Exodus 29
29
Piraksriutit Nalunaiqsausaqpata Aaron-lu Iġñiŋiḷḷu Aŋaiyyuliqsiqpauniġmun
(Leviticus 8.1-36)
1“Uvva una piraksraqsi Aaron-mullu iġñiŋiññullu ilaaguaqtausaqpata aŋaiyyuliqsiqpauniġmun savautisaġluŋa. Aŋusallumik nutauruamik piḷusi suli malġugnik aŋusallugnik imnaigñik surruutaitchuagnik. 2Atuġlusi nakuuniqtamik palauvagmik, aglaan imaksraiḷaaġlugu, punniliuġlusi olive uqsruanik uqsruliġḷugu, aasii suli iḷaŋa uqsruiḷaaġlugu, iḷaŋasuli siḷaavyaliuġlugu uutkanikpata uqsruqtiġlugich. 3Aguummagmun iḷiḷugich aasii aitchuutigilugich uvamnun aitchuutigiguvsiuŋ immulivium aŋusallua suli malġuuk imnaik aŋusalluk.
4“Aaron-lu iġñiŋiḷḷu paaŋanuktillugich Tupqum nayuqtauvigma, aasii piraġausiq nalaullugu ivvaqtillugich. 5Tavraasii annuġaaġlugu aŋaiyyuliqsiqpaum annuġaaŋiñik Aaron—qaliġuuraq, qaliġuaq ataanugniaqtuaq kiapiġutim, kiapiġun, satqagun, tavsiḷu. 6Niaquanun nimmaaġlugu aasii qiḷiutilugu ilaaguaqtamun aglagmun ‘Ilaaguaqtauŋaruaq Ataniġmun.’ 7Isaglugu uqsruqtaaġun, kuviḷuguasii niaquanun, aasii uqsruqtaaġlugu.
8“Qaipkaġlugich iġñiŋi aasii qaliġuuraġlugich; 9iḷiḷugich tavsiaŋich tiġiksraġviŋiññun aasii nimmaaġusiġḷugich niaquŋich. Tavra tainna nalunaiqsaġiniaġisi Aaron-lu iġñiŋiḷḷu. Iliŋisa suli kiŋuniiŋisa savautiniaġaanŋa aŋaiyyuliqsiqpaulutiŋ isuitchuamun.
10“Qaġġisilugu immulivium aŋusallua sivuġaanun Tupqum nayuqtauvigma aasii uqallautilugu Aaron iġñiŋiḷḷu argaŋi inillaqulugich niaquanun. 11Tuqullugu taamna aŋusalluq tavrani salumaruaguruami nayuqtauvimñi Tupqum paaŋani. 12Iḷaŋa aŋusallum auŋa tikiġnik nanuutilugu ikipkaivium nagruanun. Kuviḷuguasii iḷakua augum ikipkaivium alliŋanun. 13Aasii iluqaan itchauraŋat ilaġviŋisa, takiniŋalu tiŋuata, taqtuŋigḷu qaunnaqaġlugik, aasii ikipkaġlugich ikipkaivigmi aitchuutausaġlugich uvamnun. 14Aglaan ikipkaġlugu aŋusallum niqaa, amiŋa, suli iŋaluaŋich nullaummivium siḷataani. Taamna aitchuutauniaqtuq piḷuutaiġutausaġlugu.
15“Atausiq piḷugu aŋusalluq imnaiq aasii uqallautilugu Aaron iġñiŋiḷḷu argaŋich niaquanuqulugich. 16Tuqullugu, aasii auŋa siqił̣ł̣aqtautigilugu iluqaiññun saniġaŋiññun ikipkaivium. 17Piḷaglugu aŋusalluq imnaiq; uaqtiġlugich ilaġviŋich suli kiŋulliik niuŋik, aasii iḷiḷugich qaaŋanun niaquata allallu aviktat. 18#Eph 5.2; Phil 4.18.Ikipkautigilugu iluqaan aŋusallum imnaim niqaa ikipkaivigmi aitchuutausaġlugu. Tipaat taapkua aitchuutit iviġaumagigiga.
19“Alla aŋusalluq imnaiq piḷugu—ilaaguaqsikamiŋ atuqtaŋat—aasii uqallautilugu Aaron iġñiŋiḷḷu argaŋich niaquanuqulugich imnaim. 20Tuqullugu, auksraġlusi iḷaŋanik auŋata aasii nanuglugich taliqpiŋisa siutiŋisa nuvuŋich Aaron-guvlu iġñiŋisalu, suli taliqpianni kuvluŋich, putuguŋiḷḷu. Siqił̣ł̣aqtautigilugu iḷakuuruaq auk iluqaiññun saniġaŋiññun ikipkaivium. 21Piḷugu iḷaŋa augum ikipkaivigmiittuam suli uqsruqtaaġun, kattaqsruġlugik Aaron-mun annuġaaŋiñun iġñiŋiññullu suli annuġaaŋiñun. Ilaa, iġñiŋiḷḷu, annuġaaŋiḷḷu tavra ilaaguaqtauniaqtut uvamnun.
22“Qaunnaiyaġlugu aŋusalluq imnaiq, pamiugiġḷugu, itchauraiyaġlugich ilaġviŋich, takiniŋalu tiŋuata piiġlugu, taqtuiġlugulu qaunnaqtuummaigñik, taliqpiatalu mumiŋa piiġḷugu. 23Aguummagmiñ punniġmik aitchuutauŋaruamik uvamnun, punniksraġlusi atausiḷḷaamik allakaaġiiñiñ: atausiq uqsruligaaq olive-gum uqsruaniñ, atausiq uqsruiḷaaq, suli atausiq siḷaavyak. 24Iluqaisa taapkua niqit argaŋiññukkich Aaron-guvlu iġñiŋisalu aasii manigisigaich uvamnun nuimaruagulugu aitchuun. 25Tavraasii tigutqigmiḷugich iliŋiññiñ aasii ikipkautigilugich ikipkaivigmi, qaaŋani ikipkautauruam, niqaulugich aitchuutit uvamnun. Tipaat taapkua aitchuutit iviġaumagigiga.
26“Sakiaŋich tigulugich aŋusallum imnaim aasii ilaaguaqtaġilugich uvamnun nuimaruagulugich aitchuutit. Taamna niġrutim iḷaŋa ilivsi piginiaġiksi.
27“Aŋaiyyuliqsiqpauruaq nalunaiqsaukpan, sakiaŋalu mumiŋalu aŋusallum imnaim atugaksrauruk piraġausiq atuġumirruŋ nalunaiqsaunikun ilaaguaŋalutiŋ uvamnun nuimaruagulugich aitchuutit aasii ilaagun itillugich aŋaiyyuliqsiqpaŋnun. 28Tavra allaŋŋuġaġniaŋitchuaq sivunniutiga iñugiratka iḷammiuġutikun aitchuiraġikpata, sakiaŋalu mumiŋalu niġrutim piginiaġaich aŋaiyyuliqsiqpauruat. Tavra taamna iñuich aitchuutiŋat uvamnun, Atanġuruamun.
29“Aaron aŋaiyyuliqsiqpaukami annuġaaġiraŋich qaaŋiqtauniaqtut iġñiŋiñun tuquanikpan, atuġniaġaiḷḷi iliŋisa nalunaiqsaugumiŋ. 30Iġñiġuruam Aaron-mun inaŋiutauruaq aŋaiyyuliqsiqpauluni aasii ullautigumi Tupqanun nayuqtauniġma savautigisaġlugu Salumaruaguruaq Ini atuqtaksraġiniaġaich annuġaat tallimat malġugni uvluni.
31“Aaron iġñiŋiḷḷu nalunaiqsaummata aŋusallum imnaim niqaa atuqtaŋat qalatittuksraġigaat salumaruami inimi. 32Paaŋani Tupqum nayuqtauvigma niġiñiaġaat suli punniq iḷakuuruaq aguummagmi. 33Niġiñiaġaat atuqtaŋat piraġausiŋani suliqutigiŋaiġutim nalunaiqsauniŋanni. Kisimiŋ aŋaiyyuliqsiqpauruat taamna niġiñiaġaat, qanukkii salumaruaguruq. 34Iḷaŋa niqim naakka punniġum niġiŋitparruŋ uvlaami, ikipkaqtaksraġigaat; niġiruksraġiŋitkaat, qanukkii salumaruaguruq.
35“Piraġausiŋich nalunaiqsauniġum atuġlugich Aaron-mun suli iġñiŋiñun tallimat malġugni uvluni nalaupiallaglugu piraksriutiga ilivsiññun. 36Uvlutuaqpan aitchuiḷusi immulivium aŋusalluanik ikipkautigilugu, piḷuun suliqutigiŋaiqsauyumauq. Taaptuma piġuaġniġipiallagniaġaa ikipkaivik. Tavraasii uqsruqtaaġlugu olive uqsruanik ilaaguaqtaulugu. 37Taamna atuġlugu tallimat malġugni uvluni. Tavra ikipkaivik tamatkiġḷuni salumasiñiaqtuq suli kiapayaaq aksituaqpagu salumaruaġuġniaqtuq.
Uvlutuaqpan Aitchuutiksrat
(Numbers 28.1-8)
38“Uvlutuaġaġikpan taimuŋa, ikipkaivigmi aitchuiḷusi malġuugnik imnaiyaagnik ukiuqaqtuagnik atausimik. 39Aitchuutigilugu igḷua imnaiyaam uvlaami aasii igḷua anaqami. 40Sivulliq imnaiyaaq aitchuutaukpan aitchuiḷusi malġuktun pounds-tun uqumaisigiruamik palauvagmik akunŋaruamik olive uqsruanik. Kuvisiḷusi wine-mik aitchuutaulugu atausimik quart-mik. 41Aitchuutigilugu ikipkautikun tuglia imnaiyaaq anaqakpagu, tainnasuli atiruamik aktilaaŋa palauvagmik, olive uqsruanik, suli wine-mik uvlaamisun. Taamna tavra niqauvluni aitchuutauruq uvamnun, Atanġuruamun, suli tipaat taapkua aitchuutit iviġaumagigiga. 42Taimuŋaaglaan, taamna ikipkautauruaq aitchuutigiruksraġigaat takkumni paaŋani Tupqum Nayuqtauviŋma. Tavrani tavra kasuġuuniaġivsi iñugiratka uqautilusiḷu. 43Tavrani kasuġuuniaġitka Israel-gum kiŋuvaaŋich, aasii qivliqtuam qaummaŋa nayuqtauniġma salumaruaġuġniaġaa ini. 44Tupiġlu ikipkaiviglu salumaruaġuġniaġikka, aasii inillaglugich Aaron-lu iġñiŋiḷḷu iliŋiguaġlugich savautitquluŋa aŋaiyyuliqsiqpaulugich. 45Iñuuniaqtuŋa akunġanni Israel-gum kiŋuvaaŋisa, suli God-tigiñiaġaanŋa. 46Iḷisimaniaqtut Atanġuruaŋaa God-iŋat qaġġisiŋaraŋich Egypt-miñ iñuullasukłuŋa akunġanni. Uvaŋa Atanġuruŋa God-igiraŋat.
Currently Selected:
Exodus 29: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
