Matthew 18
18
Kiña Kamanaġniqsrauva?
(Mark 9.33-37; Luke 9.46-48)
1 #
Lk 22.24. Tavra tavrani iḷitchitqurat ullautiŋarut Jesus-mun, apiqsrivḷutiŋ, Kiña kamanaġniqsrauva atanniqsimaviani Taavruma qiḷaŋmiittuam? 2Tavra Jesus tuksiaqługu inmiñun miqłiqtuuraq inillaŋagaa qitqannun, 3#Mk 10.15; Lk 18.17.aasii uqallakłuni, Iḷumun uqallautigivsi, ilivsi isumalitqiŋisuaġuvsi aasii iḷiḷusi miqłiqtutun, sumikunnii isiġumiñaitchusi atanniqsimavianun Taavruma qiḷaŋmiittuam. 4Kiñaliqaa kamanaqsiḷiŋaiġumi inmiñik uuma miqłiqtum irrusiatun iḷiḷuni ilaa kamanaġniqsrauruq atanniqsimaviani Taavruma qiḷaŋmiittuam. 5Iñuum paġlakpauŋ miqłiqtuuraq uvaŋa pisigiluŋa, uvaŋa paġlagaaŋa.
Piḷuksipkaqtinniaġutit
(Mark 9.42-48; Luke 17.1-2)
6Kialiqaa ukpiġutaiqsitpagu iḷaŋat makua miqłiqtuuratun iḷivḷutiŋ ukpiqtuat uvamnun, iłuałhaaġayaqtuq uyaġagruaġmik quŋusiġutchiġḷugu ipipkaqpan itiniŋanun taġium. 7Qanutun naglignaqtigirut nunam iñuŋi ukpiġutaiqsitchiruat iñuŋnik. Tainnainniaġniqsuq ataramik, aglaan qanutun naglignaqtigiruq ukpiġutaiqsitchiruaq iñuŋnik.
8 #
Mt 5.30. Tavra argavsi naagga isigavsi piḷuksipkaqpasi, iñuusitchi argaiqsuatun naagga isigaiqsuatun piḷusi. Iłuałhaaġayaqtuq isiġuvsi atanniqsimavianun God-im argaiḷḷusiunnii naagga isiġaiḷḷusi piqaġniġmiñ iluqaaktun argaqaġlusi isigaqaġlusiḷu igitauniġmiñ isuitchuamun igniġmun. 9#Mt 5.29.Suli irivsi piḷuksipkaqpasi, iñuusitchi iraiqsuatun piḷusi. Iłuałhaaġayaqtuq isiġuvsi atanniqsimavianun God-im atautchimik iriqaġlusi malġugnik iriqaġluni igitauniġmiñ nagliksaaġvium igniŋanun.
Uuktuun Tammaŋaruakun Imnaikun
(Luke 15.3-7)
10 #
Lk 19.10. Qaunagisitchi suuŋiḷaġitchaiḷisiuŋ atausiqunnii makua iḷaŋat miqłiqtutun iḷivḷuni ukpiqtuaguruaq uvamnun. Qanuq uqallautigivsi, qiḷaŋmi isaġuliŋich qakuguliqaa ullautillarut Aapamnun qiḷaŋmiittuamun. 11[Qanuq Iġñiŋa Iñuum qaiŋaruq annautiyaqtuqługich tammaŋaruat.]
12Qanuq isumavisi? Iñuk tallimakipiamik imnaiqaġumi, aasii iḷaŋat tammaġluni, qimagniaŋitpagich tallimakipiaġuutaitchuat qimialuŋnun aasii ivaaqsiḷugu atausiq tammaqtuaq imnaiq? 13Iḷumun uqallautigivsi, paqitkumiuŋ ilaa quviasuuttaqałhaaqtuq taavrumuŋa atautchimun imnaimun ukunaŋŋa tallimakipiaġuutaitchuaniñ imnaiñiñ tammaŋaitchuaniñ. 14Tavra pisuutigiŋitkaa Aapavsi qiḷaŋmiittuam atausiqunnii iḷaŋat makua miqłiqtutun iḷivḷutiŋ ukpiliŋaruat tammaqulugu.
Aniqan Piḷuksiruaq Iliŋnun
15 #
Lk 17.3. Aniqatin piḷuksikpan iliŋnun kisivich ullaglugu uqallauttuuŋ pimaqłuutaanik, ilipkullu ilaagullu. Naalaġnikpatin atisiqatigilutin utiqtitqikkiñ aniqatin. 16#Dt 19.15.Aglaan atisiqatigisuŋitpatin, ullatqikkumagiñ piqasiġḷutin atautchimik naagga malġugnik iñuŋnik iḷisimaruksragnik sunik uqautiŋnik ilaanun. Tainna piguvich, kamaksriñiaqtutin pitquranik uqaluqaqtuanik inna, “Pasikkutipayaaq ukpiġnaqsiñiaqtuq iḷumun itilaaŋanik malġugnik naagga piŋasunik iḷisimariqaġluni.” 17Naalaġnisuŋiḷgitpan, quliaqtuaġili aŋaiyyuliqiruanun, aasii naalaġnisuŋiḷgitpan aŋaiyyuliqiruanik iḷiuqsiuŋ aunniuġutiŋaisavsisun katitchiritullu tax-iñik.
Piñaiḷat Piñaqtuallu
18 #
Mt 16.19; Jn 20.23. Iḷumun uqallautigivsi, sunapayaaq piñaisitaqsi nunami piñaisinniaġmigaa Taavruma qiḷaŋmiittuam. Suli sunaliqaa pipkallakkaqsi nunami pipkallaniaġmigaa Taavruma qiḷaŋmiittuam. 19Uqallautivsaaġivsi, atisiḷutik malġuulutik sunapayaaq nunami apiqsriaġiguptitku aŋaiyyulutik, pipkaġniaġaa iliptiŋnun Aapama qiḷaŋmiittuam. 20Qanuq sumun malġuk naagga piŋasut katinmata pisigivluŋa, tavraniinmiuŋa piqatigivlugich.
Uuktuun Suliqutigiŋaiksiŋitchuakun Kivgakun
21 #
Lk 17.3, 4. Tavrani Peter ullautiŋaruq Jesus-mun aasii apiġivlugu, Ataniiq, qavsiiqsuaġlugu suliqutigiŋaiġñiaqpigu itqaumayumiñaiġḷugich piḷuksigaluamiiqpan aniqatiga uvamnun? Tallimat malġuiqsuaġlugu? 22#Gn 4.24.Jesus kiuŋagaa, Naumi, tallimat malġuŋiḷaaŋni, aglaan qanutupayauraq suliqutigiŋaigaksraukpan. 23Tavra inna ittuq atanniqsimmataa qiḷaŋmiittuam iñuŋnun. Umialiktun ittuq piyummatiniktuatun iłuaqsruisukłuni akiiḷaŋiññik kivgami. 24Makpiġarriqisaaniŋman, iñuk qaġġirrauŋaruq ilaanun akiiḷaqtuqpauraqtuaq maniŋñik. 25Tavra akiḷiiyumiñaiñman, atanġata tunirautquŋagaa, piqatigilugich nuliaŋalu miqłiqtuŋiḷu supayaallu pigikkaŋi, aasii akiḷiutigilugich akiiḷaŋiñun. 26Tavra kivgam sitquqami qiññuaqtulavigiaqsiŋagaa, Ataniiq, qiñuirrutiqallagiñ uvamnun, akiḷiiviginiaġikpiñ iluqaiññik akiiḷamnik. 27Tavra naglikkiagutivlugu atanġata aullaqtitkaa suliqutigiŋaiqł̣ugich akiiḷaŋi.
28Tavraliasii taamna kivgaq, anisaġniallaġmi, kasuġniġaa iḷaŋat kivgauqatimi akiiḷałauraqtuaq inmiñiñ maniŋñik, aasii tigguġlukamiuŋ nunuiñiaqsautigillaan uqallautivlugu, Akiḷiigiñ akiiḷaġnik uvamnun. 29Tavra kivgauqataa punŋaruq aasii qiññulaaqsivḷugu, Qiñuirrutiqaġiñ uvamnun, akiḷiiviginiaġikpiñ. 30Tavra tainna pisuŋiñŋaruq aasii aullautivlugu isiŋagaa tigutaaġviŋmun akiḷiitchiaġisaqługu akiiḷaŋiñik. 31Allat kivgauqatiŋisa iḷitchuġikamirruŋ piruaq taavrumiŋa, atqunaq iłuiḷḷiuġutigiŋagaat, aasii aullaqłutiŋ quliaqtuaġutivlugu ataniqtiŋ taavrumiŋa iluqaanik piruamik. 32Tavra atanġata qaitquŋagaa taamna kivgaq aasii uqallautivlugu, Ilivich piḷuktuatiin kivgaaq. Suliqutigiŋaiŋagikpiñ iluqaanik taavrumiŋa akiiḷaqpauraġnik qanuq iŋiulakamŋa. 33Tainnatulli naglikkutiqaqtuksrauŋagaluaqtutin kivgauqatiŋnun, uvaptun naglikkutiqaŋaruatun iliŋnun. 34Tavra qinnautivlugu atanġata aitchuutigiŋagaa tigutaaqtaliqirinun tatavsaqtautquvlugu akiḷiitchiaġisaqługu iluqaiññik akiiḷaŋiñik. 35Tasamma tainnatuttauq Aapama qiḷaŋmiittuam piñiaġmigaasi iluqasi, ilivsi iḷumutun suliqutigiŋaiḷaitkuvsiuŋ itqaumayumiñaiġḷugu aniqativsi piḷuutaa ilivsiññun.
Currently Selected:
Matthew 18: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
