Romə 6

Nu ə haa nɛ̨ŋɛ̨n ma da yɛnɛ̨ɛ̨ kɛɛ Jesus laa hu

1Gwa pɛli kɛi lə: Akɛti, mąąnɛ̨ɛ̨ gu kɛ lɔ nɛ̨ŋɛ̨n ɉəɠə munɛ hu ə gɛ Yálá nwɔ mɛ̨inɛ̨ɛ̨ hu ə kɛnɛ̨? 2Gɛ́ diɛ: Kpaa! Akɛ gwaa haa nɛ̨ŋɛ̨n ma, gwa pɛli nwɔ̨nɔ̨ yɛnɛ̨ɛ̨ kɛ pələ kɛi ləi nɛ̨ŋɛ̨n Ɉu? 3A wala kɛti, ka hvo gɔlɔn kaa diɛ guɔi daa gu mąąwaa Jesus Kristə laa hu nwɔ haai mąą pɔɔ kɔ́ɔn ga ti gwaa gɛ? 4Nwɔ haai mąą pɔɔ kɔ́ɔn ŋɛ̨i gu gɛ a mąąwaa, gwaa nɛ guɔ ma: Gwa diɛ ni gwaa haa, daa gu loo. Yɛ bələi ti Kristə ə kulɔ la haaɓɛlaa lɔwai Nąn nwɔ mąąwiɛ hu, guɔ kpɛli, gwaa yɛnɛ̨ɛ̨ kɛ pələ nįnɛ̨ hɔlɔɓo.

5Mąąhɔlɔɓo, akɛ gwaa kɛ yɛ Kristə, nwɔ haai mąą pɔɔ kɔ́ɔn Ɉu, pələ lɔ ɓə gu kaa pai gu kɔ́wɔ ɉii la ma yɛ pələi ə muhəɠə la ə kulɔ haaɓɛlaa lɔwai. 6Mąąnɛ̨ɛ̨ ka gu mɛ̨nį ŋɛ̨i kpaɠala kaa a nɛlɛɛ: Gu kɛ pələ pɔlɔi wɔlɔ gu kɛ ɉu, yili ka ti gu nɛɛ Kristə ɓa yɛ haa la wulu ɓa. Ə gɛ nɛ̨ŋɛ̨n gɔlɔi ti hu ə kala, ə lɛɛ, gu hvo kɛa kɛ a nɛ̨ŋɛ̨n nwɔ luwɔɠaa. 7Mąąhɔlɔɓo, nui aa haa, nwun mąą a ɓo nɛ̨ŋɛ̨n ɲəi. 8Akɛ gu laai na guɔ diɛ gwa Kristə a ni gwaa haa gu kee pɔ, gu laai na guɔ diɛ gwa diɛ ni gu kaa pai yɛnɛ̨ɛ̨ kɛi gee pɔ. 9Gu gɔlɔn guɔ diɛ kulɔi ŋɛ̨i Kristə ə mo haa yəi, hvo kɛa pai pənəi hvo haa; haa nwɔ huwalawala hvo kɛa mɛ̨i. 10Haai ti ə mo, ə haa lɔ tanɔ̨n nɛ̨ŋɛ̨n mąą mɛ̨nį ɓa. Kɛlɛɛ, ɲɛnɛ̨ɛ̨ ti kɛa gaa gɛi, gaa gɛi Yálá ɓa. 11Kaa kpɛli mɛ̨n, ka ka kpɔɔ kaa yɛ ka haa nɛ̨ŋɛ̨n ma, ka yɛnɛ̨ɛ̨ kɛ Yálá ɓa Jesus Kristə laa hu.

12Mąą hvo nɛ̨ɛ̨li nɛ̨ŋɛ̨n və kɛa tɔɔlaa kɛ ka mɛ̨i pələi mɛ̨n ka káá pai haai la, ə gɛ, ka hvo pa hvilɛn kɔ́lɔ liiɓa pulu kaa gɛ. 13Ka hvo ka tɔɔ-tɔɔiɠaa ta lɛɛ laa hvo kɛ a nɛ̨ŋɛ̨n nwɔ tiɓo kɛhɛn, yii a kɛ mɛ̨nį ɲɔ̨n gɛi la. Kɛlɛɛ yaamunn, ka ka kpɔɔ tɛɛ Yálá pɔ yɛ nuąi daa kulɔ haa hu daa kɛ a di húlu. Ka ka kɔ́lɔ nąą kəlee lɔ nwɔ tiɓo hu, ə gɛ, yii gaa a tələnmo mɛ̨nį ka yili kɛ. 14Mąą hvo nɛɛ li nɛ̨ŋɛ̨n və tɔɔlaa kɛ kɛa ka mɛ̨i, mąąhɔlɔɓo, ka hvo kɛa tɔ́n mu, kɛlɛɛ, ka káá kɛa mɛ̨inɛ̨ɛ̨ mu.

Tələnmolaa nwɔ luwɔ

15Akɛti mąąnɛ̨ɛ̨ kɛa guɔ nɛ̨ŋɛ̨n ɉəɠə mun mąąhɔlɔɓo, gu hvo kɛa tɔ́n mu gu kaa Yálá nwɔ mɛ̨inɛ̨ɛ̨ mu? Gɛ́ diɛ: Kpaa! 16Ka hvo gɔlɔn kaa diɛ akɛ ya kɛi tiɓo kɛ nu ɓa ə gɛ ə́ nwoo hon, ə́ kaa ɲəi yɛ luwɔ. Yili ɓaa yɛ: Nɛŋɛ̨n yii a nu lɔ haa hu, a wala kɛti, Yálá woo honŋąa yɛnɛ̨ɛ̨ kpɛɛ hvo mą a nu lɔ tələnmo laa hu. 17Kɛlɛɛ, kaa gu Yálá hɛɠɛɛɓo! Mąąhɔlɔɓo, ka kɛ tɔlɔɔ nɛ̨ŋɛ̨n nwɔ luwɔlaa hu, kɛlɛɛ, niɛwoo ŋɛ̨i di galan kaa ka ka yee hee mu, ka nwoo hon a ka lii kəlee. 18Kaa kulɔ nɛ̨ŋɛ̨n nwɔ luwɔlaa hu, kaa kɛ a tələnmolaa nwɔ luwɔ. 19Ka wɔ hvii kpɛɛ laa mąą mɛ̨nį ɓa, gáá nwooɠaai ŋɛ̨i ɓoi kaa a nu kiliŋąhiɛ. Pələi ti tɔlɔɔ ka ka kpinį kəlee kɛ la a mɛ̨nį ɲɔ̨n nwɔ luwɔ, kaa ka kwɛli tee Yálá ɓa, yiihu kɛa ka ka kpinįi kəlee kɛ a tələnmolaa nwɔ luwɔ, ə gɛ, ka wɔ yɛnɛ̨ɛ̨ kɛ pələ ə kɛ a Yálá liiɓa.

20Ɓɛlɔwai ka kɛ la nɛ̨ŋɛ̨n nwɔ luwɔlaa hu, ka hvo kɛ a tələnmolaa nwɔ luwɔ, 21tɔ̨nɔ̨ ləi ɓə ka ɉɔlɔɓo ɉu? Háákələi yili kɛ nwumɛ̨ kaa kaa, mąąhɔlɔɓo, ɲąąkpɛɛi ɓaa haa. 22Kɛlɛɛ yiihu kɛa, kaa kulɔ nɛ̨ŋɛ̨n nwɔ luwɔlaa hu. Kaa kɛ a Yálá nwɔ luwɔɠaa; tɔ̨nɔ̨ yii gaa ɉu ya ɓaa: Kaa kɛ a Yálá liiɓa mɛ̨nį kɛ nuą, yili ɲąąkpɛɛi ɓaa yɛnɛ̨ɛ̨ kpɛɛ hvo mą. 23Mąąhɔlɔɓo, nɛ̨ŋɛ̨n vɛla ɓaa a haa, kɛlɛɛ, Yálá nwɔ mɛ̨inɛ̨ɛ̨ ɓaa yɛnɛ̨ɛ̨ kpɛɛ hvo mą, yii gwa ɉɔlɔɓo gu Ną́mu Jesus Kristə laa hu.

Currently Selected:

Romə 6: BKPG

Highlight

Compare

Copy