Exodus 12
12
Qulaurrusiqivik
1 #
Lv 23.5; Nu 9.1-5; 28.16; Dt 16.1, 2. Ataniq uqaŋaruq Moses-mun, Aaron-mullu Egypt-mi: 2“Uumani tatqimi atuqtaptinni sivulliġiniaġaa ukium ilivsiññun. 3Qaitchigik ukua piraksriutit iluqaiññun Israel-guruanun: Quliŋŋuqpan uumani tatqimi iñullaa naliġakkisiruq imnaiyaamik naakka nuġġaġmik nagruligmik piksraŋannik igluqatiimi. 4Qitunġaġiich iñukitpata niġiyumiñaiḷḷugu iluqaan niġrun, siḷalliniḷu niġrunmik autaaġumiñaqtuk, naayuqtaaġlugu iñugiaktilaaŋatitun iñuich suli aktilaaŋatun iñullaam niġiyumiñaqtaŋatitun. 5Naliġakkumiñaqtutin imnaimik naakka nagruligmik, aglaan atausimik ukiuqtutilaaqaqtuksrauruq aŋusalluuluni surruutaiḷḷuniḷu. 6Tavraasii, tanuġaaksimman uvlut akimiaġutaiḷaŋanni (14th) tatqim, Israel-gum kiŋuvaaŋich tuqutchiñiaqtut niġrutinik naliġaamignik. 7Iñuich auksraġisirut aasii auguaqtaġlugich iglut upkuaŋich saniġaŋisigullu qulaaŋisigullu nalunaiqsaġlugu niġrutinik iñuich niġġiviksraŋat. 8Taaptumani unnuami niqi argiqsaksraġigaat, aasii niġiḷugu niġġisiġḷugu tipigluktuanik naurianik punniġniglu imaksraiḷaanik. 9Niġiñagu iḷaŋaunnii uiḷaġlugu naakka qalatillugu, aglaan niġiḷugu argiŋaruaq suġaiḷḷugu, taputilugich niaqua, niuŋich, ilaġviŋiḷḷu. 10Uvlaaŋaiñŋaan niġiŋaraksrauruq; iḷakuqaqpan, ikipkaqtaksrauruq. 11Niġiruksraġigiksi qilamiqsruġlusi, qanukkii annuġaaqtuŋaruksraurusi iglaugunnanik, aluġutituġlusi ayauppiaqaġlusiḷu. Tavra taamna Qulaurrusiqinikun Niqinaqivik qutchiksiḷiġutausaqługu uvamnun, Atanġuruamun.
12“Taaptumani unnuami Egypt nunaŋaguaġniaqtuŋa, tuquttaġlugich aŋayukłipayaat aŋutauruat, aŋusalluŋiḷḷu niġrutit, tatavsaġlugiḷḷu iluqaisa god-iŋich Egypt-gum. Uvaŋa Atanġuruŋa. 13Augich upkuavsi avatiŋiñiittuat nalunaiñŋutauniaqtut iglunun iñuuvigiravsiññun. Tautukkupku auk, qulaunniaġivsi suli pimaqłuŋiḷḷusi tatavsaġupkich Egypt-miuguruat. 14#Ex 23.15; 34.18; Lv 23.6-8; Nu 28.17-25; Dt 16.3-8.Itqautiqallaaruksraurusi ukiutuaqpan taaptumani uvlumi niqinaqivigilugu, itqautausaġlugu ilivsiññun, uvaŋa Atanġuruaq, qanuq savaŋatilaamnik. Quviasuutikun itqautigilugu taimuŋa.”
Niqinaqiniq Imaksraiḷaamik Punniġmik
15Ataniq uqallaktuq, “Tallimat malġugni uvluni niġiñiaŋitchusi punniġnik imaksraligaanik—niġiḷusi kisian imaksraiḷaanik punniġnik. Sivulliġmi uvlumi igittuksraġigisi puvlaksautipayaat igluvsiññiñ, qanukkii kiñapayaaq taapkunani tallimat malġugni uvluni niġiruaq imaksraligaamik punniġmik, iḷauŋaiġñiaqtuq iñugiramnun. 16Sivulliġmiḷu tallimat malġuanniḷu uvlut katitkisirusi aŋaiyyusaqtuaġlusi. Sumik unnii savagniaŋitchusi taapkunani uvluni, aglaan niqłiuġumiñaqtusi. 17Nuimaruaġisaġiksi taamna niqinaqiniq, qanukkii itqautauruq taaptumani uvlumi aullautikapkich kiŋuniġiiḷḷaaruat Egypt-miñ. Quviasugviginiaġiksi taamna uvluq niqinaqivigilugu ukiutuaqpan. 18Sivullium tatqim uvluŋaniñ anaqasaaqtuamiñ akimiaġutaiḷamiñ (14th), iñuiññaq atausiannun (21st) aglaan anaqasaaqtuamun, niġiñiaŋitchusi punniġnik imaksraligaanik. 19-20Tallimat malġugni uvluni puvlaksautiqaqtuksrauŋitchusi igluvsiññi, qanukkii kiñapayaaq, nutim tamaani aniŋagaluaġumi naakka allaniŋŋaqtaugaluaġumi, niġituaġumi punniġmik puvlaksautiligaamik, iḷaullayumiñaiġñiaqtuq iñugiramni.”
Sivulliq Qulaurrusiqiniq
21Tavraasii Moses-gum ququaqługich aullarripayaat Israel-gum kiŋuvaaŋich uqautiŋagai, “Iluqasi naliġaktuksraurusi imnaiyaamik naakka nuġġaġmik nagruligmik aasii tuqullugu, qitunġaġiigulusi niqinaqiyumausi Qulaurrusiqiniġmi. 22Ukpiqł̣uuramik piḷusi, ivsaglugu niġrutim auŋanik puggutauramiittuamiñ, aasii nanuutilugu igluvsi upkuaŋisa avaluŋigñullu qulaaŋiññullu. Nalliqsiunnii aniruksrauŋitchuq iglumiñ uvlaaġataqtillugu. 23#He 11.28.Ataniq Egypt-kuaġumi tuqutchaqtuġlugich aŋayukłiich aŋutit Egypt-miut qitunġaġiiḷḷaani, tautugniaġaa auk qulaanniḷu avaluŋiññiḷu upkuat isiqtinniaŋitkaa Isaġulga Tuqqutim igluvsiññun. 24Ilivsiḷu qitunġavsiḷu kamagiruksraġigisi makkua piraksriutit taimuŋa isuitchuamun. 25Nunamukkuvsi Atanġum unniqsuqłiisigiŋaraanun qaiññiaġnivḷugu ilivsiññun, taamna atuqtaksraġigiksi piraġausiq. 26Miqłiqtuvsi apiġikpasi, ‘Sumik una taamna sivuniqaqpa?’ 27Kiuniaġisi, ‘Itqautauruq Qulaurrusiqiniġmun qanukkii Atanġum qulaunŋagaich igluŋich Israel-gum kiŋuvaaŋich Egypt-mi. Tuqunŋagaich aŋayukłiich aŋutit Egypt-miut qitunġaġiiḷḷaani, aglaan aksiŋaitkaatigut uvagut Israel-guruaguut.’”
Tavraasii, Israel-gum kiŋuvaaŋich punŋarut nanġaivḷutiŋ. 28Tavraasii kamaksriŋarut Atanġum piraksriutiŋiññik Moses-mullu Aaron-mullu.
Tuqutaummata Aŋayukłiuruat
29 #
Ex 4.22, 23. Unnuaq qitiqqaġman Atanġum tuqunniġaich iluqaisa aŋayukłiuvlutiŋ iġñiġuruat Egypt-mi, Pharaoh-m iġñiŋaniñ, iġñiŋanuaglaan tigutaaqtauruat tigutaaġvigñi; iluqaisalu aŋusalluqqaaŋich niġrutit tuqutauŋaniqsut. 30Taaptumani unnuami, Pharaoh, qaukłiuraŋiḷu, iluqaġmiglu allat Egypt-miut iqiiŋarut aasii iḷitchuġivlutiŋ iġñitiŋ aŋayukłiich tuquŋamaruat. Nipatuvlutiŋ qiaruaqaŋaruq Egypt-mi, qanukkii iglupayaurani tuquruaqaŋaruq. 31Tavrani unnuami Pharaoh-m qaitquŋagaik Moses-lu Aaron-lu aasii uqallautivlugik, “Aullaġitchi, iluqasiglu Israel-guvlu kiŋuvaaŋich! Unitchiuŋ manna nunaga; aullaġlusi nanġaġiaqsiuŋ Ataniq, apiqsriavsisun. 32Aullautilugich niġrutipayaat pamiqsaasi, aullaġitchi. Aŋaiyyutiluŋalu ikayuusiaqaquluŋa.”
33Egypt-miuguruat aullaqupiallaŋagai iñuich qilamik nunamigniñ; uqaqhutiŋ, “Iluqatauvva tuquniaqtugut aullaŋisuaġuvsi.” 34Tavraasii iñuich punnilivitiŋ immiqsuqługich puvlaksautaitchuanik akutanik, puuqługich annuġaanik, nanmakkiutiŋagaich. 35#Ex 3.21, 22.Israel-gum kiŋuvaaŋich kamaksriŋarut Moses uqallautaanik, suli qasiḷiŋarut Egypt-miuguruaniñ kaviqsuaniglu qatiqtuaniglu manigñik piḷianik qiñiyunaqsautinik annuġaaniglu. 36Atanġum qiksikkutiqaqtinŋagai Egypt-miuguruat iñugnun aasii aitchuqtiłługich apiqsriaġiraŋiñik. Tainnaqhutiŋ Israel-gum kiŋuvaaŋich aullaurriŋarut umialgutiŋiñik Egypt-miut.
Israel-gum Kiŋuvaaŋich Aullaqtut Egypt-miñ
37Israel-gum kiŋuvaaŋich aullaŋaniqsut pisukataqhutiŋ Rameses-miñ Sukkoth-muksaqhutiŋ. Iñugiaktigikavsaŋarut 600,000-tun aŋutit, kisitkaluaġnagich aġnallu miqłiqtullu. 38Iñugiakpaktuat iñuich iñugiaktuallu niġrutit pamiqsaat aullaqatigiŋagaich. 39Kukiuŋagaich puvlaksautaiḷaat punniġich akutaniñ qaġġirramigniñ Egypt-miñ, qanukkii uvva tavrauvvaa aullaqurauvlutiŋ Egypt-miñ itqanaiyaġviiñŋarut-unnii niqiksramignik naakkaunnii puvlaksialiuġviksraitchut.
40 #
Gn 15.13; Ga 3.17. Israel-gum kiŋuvaaŋich iñuuniaŋarut Egypt-mi 430-ñi ukiuni. 41430-iuruat ukiut naanmata, iluqaġmiŋ Atanġum iñuŋiñun aullaŋarut Egypt-miñ. 42Taaptumani unnuami Ataniq munaqsriŋaruq aullautisaqamigich Egypt-miñ; tavraasii taamna unnuaq ilaaguaqtauruq Israel-gum kiŋuvaaŋich nipuŋaiġviksraŋat ukiutuaqpan qutchiksiḷiġutausaqługu Ataniġmun.
Maliġuagaksrat Qulaurrisiqinikun
43Atanġum uqautigaik Moses-lu Aaron-lu, “Uvva ukua Qulaurrisiqinikun maliġiraksrat: Israel-guŋitchuaq niġiñiaŋitchuq Qulaurrisiqinikun niqinik, 44aglaan kivgauruam tauqsiŋaravsi niġiyumiñaġaa nalunaiḷutchiqsauganikkumi. 45Iñuuqatauyyaqtuam sivikisuuramik naakka savaktauruam akiññaksaqhuni niġiñiaŋitkaa. 46#Nu 9.12; Jn 19.36.Iluqaan niqłiaq niġiraksrauruq iglumi niqłiuġvigmi; annisuutiraksrauŋitchuq. Suli naviktaksrauŋitchut niġrutim sauniŋich. 47Iluqaġmiŋ Israel-gum kiŋuvaaŋich itqautaulugu niqinaqivigiruksraġigaat, 48aglaan kiñaunnii nalunaiñŋutchiqsauŋaitchuaq niġiyumiñaitchuq. Iñuk Israel-guŋitchuaq akunnavsiññi iñuuniaqsaŋaruaq suli iḷausuktuaq niqinaqikpata Qulaurrusiqivigmi qutchiksiḷiqsaġlugu Ataniq, nalunaiḷutchiqqaaqtuksraġigisi aŋutipayaat igluqatiiŋich. Aŋalataksraġiniaġaat nanmiñiq Israel-guqatigiruatun aasii iḷaullasiḷugu niqinaqiruani. 49Maliġiraksrat atiniaqtut Israel-guruanun Israel-guŋitchuanullu iñuunialiŋaruanun akunnavsiññi.” 50Iluqaġmiŋ Israel-gum kiŋuvaaŋich kamaksriŋarut Atanġum piraksriutaanik Moses-mullu Aaron-mullu. 51Taaptumani uvlumi Atanġum aullautiŋagaich Israel-gum kiŋuvaaŋich Egypt-miñ.
Currently Selected:
Exodus 12: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
