Iosua 24
24
Diqaba puena waidie me Isileli ietalaqa me Kenani taiauda. Tupwaidiavo tomo'otoqa iluvewapadi we tupwaidiavo iyatodi taiauda imiamia. Matautauda Kenani pwayapwayana ituyei manuqa 12 waidie. Me Isileli me Kenani ditaoni wete divanuqa iyoqonidi ikewadi waidie imia. Diqaba puedi ikakava Iosua me Isileli isikauqa-vaituqanidi.
Me Isileli ivonadabadaba Iave inavekimataneni
1Mulineye Iosua me Isileli manuqa matatabudi ivonedi inamai inavaqakauqa Sikemi taoni waineye. We tutuyanina ilekwa, Iosua iqoledi tomoqovo bwaigidi, togumetavo, loina kanatokalaqei wete tokisavekavinavo Iave mataneye inatovoi.
2We Iosua ivesipupu tomo'otoqa matatabudi waidie ivo, “Iave me Isileli da Yaubada ivesipupu ivo, ‘Basenaqaida tubumiavo Tila menatunavo Ebelamo wete Naoli imiamia Bwasi Iupelesiti vikaineye, we yaubadavo sulidi waidie isobwasobwanu. 3#Kaba 12:1-9; Kaba 21:1-3We Yau tubumi Ebelamo amaseagai Iupelesiti pwayapwayana waineye'eqa akedagumeteni amaieni Kenani pwayapwayana waineye. Natuna Aisake wete tubuna Iakobo waidie'eqa tubuleleleqinavo puedi aveleni.
13“ ‘Pwayapwayanina avelemi ge waidie kwadabagubagula kaia kwakanikanimo, oine vuana wete olibe vuana waidie kwakanikani we ge kwadabagubagulidi kaivuavuaqanidiavo. We taoni bwaigidi avelemi ge waidie kwadayoqona kaia kwamiamiamo.”
14Wete Iosua me Isileli ivonedi ivo, “Iave kwaivekimataneni, nuapoumi matatabunaeqa kwailitulituqa paipaina. We yaubadavo kwaibailedi base tubumiavo waidie isobwasobwanu tutuyanina imiamia Bwasi Iupelesiti vikaineye wete Itipita waineye. We Iave kaisena kwaivekimataneni. 15Kago Iave kanasobwanu kwaibaila-otoqa deqoina miyaubada kwaivesinueni, vakai yaubada wayaqimi. Banikodiqa, wayaqimi yaubadanidiavo base tubumiavo waidie isobwasobwanu Bwasi Iupelesiti vikaineye, o wayaqimi me Amoli diyaubadavo dipwayapwayanina waineye kwamiamia? We yau wete gususuvo tutuya matatabuna Iave kaivekimataneni waineye kaisobwasobwanu.”
16We tomo'otoqa ibaivila ivo, “Kima ge kanasala Iave kaibaileni tupwaidiavo yaubada waidie kaisobwanu. 17Paina Iave ma Yaubada kima wete tubumavo iketoyavuma tutuyanina Itipita naqeneye kaetolituqa-maimaiqa. Wete kabanuavilele bwaigidi ivalabubunidi matameye. Tutuyanina kanaqonaqo pwayapwayamaiqe kamaqaviavo gamwadie ivekisabodebodema. 18Iave kaisena me Amoli wete tupwaidiavo kabaloina dede pwayapwayanina waineye imiamia ikwavinedi isauyedi, beqa kima wete Iave kaiseotoqina kaivekimataneni ma Yaubada.”
Currently Selected:
Iosua 24: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
