Matthew 14
14
John Paptaiqsi Tuqutauruq
(Mark 6.14-29; Luke 9.7-9)
1Tavrani Herod atanaurauruaq Galilee-mi, tusaakami kamanautaanik Jesus, 2ilaa uqallaŋaruq kivgamiñun, Ammaamna John Paptaiqsi piuq, aŋiŋaruq tuqqunmiñ. Taamnauvva pisigivlugu savallaruq tamatkuniŋa aliuġnaqtuanik. 3#Lk 3.19, 20.Qanuq Herod-gum tigupkaŋagaa John aasii qiḷiqsruipkaqługu isiqługu tigutaaġviŋmun, pisigivlugu Herodias, aniqanmi Philip nuliaŋa. 4#Lv 18.16; 20.21.John Paptaiqsim Herod uqallautigaluamiiŋagaa, nalaunŋaitchuq ilivich tuvaaqasiutigupku aniqarvich nuliaŋa. 5Tavra ilaan tuqutchukkaluaġmivḷugulu sivuuġagiŋagai iñuich, qanuq ilaisa uqaqtigiruaġiŋagaat God-mun.
6Tavra Herod annivia tikiñman, pania Herodias kanaakkiuŋaruq sivuġaanni tuyuġmiami, aasii iviġaŋagaa Herod. 7Tavraasii ilaa unniqsuqłiiŋaruq nalupqinaiqł̣ugu aitchuġniaġnivḷugu supayaamik apiqsrisukpan. 8Pisuksaaqtiqaqłuni aakamiñik, niviaqsiaq uqallaŋaruq, Aitchuŋŋa niaquanik John Paptaiqsim uumuŋa puggutauramun ikilugu. 9Tavra umialik isumaaliŋaruq. Aglaan pisigivlugich nalupqinaiqł̣ugu unniqsuqłiisini sivuġaanni tuyuġmiami, ilaa piraksriiŋaruq aitchuutigitquvlugu apiqsriaŋa. 10Herod tilisiŋaruq aasii niaquiqsiłługu John tigutaaġviŋmi. 11Tavra ilaan niaqua qaġġisiŋagaat puggutauramun aasii aitchuutigivlugu niviaqsiamun, aasiiḷi ilaan qaġġisivlugu aakamiñun. 12Tavra John iḷitchitquraŋisa qaivḷutiŋ piŋagaat timaa aasii iḷuviqługu. Aasii aullaqłutiŋ quliaqtuaġutiŋagaat Jesus.
Jesus Niġipkaġai 5,000 Iñuich
(Mark 6.30-44; Luke 9.10-17; John 6.1-14)
13Tavra Jesus tusaakamiuŋ taamna, ilaa aullaŋaruq tamaaŋŋa umiaqpaurakun iñuił̣aamun kisimġiuġukłuni. Tavra iñusalaich tusaakamirruŋ, maliŋagaat pisukataqłutiŋ nunaaqqiñiñ. 14Tavra tulagniallaġmiŋ ilaan tautuŋagai iñusalaich, aasii nagliksratchaŋaruq ilaiññik, aasii iłuaqsiŋagai naŋittuaŋich.
15Unnuksraaġman, iḷitchitqurat ullakługu uqallautiŋagaat, Iñuił̣aaq marra manna ini, unnuagaqsimmivḷuni, aullaqtitkich iñusalaich nunaaqqiñun tauqsiġumaut niqiksramiŋnik. 16Jesus uqallaŋaruq, Aullaŋitkumikunnii suŋitchut, ilivsi aitchuqsigik sunik niqiksraŋiññik. 17Ilaisa uqallautiŋagaat, Tallimanik punniġutiqaqsiññaqtugut malġugniglu iqalluŋnik. 18Jesus uqallautiŋagai, Qaġġisisigik uvamnun. 19Tavra ilaan piraksriŋagai iñusalaich aquvitquvlugich iviŋnun, aasii tiguvlugich tallimat punniġich malġuglu iqalluk aaġluŋaruq qiḷaŋmun, aasii quyyavigivlugu God. Tavraasii avguqługich aitchuutigiŋagai punniġich iḷitchitquranun, aasiiḷi iḷitchitqurat aitchuutigivlugich iñusalaŋnun. 20Tavra iluqaġmiŋ niġiŋarut pisuġuiqsuaqłutiŋ. Aasii iḷitchitqurat katitchiŋarut qulit malġugnik aguummagnik siḷiviłługich avguanik iḷakunik. 21Aasii taapkua niġiruat 5,000 aŋutit itpalliŋarut, kisitqatigigaluaġnagich aġnat miqłiqtullu.
Jesus Pisuaqtuq Immam Qaaŋagun
(Mark 6.45-52; John 6.15-21)
22Tavra iḷitchitqurani ikipkaŋagai umiaqpauramun aasii ayusaqtiłługich sivumiñi ikaanmun, Jesus aullaqtitchiñiaqłuni iñusalagnik. 23Tavra aullaqtitanikamigich iñusalaich, ilaa mayuŋaruq qimialuŋnun kisimi aŋaiyyuyaqtuqłuni. Tanuġaksimman, Jesus tavraniinŋaruq kisimi. 24Tavrali umiaqpauraq ayuuŋaruq nunamiñ qaggiuqłutiŋ, anuġim arguġiannaġuutivlugich. 25Tavra uvluyasimman, Jesus ullaŋagai iḷitchitqurani pisuaqłuni immam qaaŋagun. 26Tavra iḷitchitqurat tautukamirruŋ pisuaqtuaq immam qaaŋagun, iqsitchaŋarut uqaqłutiŋ, Ilitqusiq marra. Tavra nipaalaŋarut iqsialavlutiŋ. 27Tavra tavrauvvaa ilaan uqallautiŋagai, quviatchaktitausitchi. Uvaŋauruŋa. Iqsiñasi. 28Tavra Peter-m kiuŋagaa, Ataniiq, iliviupiaġuvich tuksiŋŋa iliŋnun qaitquluŋa immakun. 29Jesus kiuŋagaa, Qaiñ. Tavra Peter niuŋaruq umiaqpauramiñ aasii pisuaqłuni immam qaaŋagun ullaŋagaa Jesus. 30Aglaan iḷitchuġikami anuġimik naŋialiŋaruq, aasii kivisaaqsiruiññaqami nipaalaŋaruq, Ataniiq annautiŋŋa. 31Jesus tavrauvvaa isaaŋagai argagni aasii tiguvlugu, uqallautivlugu, Ilivich ukpiġutikitchuatiin. Summan nalupqisukpich? 32Tavra ikimmagnik umiaqpauramun anuġaiŋaruq. 33Aasii taapkua umiaqpauramiittuat sitquġvigiŋagaat kamanniuġvigivlugu uqaqłutiŋ, Iḷumun Iġñiġigaatin God-im.
Jesus Iłuaqsigai Naŋittuat Gennesaret-mi
(Mark 6.53-56)
34Tavra ikaaqamiŋ, nunaliñŋarut Gennesaret-mun. 35Tavra iñuŋi taavruma nunam iḷisaqsrikamiŋ ilaanik, tilisiŋarut uqaluŋmik nunaaqqipayauranun aasii qaġġisivlugich naŋirrutiqapayauraqtuat Jesus-mun, 36apiġipiaqługu aksiḷḷagniaqsiññaġukługuunnii siñiġutaa annuġaaŋan. Aasii iñugiaktilaamiktun aksiutiruat iłuaqsirauŋarut.
Currently Selected:
Matthew 14: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
