Exodus 36
36
1“Bezalel-lu, Oholiab-lu, iluqaġmiglu allat savaktit Atanġum pisuġniksriñŋaraŋich kaŋiqsisiksrił̣ł̣ugiḷḷu, iḷisimaruat supayaanik qanuq savaaġiniaqtilaaŋiññik nappaisaqpata nalunaiqsauruamik Tupiġmik, savaglutiŋ Atanġum piraksriutipiaġataŋagun.”
Iñuich Qaġġirrirut Iñugiaktuanik Aitchuutinik
2Moses-gum ququaġaik Bezalel, Oholiab-lu, iluqaisalu savayuruat aŋutit Atanġum pisuġniksriñŋaraŋich suli ikayuġummatiqaqtuat, aasii Moses-gum savaksaquŋagaich. 3Ilaata qaiñŋagaich aitchuutipayauraŋich Israel-gum kiŋuvaaŋich qaġġirraŋich nappaġniaġniŋanun ilaaguaqtauruam Tupqum. Iñuŋich Israel aglaan qaġġirrisimaaŋarut Moses-mun aitchuutimignik uvlaatuaġaġimman. 4Tavraasii savayuruat aŋutit savaktuat ullautiniqsut 5aasii uqallautivlugu Moses, “Iñuich marra qaġġirriraġaqtut qaaŋiulaaqługu atugaksraq savaamun Atanġum piraksriutigiraanun.”
6Moses piraksriiŋaruq nullaummiruapayaanun aitchuiŋaiquvlugich ilaaguaqtauruamun Tupiġmun; aasii inuich qaġġirriraġaŋaiŋarut. 7Qaġġisianiktaŋich qaaŋiulaaŋarut-unnii naanniksraŋannun savaaguniaqtuam.
Nappaġniŋagun Tupqanik Atanġum Nayuqtauniŋani
(Exodus 26.1-37)
8Sanatuniqtat aŋutit savaktuaguruaniñ nappaŋagaat Tupqa Atanġum Nayuqtauniŋata. Qulit talukiyaat savaŋagai ukiłhaaġiksaanik savaaguŋaruaniñ suŋauraaqtaamik, tigluuraaqtaamik, suli kaviqsuamik imnaim mitquanik suli miquqtanik qiñiyunaqsaŋaruanik cherubim-nik. 9Talukiyaat ativlugich aktilaaŋich, akimiaġutaiḷatun (14) isagniġum avvaŋisun taktigivlutik aasii malġuktun isagniġum avvaŋiksun siḷiktigivlutiŋ. 10Miquŋaġaich tallimat atautchimukługich talukiyaat; tainna-suli tallimauruat alġaiŋich. 11Niviŋŋaviḷiqsuiŋarut kalikumik suŋauraaqtaamik siñaagun siḷalliuruam aviktam atautchiigullaaruagni. 12Niviŋŋaviḷiqsuiŋarut malġukipiaq qulinik (50) sivulliġmun aviktamun atautchiiguruani suli malġukipiaq qulinik (50) ativlugich aqulliuruamun aviktamun igḷuiŋiññun. 13Naktirviḷiuŋarut malġukipiaq qulinik (50) kaviqsuamik manigmik, atautchimullasaqługik malġuiguruak atausiŋŋuġlugik.
14Qaliḷiuŋagaat Tupiq qulit atausiuruanik (11) kalikunik savaaguruanik nagrulgich mitquanniñ. 15Atisivḷugich aktilaaŋich savaŋagaich, akimianik (15) isagniġum avvaŋiñik taktigivlugich aasii malġuk isagniġum avvaŋiktun siḷiktigivlugich. 16Miquutiŋagaich tallimat atautchimun atautchiigusaqługich aasiiḷi allat itchaksrauruat iliŋisigun illasivḷugich. 17Niviŋŋaviḷiŋagaich malġukipiaq qulinik (50) siñaagun aqulliuruam talukiyaam atautchiiguruani suli niviŋŋavigñik siñaatigun igḷuiŋisa. 18Patukpagnik malġukipiaq qulinik (50) naktirviḷiuŋarut kasuqtillasaqługik malġuiguruak, atausiŋŋuqsaqługu qaliŋa. 19Malġuiguruagnik suli qaliḷiuŋagaat, igḷua imnaich aŋusalluŋisa amiŋiñik kipitinŋaruanik kaviqsaamun aasiiḷi igḷua qisigiksaanik, siḷalliulugu taluusaqługu.
20Nappaaġiksivḷugich avaluksriuŋagaat acacia-m qiruanik Tupiq. 21Avaluksrallaa qutchiksigiŋaruq akimiatun (15) isigagniqtun aasii iñuiññaq tallimat malġugnik (27) titiġniñik siḷiktigivluni, 22malġugnik atiruagnik aniŋaruagnik, avaluksrat kasuqtillasivḷugich. Iluqaġmiŋ avaluksrat tainna turviqaŋarut. 23Iñuiññanik (20) avaluliuŋarut salliġmun 24suli malġukipianik (40) tunŋaviqaqhutiŋ qatiqtuanik manigñik ataaŋiññi, malġuuvlutiŋ alliŋich ataallaaŋiññi avalut tigummisauvlutiŋ paugaŋiññun. 25Avaluliuŋarut iñuiññanik (20) salliġmun Tupqum 26suli malġukipianik (40) qatiqtuanik manigñik tunŋavigñik, malġuullaavlugik avalullaani. 27Tunuksraŋanun aasii Tupqum, sanmiruam uanmun, itchaksranik avaluliuŋarut, 28malġugniglu avalugnik kaŋiġallullaaŋanun. 29Taapkua kaŋiġallugni avaluuruat kasuqtinŋarut ataatigun aasii kasuqtinŋavlugich qulaanunaglaan. Malġuk avaluk malġugnun kaŋiġaluugnun tainna savaŋagaich. 30Tavraasii tallimat piŋasut avalut suli akimiaq atausiq (16) qatiqtuat manigmik tunŋaviŋich, malġuuk ataani avaluuk.
31Akimianik (15) sanniġutaliuŋarut acacia-m qiruanik, tallimaullaalugich avataani Tupqum, 32tallimat avaluksrat igḷuani saniġaata, suli tallimat avaluksraŋiñun ualiñaaŋani, tunuani. 33Qitiqłiuruaq sanniġutaq, inillaŋaruaq avvaŋanunaglaan avalut, taktigiŋaruq Tupqum isullaaŋiññun. 34Qaaliŋagaich avaluuruat kaviqsuamik manigmik iviqtillugiasii kaviqsuamik manigmik tigummisiksraŋiñik sanniġutat, qaaliŋammiruat kaviqsuamik manigmik.
35Talukiyaaliuŋarut ukiłhaaġiksuamik, savaaguŋaruamik suŋauraaqtaamik, tigluuraaqtaamik, suli kaviqsaamik imnaim mitquanik suli qupakługu arriŋiñik cherubim-git. 36Sisamanik napaqsraliuġniqsut acacia-m qiruanik tigummisiksraŋiñik talukiyaam, qaaliqł̣ugich kaviqsaamik manigmik, suli niviŋŋaviḷiqsuqługich kaviqsaamik manigmik. Tavraasii sisamanik qatiqtaamik manigmik tunŋaviḷiuqługich naparuat. 37Paaŋa Tupqum talukiyaaliuŋagaat ukiłhaaġiksuamik savaaguruamik suŋauraaqtaamik, tigluuraaqtaamik, suli kaviqsaamik imnaim mitquanik qiñiyunaqutiqaqhutik miquqtanik. 38Taamna talukiyaaq tallimanik napaqsraḷiuġniġaat naktirviḷiqsuqługulu, kaviqsaamik manigmik qaaliqł̣ugich, talukiyaaqaġviŋich, suli tallimanik patukpagnik nappaviḷiqsuqługich.
Currently Selected:
Exodus 36: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
