Exodus 28
28
Annuġaaksraŋich Aŋaiyyuliqsiqpauruat
(Exodus 39.1-7)
1“Qaitquuŋ aniqatin Aaron, iġñiŋiḷḷu Nadab, Abihu, Eleazar, Ithamar-lu. Ilaaguaġlugich Israel-gum kiŋuvaaŋiññiñ, savautiyumagaanŋa aŋaiyyuliqsiqpaulutiŋ. 2Aŋaiyyuliqsiqpaum annuġaaŋiñik annuġaaliuqsaġiñ aniqatin Aaron, qiksigirauyumiñaqsiḷugu qiñiyunaqulugulu. 3Ququaqsaġitin iluqaisa sanaturualiuŋaratka Aaron annuġarriuqulugu, ilaaguaqtauniksraŋanun aŋaiyyuliqsiqpauniġmun savautisaġluŋa. 4Satqagusiuqsaqtut, aŋaiyyuliqsiqpaum kiapiġutaaniglu, qaliġuamiglu, qupaktamik qaliġuuramiglu, niaquata nimmaaġutiksraŋaniglu, ukiłhaaġiksuamiglu tavsimik. Taapkuniŋa aŋaiyyuliqsiqpaich annuġaaŋiñik annuġaaliuqtuksraurut aniqatignun Aaron-mun suli iġñiŋiñun, savautiyumagaanŋa aŋaiyyuliqsiqpaulutiŋ. 5Sanaturuat savaktit atuqtuksraurut suŋauraaqtuamik, tigluuraaqtuamik, suli kaviqsuamik imnaim mitquanik, ivaluqaġlutiŋ kaviqsuamik manigmik, suli ukił̣haaġiksuamik.
6“Aŋaiyyuliqsiqpaum kiapiġutiliuqtuksraurut suŋauraaqtaamik, tigluuraaqtaamik, kaviqsuamik imnaim mitquanik, kaviqsuamik manigmik ivaluqaġlutiŋ suli ukił̣haaġiksuamik, qiñiyunaqsaŋaruamik qupagnik. 7Malġugnik tuiqqaŋigñi ataruagnik kasullasiḷugik atallasiḷugik saniġaŋigñun. 8Savalluataŋaruaq tavsi tainnasimiñ suli ukił̣haamiñ ataruksrauruq kiapiġunmun atausiusaġlugik aviktamiñ. 9Malġugnik carnelian-nik uyaġaksraġusi aasii titiqtuutilugich atiŋich qulit malġuuruat (12) iġñiŋich Jacob, 10aŋayukłiŋanniñ aglaan, itchaksrat atausimi uyaġagmiillugich suli itchaksrat igḷuani. 11Sanaturuam qiñiyunaqutiliuqtim titiqtuutiyumagaich malġuuruagnun uyaqqagnun atiŋich iġñiŋisa Jacob, aasii turviḷiġlugik uyaqqak kaviqsuamun manigmun. 12Iḷiḷugik tuiqqagutiŋigñun kiapiġutim pisigilugich qulit malġuuruat (12) maŋŋuġiraŋich Israel. Aaron-gum itqaksautaullayumagaich atiŋich tuiqqagmiñi, tainnamik Uvaŋa, Atanġuruaŋa, itqaumasuuyumagitka iñugiratka. 13Kaviqsuamik manigmik turviḷiuġlusi, 14suli malġugnik qivḷiignik kaviqsaamik manigmik piḷiagnik, qipitinŋaruak akłunaatun, aasii kasuqtillugik turviuruanun.
Satqagun
(Exodus 39.8-21)
15“Satqagusiuqsaqtusi Aŋaiyyuliqsiqpauruat Qaukłiŋannun atullaaraksraŋanik sivunniuġumik God-im pisuutaanik. Savaaguruksrauruq atiruamik ukił̣haamik kiapiġutitun suli atikavsaktuanik qupaglugu miquqtanik. 16Kaŋiġalluaġiguni ittuksrauruq suli qugluŋaluni, quliŋŋuġutaiḷanik titiġniñik taktigiluni suli quliŋŋuġutaiḷanik titiġniñik siḷiktigiluni. 17Iḷisiḷusi sisamanik tunulliġiiñik akisuruanik uyaġagnik tavruŋa; sivulliġmi saniġaqłiġiiksuani ruby-mik iḷisiḷusi, topaz-mik, suli garnet-mik; 18tuglianni saniġaqłiġiiksuat, emerald-mik, sapphire-mik, suli diamond-mik; 19piŋayuanni saniġaqłiġiiksuat, turquoise-mik, agate-mik, suli amethyst-mik; 20sisamaŋanni saniġaqłiġiiksuat, beryl-mik, carnelian-mik, suli jasper-mik. Taapkua attaviḷiġḷugich kaviqsuamik manigmik. 21Taapkunani uyaġagni qulit malġuuruani (12) titiqtuutiŋaruksrauniaqtut atillaaŋich iġñiŋisa Jacob, nalunaiġutausaġlugich maŋŋuġiraŋich Israel. 22Satqagun qivḷiḷiuġlugu kaviqsuamik manigiksuamik, qipitanik akłunaatun. 23Malġugnik tigummisiḷiġḷugik aqvaluqtuagnik kaviqsuamik manigmik aasii kasuqtillugich qulaaniittuanun kaŋiġalluŋigñun satqagutim, 24aasii kasuqtinmiḷugik malġuk qivḷik, kaviqsuamik manigmik piḷiak, malġuŋnun aqvaluqtuagnun tigummisignun. 25Allak aasii isuŋik kasuqtillugik qivḷiik malġuuruagnun, tainnaġlugik kasuqtinniaqtuk saaŋanun tuiqqagutiŋiksa kiapiġutim. 26Tavraasii aqvaluqtuagnik tigummisiḷiuġlusi malġugnik manigmiñ kaviqsuamiñ; aasii kasuqtillugik alliuruagnun kaŋiġalluŋigñun satqagutim iḷuata siñaanun saniġaanun kiapiġutim. 27Malġuvsaagnik aqvaluqtuagnik tigummisiḷiuvsaaġlusi kaviqsuamik manigmiñ aasii kasuqtillugik alliuruam sivuġaanun tuiqqagutiŋiksa, kiapiġutim, qaniŋagun kiluata suli qulaagun qiñiyunaqsaŋaruam tavsiata. 28Qiḷiutilugik qiḷiġviŋiññun satqagutim suli aqvaluqtuaŋigñun kiapiġutim suŋauraaqtaamun akłunauramun, satqagun inillalluataġumiñaqsiḷugu tavsiata qulaanun suli qasuraġaŋaiġḷuni.
29“Aaron isiġumi Salumaruamun Inimun, atuġniaġaa taamna satqagun titiqtuutiŋarualigaaq atiŋiñik maŋŋuuruat Israel-mun, tavraasii Uvaŋa, Atanġuruaŋa, itqaumasuuniaġitka iñugiratka. 30#Nu 27.21; Dt 33.8; Ezra 2.63; Ne 7.65.Iḷiḷugik Urim-lu Thummim-lu iḷuanun satqagutauruamun, Aaron-gum saagaġisigaik ullautiraġigumi Salumaruamun Nayuqtauvimñun. Taamna nalautittaġikpan atullaaraksraġigaa satqagun, kaŋiqsiḷugu sivunniutigillaayumagaa pisuutiga Israel-gum kiŋuvaaŋiññun.
Allat Aŋaiyyuliqsiqpauruat Annuġaaksraŋich
(Exodus 39.22-31)
31“Qaliġuaq iḷuaniinniaqtuaq kiapiġutim savaaguruksrauruq iluqani suŋauraaqtaamik imnaim mitquanik. 32Nuiḷaqaqtuksrauruq niaquanun, taamna aasii nuiḷaq ukpirrusiġḷugu aligiitkutaġisaġlugu. 33-34Kiavaluisaaġlugu siñaagun ukpinniŋagun pomegranate-liqsuġlugu suŋauraaqtaanik, tigluuraaqtaanik, suli kaviqsaanik imnaim mitquanik, akunniliqsuġlugich qattauranik kaviqsuamik manigmik piḷianik. 35Aaron-gum annuġaaq atuqtaksraġiniaġaa aŋaiyyuliqsiqpauluni savagaġigumi. Ullautigumi nayuqtauvimñun Salumaruamun Inimun naakka anigumi tavraŋŋa, qattauraqtuaq tusaġnaġniaqtuq, aasii tuqutauniaŋitchuq.
36“Qiñiyunaqusiuġlugu kaviqsuamik manigiksaamik suli titiqtuutilugu ‘Ilaaguaqtauŋaruaq Ataniġmun.’ 37Qiḷiutiluguasii sivuġaanun niaquata nimmaaġutaata suŋauraaqtaamik akłunaamik. 38Aaron-gum atuqtaksraġiniaġaa qaumiñi, tavraasii uvaŋa, Atanġuruaŋa, akuqtullaniaġitka iluqaisa aitchuutigiraŋich Israel-gum kiŋuvaaŋisa ilaaguaqtaġiraŋich uvamnun, iñuich unnii killukuaġaluaqpata aitchuiḷḷaġmiŋ.
39“Nuviqsraġlugu ukił̣haaġiksaamik Aaron-gum qaliġuuraksraŋa suli niaqumun nimmaaġutiliuġlugu ukił̣haaġiksaamik suli tavsialiuġlugu miquġlugu qiñiyunaqsaŋaruamik.
40“Qaliġuuraliuġlugich, tavsialiuġlugich, suli nasaugauranik Aaron iġñiŋiñun, qiksiginaqulugich suli qiññaġiqulugich. 41Atipkaġlugich tamatkua annuġaat aapiyaġnun Aaron-mun iġñiŋiñullu. Aasii ilaaguaqtaġilugich suli nalunaiqsaġilugich uqsruqtaaġlugich olive uqsruanik, savautiyumagaanŋa aŋaiyyuliqsiqpaulutiŋ. 42Ukiłhaaġiksuamik naitchuagnik kamikłuliuġlugich, tiġiksraġvianniñ qiqpaŋiññun aglaan, qiñiġnaŋitchumaut timiŋich. 43Aaron iġñiŋisalu atullaaraksraġiniaġaich Tupiġmukkumiŋ nayuqtauvimñun naakka ullautigumiŋ ikipkaivigmun aŋaiyyuliqsiqpauyyaġlutiŋ Salumaruami Inimi, tuqutauŋitchumaut nuisakpata timiŋich. Taamna tavra itchaġataġniaqtuaq maliġiraksraŋat Aaron-guvlu kiŋuniiŋisalu.
Currently Selected:
Exodus 28: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
