Matthew 19
19
Jesus Iḷisaurriruq Avinnikun
(Mark 10.1-12)
1Tavra Jesus uqaŋaiqami tamatkuniŋa, aullaŋaruq Galilee-miñ aasii tikił̣ł̣uni nunaaqqiŋiñun Judea-m taavanitchiani kuugum Jordan. 2Tavra iñugiaktuat iñusalaich maliġuaŋagaat, aasii ilaan iłuaqsiŋagai naŋittuat tamaani.
3Tavra Pharisees ullaŋagaat aasii uuktuaqsaqługu apiġivlugu, Nalaunŋava pitquratigun iñuum nuliani avitpagu sumigliqaa patchisiqaġlugu? 4#Gn 1.27; 5.2.Jesus kiuŋagai, Taiguaġiŋaitpisiuŋ aullaqisaami iññiruamun taapkuŋniŋa savaŋatilaaŋa aŋunmiglu aġnamiglu? 5#Gn 2.24.Aasii uqallakłuni, Taamna pisigivlugu, aŋutim qimaguugik aapaniḷu aakaniḷu aasii nayuqsiutivlugu nuliani. Tavra iliŋik malġuuruak atautchisun iñuktun iḷiñiaqtuk. 6Tavraŋŋaaglaan malġuuŋaiqsuk aglaan atausiŋŋuqtuk. Taamna pisigilugu, iñuum avinŋaiḷḷiuŋ tuvaaqatini God-im atautchimuktinŋammatik. 7#Dt 24.1-4; Mt 5.31.Pharisees uqallautiŋagaat, Moses suŋiññiŋagaa iñuk makpiġaamun aglagluni nalupqinaiġutinik avirrusiuqpan, aasii aullaqtillugu nuliani. 8Jesus kiuŋagai, Pisigivlugu iḷisautitchiġiiññiqsi Moses avillayumiñaqtinŋagaasi nuliavsiññiñ. Aglaan isuaniñqaŋa tainnainŋaitkaluaqtuq. 9#Mt 5.32; 1 Co 7.10, 11.Aasii uqallautigivsi, kialiqaa avirrusiġumiuŋ aġnaqtiŋ, allatuŋisuaqpan, aasii tuvaaqasiġḷuni allamik aġnamik allatuqtuaguruq.
10Iḷitchitqurat uqallautiŋagaat, Tainna aŋun sivuniqaġniqpan tuvaaqanmigun, iłuałhaaġniqsuq tuvaaqatiniŋitchuni. 11Tavrali ilaan uqallautiŋagai, Taamna iḷisaurrun tamatkiġḷugich aŋutit sivuniqaŋitchuq, aglaan tamatkunuŋa God-im ikayukkaŋiñun iñuuyumiñaqsivḷugich taavrumuuna iḷisaurrutikun. 12Qanuq aŋutiqaqtuq aniŋavlutiŋ tainna tuvaaqasiġumiñaitchuanik, suli aŋutiqaġmiuq tuvaaqatinikkumiñaiyakkaŋiññik iñuich, aasiisuli aŋutiqaġmivḷuni tuvaaqatinikkumiñaiyaŋaruanik inmiŋnik savautisukługu taamna qiḷaŋmiittuaq. Iñuum akuqtuiyumiñaqtuam taavrumiŋa, akuqtuġliuŋ taamna iḷisaurrun.
Jesus Aŋaiyyutigai Miqłiqtuurat
(Mark 10.13-16; Luke 18.15-17)
13Tavrani iñuich iḷaŋich qaġġirriŋarut miqłiqtunik Jesus-mun iḷitquvlugich argaŋi ilaiññun aŋaiyyutilugiḷḷu. Iḷitchitqurat suaŋagaich iñuich qaġġirriruat. 14Tavra Jesus uqallaŋaruq, Miqłiqtuurat qaipkaqsigik uvamnun, suli pitquŋiññagich. Qanuq tainnaiḷiŋaruat atanniqsimagai Taavruma qiḷaŋmiittuam. 15Tavraasii ilaan aksiukługich aŋaiyyutiqqaaqługich miqłiqtuurat, aullaŋaruq.
Suġalliruaq Nukatpiaq Iñuk
(Mark 10.17-31; Luke 18.18-30)
16Tavra iñuk ullautiŋaruq Jesus-mun uqaqłuni, Iḷisaurrii, sumik savaalluatamik piruksrauvik isuitchuamik iñuggutinnagugluŋa? 17Tavra Jesus uqallautiŋagaa, Summan apiġiviŋa sum nakuutilaaŋanik? Atausiuruq nakuuruaq. Iñuusarraqsisukkuvich kamagikkich God-im pitquraŋi. 18#Ex 20.13; Dt 5.17; Ex 20.14; Dt 5.18; Ex 20.15; Dt 5.19; Ex 20.16; Dt 5.20.Nukatpiam apiġiŋagaa, Nalliŋich? Tavra Jesus uqallaŋaruq, iñuaġnak, allatuġnak, tigliŋnak, saglutiginnignak, 19#Ex 20.12; Dt 5.16; Lv 19.18.suuŋiḷaġinagik aapallu aakallu, suli piviuttaġilugu siḷalliñ iliktun iḷiḷugu. 20Nukatpiaq uqallaŋaruq ilaanun, Tamatkua pitqurat iluqaisa kamagiŋagitka. Sumik minitchivik? 21Jesus uqallautiŋagaa, Inuqsraŋaitchupiaġuvich, aullaġiñ, tunikkich supayaat pisin, aasii aitchuutigilugich maniich iḷiappauruanun, tavra piiḷḷiuġniaŋitchutin qiḷaŋmi. Aasii qaiḷutin, maliŋŋa. 22Nukatpiam tusaakamiuŋ taamna, aullaŋaruq ipiqtutchakpakłuni, qanuq iñugiaktuanik suġaliqaŋaruq.
23Tavra Jesus uqallautiŋagai iḷitchitqurani, Iḷumun uqallautigivsi. Qanutun siġḷiġnaqtigiruq suġalliruam isiġniaġniksraŋa atanniqsimavianun Taavruma qiḷaŋmiittuam. 24Uqallautivsaaġivsi, siġḷiġnaił̣haaqtuq pikukturuaq kakakti isiqpan mitqutim iraagun, suġalliruam isiġniksraŋaniñ atanniqsimavianun God-im. 25Iḷitchitqurat tusaakamirruŋ taamna atqunaqłutiŋ qaallaŋarut uqaqłutiŋ, Kiñaasii annaurrauniaġniqpa? 26Tavra Jesus qiviaŋagai aasii uqallautivlugich, Iñuich taamna piyumiñaitkaluaġaat, aglaan God supayaanik piḷḷaruq.
27Tavra Peter uqallaŋaruq, Uvva uvagut qimaiŋarugut supayaanik aasii maliġuaqłutin. Sumik aasii piññagniaqpisa? 28#Mt 25.31; Lk 22.30.Jesus uqallautiŋagai, Iḷumun uqallautigivsi. Nunatchiami, Iġñiŋa Iñuum aquvitpan kamanaqtuanun umialgum aquppiutaŋiñun, ilivsi iḷitchitqurat maliġuaŋaruasii uvamnik aquppiñiaġmiusi qulit malġugni umialgich aquppiutaŋiññi, isivġiġḷugich qulit malġugnik maŋŋuqaqtuat Israel. 29Suli kiñaliqaa qimaiŋaruaq iglunik naagga aniqatiinik naagga aapamiñik aakamiñiglu naagga miqłiqtunik naagga nunamiñik pisigiluŋa, aitchuusiaqaġniaqtuq tallimakipiaġuġlugu, suli kiŋuvaannagluni iñuggunmik isuitchuamik. 30#Mt 20.16; Lk 13.30.Aglaan qaunagisitchi. Tamatkua salliuniataktuat paŋmapak qamalliġuurrauniaqtut taimanigu, aasii qamalliuruat salliġuutilutiŋ.
Currently Selected:
Matthew 19: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
