuvaił̣ł̣utik
iqiagigaatunnii niġiñiaġniq.
25Arguaŋŋan tatavsautiqaqtuksraugaluaqtuq, iñuich naluruat iluaqtuamik iḷitchiyumaut.
Isumatuguvich iḷitchiñiaqtutin siḷġiqsuutiniñ.
26Kisian kanŋunaqtuam
iñugiił̣ł̣uni aŋalamaqługniaġaa aapani naaggaunnii anillugu aakani iglumiñiñ.
27Miqłiqtuuŋ, naalagniŋaiġuvich iḷisaaksranik,
sugiŋaiġñiaġitin iḷisimaaniktatin.
28Piġiitchuaq ilisimarauruaq kipakłiġuuruq nalaunŋaruamik,
pigiiḷḷiqiruam qaniŋa iisuugaa piḷuun.
29Inmiñun qutchigivluni
isumalluaġiitchuaq iñuk piyuktauniaqtuq.
Currently Selected:
Proverbs 19: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
