Leviticus 13
13
Pitqurat Kiḷḷiqsuqtuatigun
1Atanġum qaitchiŋagaik Moses-lu Aaron-lu ukuniŋa maliġiraksranik. 2Nalliqsi kiḷḷiqsuġniqpan uviñiŋani naakka ayuaqtuġluni naakka sukapkaŋaruaqaġniqpan mamitchiġiitchumaaqtuamik uviñigmiñi kiḷḷiqsuġluni, Aaron-muutiraksrauruq aŋaiyyuliqsiqpagmun naakka nalliannun iġñiŋisa aŋaiyyuliqsiqpauruamun. 3Aŋaiyyuliqsiqpaum aasii qimilġuniaġaa kiḷḷiŋa, aasii nusaŋich tavrani qatiqsiŋaniqpata suli kiḷḷiŋa iḷunmuŋaruatun qiññaqaġluni avataaniittuamiñ uviñiŋaniñ, tavra mamitchuitchuamik kiḷḷiġruaqtuqtuq, aasii aŋaiyyuliqsiqpaum kiligniaġaa salumaiññiḷugu. 4Kiḷḷiq aglaan qatiġmiḷuniḷu qiññaŋani iḷunmuŋaruatun inŋitpan avataaniittuamiñ uviñiŋaniñ suli nusaŋich tavraniittuat qatiqsiŋaiḷḷutiŋ, aŋaiyyuliqsiqpaum kisimġiuqtivsaallagniaġaatin tallimat malġugni uvluni. 5Aŋaiyyuliqsiqpaum qimilġutqigñiaġaatin tallimat malġuŋanni uvlut, aasii kiḷḷiñ qanuġiḷiŋaiññiqpan siaminŋaiḷḷuni, tavra ilikkun itivsaallagniaġaatin tallimat malġugni uvluni. 6Aŋaiyyuliqsiqpaum qimilġuvsaaġniaġaatin tallimat malġuŋanni uvlut, aasii kiḷḷiq piiġñiqpan suli siamitkaluaġnani, tavra kiligniaġaatin piraġausiq nalaullugu salumaruaguniḷutin; kiḷḷiłhiñauniqsuq. Iqaġigisigitin annuġaatin aasii piraġausiq nalaullugu salumaniaqtutin. 7Kiḷḷiq aglaan siaminniqpan aŋaiyyuliqsiqpagmun qimilġuuqqaaqtillutin suli kilikłutin salumaniḷutin, sivuġaanuvsaaqtuksraurutin aŋaiyyuliqsiqpaum. 8Aŋaiyyuliqsiqpaum qimilġutqigñiaġaatin, aasii siaminŋaniqpan, tavra kiligniaġaatin salumaitchuaguniḷutin; taamna mamilaitchuaguniqsuq kiḷḷiġruaq.
9Nalliqsi mamilaitchuamik kiḷḷiġruaqtuġniqpan, aŋaiyyuliqsiqpagmuutiraksrauruq, 10ilaata qimilġuniaġaatin. Uviñigni qatiqsiŋaruamik kiḷḷiqaġniġuvich qatiqsiŋavlutiglu tavrani nusaŋich suli immaŋaluni, 11tavra mamilaitchuaguniqsuq uviñigmi kiḷḷiq. Aŋaiyyuliqsiqpaum kiligniaġaatin salumaitchuaguniḷutin; ilikkuaqtaksrauniaŋitchutin, qanukkii nalunaitchuq salumaitchuaguniqsutin. 12Uviñigni kiḷḷiqsuutim siamiłłuni matullagniqpatin niaquġniñ isigagnuaglaan, 13aŋaiyyuliqsiqpaum qimilġuutqigñiaġaatin. Tautukkumiuŋ matuŋatilaapiaŋanik iluqaan timin, kiligniaġaatin piraġausiq nalaullugu salumaniḷutin. Iluqani uviñin qatiqsiŋaniqpan, tavra piraġausiq nalaułługu salumarutin. 14Kiḷḷiq aglaan agmaqsaġluqqaaqtuq, salumaitchuaguruq. 15Aŋaiyyuliqsiqpaum qimilġuutqigñiaġaatin, aasii tautukkumiuŋ agmaruaq kiḷḷiq, tavra ilaata kiligniaġaatin salumaitchuaguniḷutin. Tavra agmaruaq kiḷḷiq sivuniqaqtuq mamilaitchuaguvluni kiḷḷiutilaaŋanik, aasii salumaitchuaġuqłutin. 16Kiḷḷiq aglaan mamitpan aasii qatiqsitqigḷuni, ullautigisirutin aŋaiyyuliqsiqpagmun, 17qimilġuutqigñiaġaatin. Kiḷḷiq qatiqsiŋaniqpan, tavra piraġausiq nalaullugu salumaruagurutin, aasii aŋaiyyuliqsiqpaum kiligniaġaatin salumaniḷutin.
18Nalliqsi ayuaqaŋakpan maminŋaruamik 19aasii aquvatigun puvitpan qatiqsivḷuni naakka kaviaqsivłuni tavrani inaani ayuam, aŋaiyyuliqsiqpagmuktuksraurutin. 20Aŋaiyyuliqsiqpaum qimilġuniaġaatin, aasii taamna iḷunmuŋaniqpan qiññaqaġniqpan avataani uviñiŋaniñ suli nusaŋich qatiqsiŋalutiŋ, tavra ilaata kiligniaġaatin salumaiññiḷutin. Tavra mamilaitchuaq kiḷḷiġruaq isagutiŋaniqsuq ayuaŋani. 21Aŋaiyyuliqsiqpaum aglaan qimilġukpauŋ aasii nusaŋich tavrani qatiqsiŋaiḷḷutiŋ suli iḷunmuŋaruatun qiññaqaŋiḷḷuni avataaniittuamiñ uviñiŋaniñ, aglaan qatiaqsimakpan qiññaŋa, aŋaiyyuliqsiqpaum ilikkun itinniaġaatin tallimat malġugni uvluni. 22Taamnaasii siamirraqsikpan, aŋaiyyuliqsiqpaum kiligniaġaatin salumaiññiḷutin; kiḷḷiġruaqtuġniqsutin. 23Qiññaŋa aglaan allaŋŋuŋaitpan suli siaminŋaiḷḷuni, qiliġuusiññaqtuq ayuaġniñ, aasii aŋaiyyuliqsiqpaum kiligniaġaatin salumaniḷutin.
24Iḷaanni nalliqsi uutiqtinŋaniqpan, taamna agmaruaq qatiqsikpan naakka kaviaqsiḷuni, 25aŋaiyyuliqsiqpaum qanuqitilaaġniaġaatin. Nusaŋich tavrani qatiqsiñiqpata suli iḷunmuŋaruatun illuni avataaniittuamiñ uviñiŋaniñ, tavra mamilaitchuaq kiḷḷiġruaq isagutiŋaniqsuq uutiqtirviani, aasii aŋaiyyuliqsiqpaum kiligniaġaatin salumaiññiḷutin. 26Nusaŋich aglaan tavrani qatiqsiŋaitpata suli iḷunmuŋaruatun inŋiḷḷuni avataaniittuamiñ uviñiŋaniñ, aglaan qatiġluni qiññaŋa, aŋaiyyuliqsiqpaum ilikkun ittuaqtillagniaġaatin tallimat malġugni uvluni. 27Aŋaiyyuliqsiqpaum qanuqitilaatqigñiaġaatin tallimat malġuŋanni uvlut, aasii siamitchaŋaniqpaŋ tavra mamilaitchuaq kiḷḷiq, aasii aŋaiyyuliqsiqpaum kiligniaġaatin salumaiññiḷutin. 28Aglaan taamna allaŋŋuŋaitpan suli siaminŋaiḷḷuni suli qatiġluni qiññaŋa, puvinniġusiññaqtuq uutiqtinniŋaniñ. Aŋaiyyuliqsiqpaum kiligniaġaatin piraġausiq nalaullugu salumaniḷutin, qanukkii qiliġuġisiññaġaa uutiqtinniŋata.
29Nalliqsi, aŋutaugaluaqpan naakka aġnaugaluaqpan, kiḷḷiqaqpan niaqumiñi naakka tavlumiñi, 30aŋaiyyuliqsiqpaum qimilġuniaġaa. Itisiuraŋaruatun inniqpan avataaniittuamiñ uviñiŋaniñ suli nusaŋich tavrani quqsuqpata saallutiglu, tavra mamilaitchuaq kiḷḷiuruq, aasii kiligniaġaatin salumaiññiḷutin. 31Aasii, aŋaiyyuliqsiqpaum qanuqitilaaqpatin, kiḷḷiq qiññaqaŋitpan itisiŋaluni avataaniittuamiñ uviñiŋaniñ, aglaan maŋaqtuanik nusaiññiqpan, ilikkun itinniaġaatin tallimat malġugni uvluni. 32Aŋaiyyuliqsiqpaum qanuqitilaatqigñiaġaatin tallimat malġuanni uvlut, aasii siaminŋaiññiqpan suli quqsuqtuanik nusaiḷḷuni tavrani suli itisiŋaruatun inŋiḷḷuni avataaniittuamiñ uviñiŋaniñ, 33kivraġniaġiñ niaqun kisiŋŋuġlugu avataa kiḷḷim. Aŋaiyyuliqsiqpaum aasii ilikkun itivsaaġniaġaatin tallimat malġuvsaani uvluni. 34Tallimat malġuŋanni uvlut aŋaiyyuliqsiqpaum qanuqitilaatqiġñiaġaa kiḷḷiñ, aasii siaminŋaiññiqpan suli itisiŋaruatun inŋiḷḷuni avataaniittuamiñ uviñiŋaniñ, ilaata kiligniaġaatin piraġausiq nalaullugu salumaniḷutin. Iqaġigisigitin annuġaatin, aasii salumasiñiaqtutin. 35Kiḷḷiñ aglaan siamitpan kiliktauqqaaqtillutin salumaniḷutin, 36aŋaiyyuliqsiqpaum qimilġutqigñiaġaatin. Kiḷḷiñ siaminniqpan, ivaqłiaksraitchuq quqsuqtuanik nusanik; nalunaitchuq salumaitchuaguniqsutin. 37Aglaan aŋaiyyuliqsiqpaum isummatigikpauŋ kiḷḷiq siaminŋaiññiḷugu suli maŋaqtuat nusat nausaŋalutiŋ tavrani, kiḷḷiq maminŋaniqsuq, aasii aŋaiyyuliqsiqpaum kiligniaġaatin piraġausiq nalaullugu salumaniḷutin.
38Nalliqsi, aŋutaugaluaqpan naakka aġnaugaluaqpan, qatiqtualiġñiqpan uviñigmi, 39aŋaiyyuliqsiqpaum qanuqitilaaġniaġaatin. Nalunaitchuat aasii qatiaġniqpata nausiññaqtuaguniqsuq pupiksiruatun uviñigmi; piraġausikun salumaruagurutin.
40-41Niaqun mitquiġñiqpan sivuġaġni naakka tunusugni, taaptuma salumaiḷiñiaŋitkaatin. 42Aglaan kaviaqłuni qatiqtuaq kiḷḷiq nuiñiqpan nusaiŋaruami, tavra mamilaitchuamik kiḷḷiġruaqaqtuq. 43Aŋaiyyuliqsiqpaum qanuqitilaaġniaġaatin, aasii tavrani kaviaqłuni qatiqtuamik kiḷḷiqaqpan, 44aŋaiyyuliqsiqpaum kiligniaġaatin salumaiññiḷutin, pisigilugu mamilaitchuaq kiḷḷiġruaq niaquġniittuaq.
45Mamilaitchuamik kiḷḷiġruaqaġniġuvich uviñigni, aligaŋaruanik annuġaaqtuksraurutin, iḷḷaiqsuŋaiḷḷugiḷḷu nusatin, matuqaġlugulu alliŋa kiiñaqpich, aasii nipallutin “Salumaitchuŋa, Salumaitchuŋa!” 46Tainna tavra salumaitchuaguniaqtutin kiḷḷiqsuġuvich, suli iñuuniaqtuksraurutin siḷataani nullaummiviuruam, kisimġiuqtuksraurutillu.
Pitquraliat Uqukkun
47Uquulaaqsiŋakpata annuġaat, imnaim mitquġigaluaqpauŋ naakka ukił̣haagugaluaqpan, 48naakkaunnii ukił̣haaviñiġmiglu imnaim mitquviñiŋaniglu ukił̣haamik naakka qisigmik, qisigmik savaaguruamiglu, 49suŋaaqtaaġuŋaniqpan naakka kavialaaqsiŋaniqpan, tavra uquuruq tautuktitaksrauruq aŋaiyyuliqsiqpagmun. 50Aŋaiyyuliqsiqpaum qimilġuniaġaa aasii tutquġlugu tallimat malġugni uvluni. 51Qimilġutqigñiaġaa tallimat malġuanni uvlut, aasii uquk siaminŋaniqpan, taamna salumaitchuaguruq. 52Aŋaiyyuliqsiqpaum ikipkaġniaġaa, qanukkii siamitchuuruaguniqsuq uquk suksraunġiqsuksrauruq ikipkaġlugu.
53Aglaan, qimilġuġumiuŋ, aŋaiyyuliqsiqpaum uquk siaminŋaiññiqpan taaptumani, 54piraksriiñiaqtuq iqaġitqulugu aasii tutquġlugu tallimat malġuvsaani uvluni. 55Tavraasii qimilġuniaġaa, aasii uquum qiññaŋa allaŋŋuŋaiññiqpan, siamiñŋaitkaluaqtillugu, tavra salumaitchuaguruq; ikipkaqtaksraġigiñ, auŋagaluaqpan sivuġaani naakka tunuani. 56Aglaan, aŋaiyyuliqsiqpaum qimilġuvsaaġumiuŋ, uquk nalunaqsiŋaniqpan, aliglugu piiqsaksraġigaa annuġaamiñ naakka qisigmiñ. 57Tavraasii, uquk nuivsaalgitpan, tavra siaminagutiniqsuq, iñuata ikipkaqtaksraġigaa taamna. 58Iqaġigumiuŋ aasii piġuaġniq nalunaqsiñiqpan, iqaġivsaaqtaksraġigaa, aasii piraġausikun salumasiñiaqtuq.
59Tavra, taamna, pitquraq uquġniŋagun annuġaat, imnaim mitquġigaluaqpauŋ, ukił̣haagugaluaqpallu, savaagugaluaqpan ukił̣haamiñ, imnaim mitquaniñ naakkaunnii suna qisigmiñ savaaq; tainna tavra sivunniġñiaqtut piraġausikun salumaruagukpan naakka salumaitchuagukpan.
Currently Selected:
Leviticus 13: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
