Leviticus 17
17
Salumaruaguniŋa Augum
1Atanġum uqallautigaa Moses 2qaitchitquvlugu Aaron-mun iġñiŋiñullu suli Israel-gum kiŋuvaaŋiññun ukuniŋa maliġuagaksraŋiñik. 3-4Nalliat Israel iñuŋisa tuqutchiruaq immulivigmik naakka imnaimik naakkaunnii nagruligmik aitchuutiksramik Ataniġmun uniuġlugu paaŋa Tupqum Atanġum nayuqtauviata tavra navgiruq pitquramik. Augmik maqipkaiŋarut suli iḷauŋaiġñiaqtut God-im iñuŋiñun. 5Sivuniġigaa taaptuma piraksriutim tavra Israel-gum kiŋuvaaŋich qaġġirrigisirut Ataniġmun niġrutinik tuqutchuuŋaramignik taavani nunami. Qaġġisuutiniaġai aŋaiyyuliqsiqpagmun paaŋanun Tupqum, aasii tuqullugich iḷammiuġunmun aitchuutausaġlugich. 6Aŋaiyyuliqsiqpaum qivsaliutigisigaa auk saniġaŋiññun ikipkaivium paaŋani Tupqum aasii ikipkaġlugu qaunnaq tivraġiksuaq iviġaumagiraa Atanġum. 7Israel-gum kiŋuvaaŋich iḷumutuuŋaiqsukrauŋitchut Ataniġmun tuqutchiraġaġlutiŋ niġrutinik taavani nunani aitchuutigilugich aasii nagrulgich ilitqusiqł̣uŋiññun. Israel-gum kiŋuvaaŋisa nalauttaksraġigaat una maliġuagaksriaq taimuŋaaglaan.
8Nallipayaaŋat Israel iñuŋisa naakka allaniñ nunaniŋŋaqtat iñuuniaqtuat nunaaqqiñi aitchuiruat ikipkautikun aitchuutinik naakka allanik aitchuutauruanik 9qaiḷḷugich Ataniġmun uniuġlugu paaŋa Tupqum iḷauŋaiġñiaqtut God-im iñuŋiñun.
10 #
Gn 9.4; Lv 7.26, 27; 19.26; Dt 12.16, 23; 15.23. Nalliŋich Israel iñuŋisa naakka allaniñ nunaniŋŋaqtauruat iñuuniaqtuat nunaaqqiñi niġikpata niqimik auqaqtillugu, Atanġum akiḷḷiḷiutiniaġaich aasii iñugiŋaiġḷugich. 11#He 9.22.Iñuggutaa iñuggutiqapayaaqtuam tavra augmiittuq, tavra tainnamik Ataniq piraksriiŋaruq iluqaan auk maqipkaquvlugu ikipkaivigmun iñuich piḷuutaiqsaġlugich. Auk, iñuggutauruaq, piiqsiḷḷaruq piḷuutinik. 12Tavra tainnamik Atanġum uqallautiŋagaich Israel-gum kiŋuvaaŋich iliŋich naakka allaniŋŋaqtauvlutiŋ iñuuniaqtuat akunġanni niġiruksrauŋiññivḷugich auqaqtuamik niqimik.
13Nalliŋich Israel-gum kiŋuvaaŋisa naakka allaniŋŋaqtauruat nunaaqqimi aŋuniqpata niġrunmik naakka tiŋmiamik piraġausiq nalaullugu salumaruamik, auŋa maqipkaqtaksraġigaat nunamun aasii matulugu nunamik. 14Iñuggutaa iñuggutiqapayaaqtuam tavra augmiittuq, aasii tavra tainnamik Atanġum uqallautiŋagaich Israel-gum kiŋuvaaŋich niġitquŋił̣ł̣ugich niqimik auqaqtillugusuli aasii kiñapayaaq tainna piruaq iḷauŋaiġñiaqtuq ilaata iñugiraŋiñun. 15Kisupayaat iñuich, Israel-gum kiŋuvaaŋisa naakka allaniñ nunaniŋŋaqtaugaluaqtuat, niġiruat niqimik niġrunmiñ ilimisun tuquŋaruamik naakka tuquttaŋannik allat niġrutit iqaġiruksraġigai annuġaatik, ivvaġlutiŋ, utaqqiruksraurut anaqalġataqtillugu piraġausiq nalaullugu salumasiñiksramignun. 16Tainna piŋisuaġumiŋ, igḷutuqtaksragigaat killukkuaqtuam nalautaksraŋa.
Currently Selected:
Leviticus 17: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
