Loina Kanaveluqa 7

Me Isileli Iave natomo'otoqavo

1 # Aposi 13:19 Mosese me Isileli ivonedi ivo, “Tutuyanina Iave mi Yaubada inamaiemi pwayapwayanina kwaikewai, kabaloina 7 inakwavinedi inasauyedi, gumanidiavo bwaigidi wete veluvelulunidi matautauda komi. No kabaloinanidiavo: Ititi, Gagasaiti, Amoli, Kenani, Pelisaiti, Aibaiti wete Iebusi. 2Dede kabaloinanidiavo Iave mi Yaubada inakalaqeiedi waimie kwaivelulunapeledi we kwailaumutula-kakavadi.#7:2 Iave wayaqina me Isileli inavemaqeta beqa valavalabubuna tokwalui wete kaditosobwanuvo inaluvelakovidi. We ge taiauda kwaiveiana wete kwaivenua'ina'inaqeyedi. 3Ge kwainaqidi tomo'otoqanidiavo. Wete ge natumiavo vevinediavo kwaitagwanedi natudiavo lamoqidiavo inanaqidi wete natumiavo lamoqidiavo ge kwaitagwanedi natudiavo vevinenidiavo inanaqidi. 4Dede valabubunanina waineye natumiavo inasiviledi ge Yau waigue inasobwanu we inanaqo yaubada sulina waineye inasobwanu. Kago mesaida Iave kanakapoka inaoqala vedimadimanaeqa inalaumutulimi.

5“Komi dede mesaida kwaivalabubunedi waidie: dididiqa velomu kabakanigabu kwaitutu'ueuedi, digileu maqemaqetana kwaitutumugumuguya, dikoqala Asela dikabasobwanu kwaitalaqidi wete ditokwalui kwaitunudi inakalaidi. 6#Isa 19:5Komi dede mesaida kwaivalabubunedi paina komi Iave mi Yaubada natomo'otoqa, ivesinuemi wete iyatokemi tomo'otoqa matatabudi pwayepwayeye waidie'eqa, komi natomo'otoqa nuapouna.

7“Iave wayaqina komi tomo'otoqanimiavo, ivesinuemi ge mikabaloina bwaigina paipaina, komi mimanuqa siai-otoqina mulineye tupwaidiavo kabaloina. 8We Iave mwaqitana ivenapwayewemi wete sakunidiavo ivonadabedabedi kanawavaqaeqa tubumiavo waidie inuanuanidi. Beqa navelulunaeqa iketoyavumi ikewaluguaqetemi Itipita Pelo naveluluna waineye'eqa, gumanina iloloinemi vikainina waineye kwavetolituqa-maimaiqa. 9#Isa 20:5, 6; 34:6, 7Beqa kwaiyagova-vekavekaia Iave mi Yaubada mwaqitanaotoqa Yaubada, natomo'otoqavo ge inabailedi o nuana inavulu. We vakai ivonadabedabedi mesaida inavalabubuni. We meqavoi inavenapwayeweni wete naloina inavekimatanedi, Yaubada navenapwayewa ge menasivilavila inaketo'iwaqi waidie inadamana inanaqo tubuleleleqidiavo 1,000 lagata imaimai waidie. 10We meqavoi ivedumwekaikaieni vedimadimanaeqa inakaimatavuloqidi we inaleodi. 11Beqa loina wete vemataluana matatabuna deqoina avonevonemi kwaivekimatana-vekavekaiedi.”

Currently Selected:

Loina Kanaveluqa 7: mzz

Highlight

Copy

Compare