Exodus 35
35
Maliġuagaksraŋich Sabbath
1Moses-gum ququaŋagai Israel-gum iñupayaaŋi, “Uvva inna Atanġum piraksriġaasi: 2#Ex 20.8-11; 23.12; 31.15; 34.21; Lv 23.3; Dt 5.12-14.Itchaksranik uvluksraqaqtusi savagviksravsiññik, aglaan tallimat malġuat uvlut ilaaguaqtauniaqtuq, nalunaiġḷugu uvluŋa unaŋuiqsiġvium ilaaguaŋalugu uvamnun, Atanġuruamun. Kiñapayaaq savagniqpan taaptumani uvlumi tuqutauruksrauruq. 3Igniqsuġnasi aimmivivsiññi uvlumi Sabbath-mi.”
Aitchuutiksrat Nalunaiqsauruamun Tupiġmun
(Exodus 25.1-9)
4Moses uqaqtuq iñupayaaŋiñun Israel, “Uvva una Atanġum piraksriutaa: 5Aitchuutiksriuġlusi Ataniġmun. Iluqaġmiŋ aitchuiyumaruat qaġġirrigisirut kaviqsuanik manigñik, qatiqtuanik manigñik, naakka patukpagnik; 6ukiłhaaġiksuanik; suŋauraaqtaanik, tigluuraaqtaanik, suli kaviqsuanik imnaim mitquanik; ukił̣haalianiglu nagrulgich mitquanniñ; 7imnaich aŋusalluŋisa amiŋiñik kaviqsaamik kipititanik, qisigiksuanik; acacia-m qiruanik; 8uqsruksraŋannik nannich; avuuġutiksraŋiññik uqsruqtaaġutim suli tivraġiksuanun ikipkautinun; 9carnelian-nik suli allanik uyaġagiksuanik iḷiraksraŋiñik aŋaiyyuliqsiqpaum kiapiġutaanun satqagutaanullu.
Suġautaksraŋi Tupqum Atanġum Nayuqtauniŋani
(Exodus 39.32-43)
10“Savayupayaaqtuat savaktit akunnavsigniñ qairuksraurut savagiaġlugich supayaurat Atanġum piraksriutigiraŋich: 11Tupiq, qaakutaŋiḷḷu taluŋiḷḷu, niksigauraŋich suli avaluŋich, ayagutaŋich, napaqsraŋich, tunŋaviŋiḷḷu; 12Sivunniuġutim Kiguunniŋa, akigaunnaŋich, matua, talukiyaaġlu ilaaguaġutausaġlugu; 13niġġivik, akigaunnaŋik, suli iluqaisa suġautaŋich; punniq aitchuutauruaq God-mun; 14Naparuaq naniqaġvik nannimun suġautaŋiñullu; nannich uqsruŋiḷḷu; 15ikipkaivik ikipkaiviuruaq tivraġiksautinun suli akigautiŋich; uqsruqtaaġun; tivraġiksaun ikipkaun; talukiyaaksraŋalu paaŋata Tupqum; 16ikipkaiviksraq ikipkautikun aitchuutinun, patukpaiḷḷu ikipkautim qaŋattatiŋich atalugich, akigautiŋich, suli suġautapayaaŋich; iqaqqiviglu alliġaŋalu; 17talukiyaaŋiḷḷu avaluŋata, napaqsraŋiḷḷu, tunŋaviŋiḷḷu, avalum paaŋa talukiyaaqaqtuaq; 18Tupquvlu paugaksraŋich akłunaaksraŋiḷḷu Tupqum avaluŋalu; 19suli ukiłhaalluatalianik annuġarrianik aŋaiyyuliqsiqpauruat atuaksraŋiññik savallaġmiŋ Salumaruami Inimi—ilaaguaqtauruat annuġaaksraŋich Aaron-gum aŋaiyyuliqsiqpauruam suli iġñiŋisa.”
Iñuich Qaġġirrirut Aitchuutimignik
20Iluqaġmiŋ Israel-gum kiŋuvaaŋisa nayuŋaiŋagaat Moses, 21iluqaġmiŋ aasii piyummatiqaqtuat qaġġirriŋarut aitchuutinik atugaksranik Atanġum Tupqani. Qaġġirriŋarut iluqaiññik pigiraksraġiraŋiññik nanġaigumiŋ suli aŋaiyyuliqsiqpauruat annuġarrisaġumisik. 22Piyummatiqapayaaqtuat, aŋutillu aġnallu, qaġġirriŋarut qiñiyunaqtuanik kakkisinaqtuanik, siutiġutinik, qitiqłiaġutinik, quŋusiġutinik, qanusipayaaniglu kaviqsuanik manigñik qiñiyunaqutilianik aasii ilaaguaqtaġivlugich Ataniġmun. 23Iluqaġmiŋ piqaqtuat ukiłhaaġiksuanik, suŋauraaqtaanik, tigluuraaqtaanik, naakka kaviqsuanik imnaim mitquanik; ukił̣haaŋanik nagrulgich mitquaniñ; imnaich aŋusalluŋisa amiŋiñik kipititanik kaviqsaamik; naakka qisigiksaanik, qaġġirriŋarut. 24Aitchuiyumiñapayaaqtuat qatiqtuanik manigñik naakka patukpagnik qaġġisiŋagaich aitchuutitiŋ Ataniġmun, acacia-m qiruŋiñik atugaksraŋiñik nallipayaaŋiñun savaat qaġġirriŋarut. 25Sanaturuat aġnat qaġġirriŋaniqsut savaamignik ukiłhaagiksuanik ivalunik suli suŋauraaqtaanik, tigluuraaqtaaniglu, kaviqsuamiglu imnaim mitquanik. 26Ivaluliuŋammiñiqsut nagrulgich mitquŋiññiñ ukiłhaaliaksramignik. 27Aullarriuruat qaġġirriŋamarulli carnelian-nik suli uyaġagiksuanik iḷiraksraŋiññik aŋaiyyuliqsiqpaum kiapiġutaanun satqagutaanullu 28avuuġutillu uqsrullu nanniñun, uqsruqtaaġutiksramun, suli tivraġiksautinun ikipkautiksranik. 29Iluqaġmiŋ Israel-gum kiŋuvaaŋich piyummatiqapayaaqtuat qaġġirriŋarut aitchuutimignik Ataniġmun savaaksramun piraksriutigiraŋiññun Moses-mun.
Savaktiksrat Tupqanik Atanġum Nayuqtauniŋani
(Exodus 31.1-11)
30Moses uqallaktuq Israel-gum kiŋuvaaŋiññun, “Atanġum naliġaktaaġigaa Bezalel, iġñiŋa Uri-m suli tutaalua Hur-m maŋŋuŋiñiñ Judah-m. 31God-im immiŋagaa Iḷitqusiġiksuamiñik, pisuġniksrił̣ł̣ugu piḷḷaraŋanik, suli kaŋiqsimmatiksraŋanik qanusipayauramun savaaksramun, 32pisuġniksrił̣ł̣ugu savaaġivlugich qiñiyunaqusiat kaviqsuamik manigmiñ, qatiqtuamik manigmiñ, suli patukpagniñ, 33sanaraksriuqłutik uyaġagiksuanik inillaktaksranik; sanavlutigḷu qirugmiñ; qanusiugaluaġmanlu qiñiyunaqtuaq savaaq. 34Ataniq qaitchiŋaruq iḷisaurriyumiñaqsivḷugik Oholiab-mun iġñiŋanun Ahisamach-gum, maŋŋuŋiñiñ Dan, savaaksranik allanun. 35Pisuġniġmik qaitchiŋagaich savaktiksrat qanusipayauranun savaaksranun—titiqtuqtit, tuvraaksriirit, suli ukiłhaaġiksuanik savaguuruat—suŋauraaqtaanik, tigluuraaqtaanik, suli kaviqsuanik imnaim mitquanik; suli allanik kalikunik. Savallaniaqtut qanusiugaluaqpan savaaq suli tuvraaksriisuqtuallu.
Currently Selected:
Exodus 35: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
