Leviticus 27
27
Pitqurat Ataniġmun Aitchuutitigun
1Atanġum uqallautiŋagaa Moses 2ukuniŋa maliġiraksraŋiñik Israel-gum kiŋuvaaŋisa. Nalliqsi qaisauŋakpan Ataniġmun taŋŋiqsaġlugu ilaaguaŋaruaq unniqsuqłiiñ, atanġiqsitauyumiñaqtusi akiḷiiḷusi ukunatun aktigiruanik manigñik, 3-7maliġilugu inillaŋaruaq uuktuun:
qatqiñŋaruaq aŋun, ukiuqaqtuaq iñuiññamiñ (20) piŋasukipiamuaglaan (60): malġukipiaq qulinik (50) aviktanik qatiqtuanik manigñik;
qatqiñŋaruaq aġnaq: iñuiññaq qulinik (30) aviktanik qatiqtuanik manigñik;
qatqiñŋaitchuaq aŋun, tallimaniñ iñuiññamuaglaan (20) ukiuqtutigiruaq: iñuiññanik (20) aviktanik qatiqtuanik manigñik;
qatqiñŋaitchuaq aġnaq: qulinik aviktanik qatiqtuanik manigñik;
miqłiqtuq aŋutaiyaaq tallimatun ukiuniŋaitchuaq: tallimanik aviktanik qatiqtuanik manigñik;
miqłiqtuq aġnaiyaaq: piŋasunik aviktanik qatiqtuanik manigñik;
aŋun ukiuqtutilaaqaqtuaq qaaŋiqł̣ugu piŋasukipiaq (60): akimianik (15) aviktanik qatiqtuanik manigñik;
aġnaq ukiuqtutilaaqaqtuaq piŋasukipiaq (60) qaaŋiqł̣ugu: qulinik aviktanik qatiqtuanik manigñik.
8Nalliqsi unniqsuqłiiŋakpan aasii piiḷḷiuqpaiḷḷuni akiḷiġumiñaitpagu inillaŋaruaq akiksraq, taamna iñuk aŋaiyyuliqsiqpagmuutigisigiksi, aasii aŋaiyyuliqsiqpaum akikłiḷaaġutiniaġaa, akiḷiġumiñaqtaŋatun.
9Unniqsuqłiisiksi niġrutikun aitchuutauyumiñaqtuaguluni Ataniġmun itpan, tavra aitchuutipayaaq qaisauruaq Ataniġmun salumaruaguruq, 10aasii allamik niġrunmik simmausiġñiaŋitkiksi. Tainna piñiġuvsi, iluqatik niġrutik pigigaik ilaata Atanġum. 11Aglaan unniqsuqłiiŋamaguvsi salumaitchuamik niġrunmik, akuqtuġnaġumiñaitchuamik aitchuutauniaqpan Ataniġmun, aŋaiyyuliqsiqpagmuutisaġiksi. 12Aŋaiyyuliqsiqpaum akiksriġñiaġaa, irrusiagun nakuuruaŋisigullu naakka pigiiññiŋisigullu, aasii akiksriqpagu qanutun tavra akiginiaġaa. 13Tauqsitqigugniġupku, akiḷiqsaksraġigiñ akiŋa naggusiġḷugu tallimaŋatun.
14Nallivsi igluni qaisaġiniqpagu Ataniġmun, aŋaiyyuliqsiqpaum akiksriġñiaġaa qanuqitilaaqqaaġlugu iglu, akiksriutaa aŋaiyyuliqsiqpaum akiginiaġaa. 15Tasuġugniġupku iglun, akiḷiqsaksraġigiñ akiŋa naggusiġḷugu tallimaŋatun.
16Nallivsi qaisaġiniqpauŋ iḷaŋa nunami Ataniġmun, akiksriġñiaġaat iñugiaktilaaŋisitun kanġaqsruutimiŋ nautchirriikamiŋ, akisutigilugu akiŋatun atausim bushel-gum barley-m qulitun qatiqtuatun maniktun. #27.16 barley seeds 17Aitchuutigiguvsiuŋ nuna Ukiuŋa Utiqtitchivium qaaŋiġḷuqqaaqtuq, akiksrautaa allaŋŋuġniaŋitchuq. 18Aitchuutigiguvsiuŋ aquvatigun, aŋaiyyuliqsiqpaum miksrautchaġniaġaa akiksraŋa qavsiutilaaqqaaġlugich ukiut tikiññiaqtuat Ukiuŋanun Utiqtitchivium, aasii akikłiḷaaġlugu. 19Tauqsitqigugniġuvsiuŋ nautchiiviksi, akiḷiqtuksraġigiksi akiŋagun iḷavsaaġlugu tallimaŋatun. 20Tuniguvsiuŋ nunaksi allamun iñugmun tauqsitqikkaluaġnagu Ataniġmiñ, tauqsitqiḷḷaniksran tammaiñiaġiñ. 21Ukiuŋa Utiqtitchivium tikitqikpan nuna Atanġum iñiġlugu pigiliutiniaġaa; aŋaiyyuliqsiqpaich piginiaġaat.
22Aitchuutiqaġuvsi Ataniġmun nautchiivigmik tauqsiŋaravsiññik, 23aŋaiyyuliqsiqpaum miksrautchaġlugu akiksriġñiaġaa qavsiutilaaŋatitun ukiut tikiḷġataqtillugu Ukiuŋa Utiqtitchivium, aasii akiḷiqtaksraġiniaġiñ taaptumani uvlumi; maniŋa pigigaa Atanġum. 24Ukiuŋa Utiqtitchivium tikitpan nuna utiġniaqtuq iñuŋanun naakkaunnii kiŋuvaaŋiñun.
25Iluqaisa akiŋit inillagniaġait maliġilugu atuġuuraŋat uuktuun.
26Iġñiaqqaaŋa niġrutim pigianikkaa Atanġum, tavraasii kia unnii aitchuutiginiaŋitkaa piyummatigilugu. Nuġġaq, imnaiyaaq, naakka nagruliayaaq pigigaa Atanġum, 27iġñiaqqaaŋa aglaan salumaitchuaguruam niġrutim tauqsitqikkumiñaġaat inillaŋaruakun akiŋagun naggusiġḷugu tallimaŋatun. Tauqsitqiŋitparruŋ aasii, tuniyumiñaġaat allamun iñugmun inillaŋaruakun akiagun.
28 #
Nu 18.14. Nallivsiunnii tunitqigñiaŋitkaa naakka tauqsitqigḷugu aitchuutigipiaġataġlugu qaiñŋarani Ataniġmun, iñuugaluaqpan, niġrutaugaluaqpan, naakka nunauluni. Iñiġlugu Atanġum pigigaa. 29Iñuit unnii aitchuutauŋaruat iḷumun uvamnun tauqsitqigñiaŋitkait; tuqutauruksraurut. 30#Nu 18.21; Dt 14.22-29.Qulipayaaŋat nauruat nunami, palauvaksraugaluaqpata naakka siiġñaugaluaqpata, pigigai ilaata Atanġum. 31Tauqsitqikkumiñaġupku iḷaŋa, akiḷiqtaksraġigiñ inillaŋaruakun akiŋa iḷavsaaġlugu tallimaŋanik. 32Atausiḷḷaa quliuruani pamiqsaani niġrutini pigigaa Atanġum. Niġrutit kisitpatigik, atausiḷḷaa quliuruani pigigaa Atanġum. 33Inillagniaŋitkisi niġrutit pigiitchuat naliġagvigillasiḷugich, suli simmiqsuġniaŋitkisi. Simmausiġñiġupku atausiq niġrun allamik, tavra iluqatik niġrutik pigigaik Atanġum suli tauqsitqiġñaġniaŋitchuk.
34Tavra taapkua piraksriutit Atanġum qaisaŋi Moses-mun Mount Sinai-mi Israel-gum kiŋuvaaŋiññun.
Currently Selected:
Leviticus 27: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
