Romə 5

Liilaa kaa gwa Yálá ni gu lɔwai

1Laa na laa háálai, gwaa kɛ a tələnmo nuą Yálá ɲɛ̨i ɓa. Liilaa aa kɛ gwa diɛ ni gu lɔwai gu Nąmu Jesus Kristə laa hu. 2Ɉaalai, gwa pɛli kɛa gu mąą lɛɠɛ Yálá ɓa, laa na laa pɔ pələ, nwɔ mɛ̨inɛ̨ɛ̨ hu ɓə, gwa gu kpɔwɔɲąą kɛnɛ̨, a kilitɔɔmąąlaa Yálá mąąwiɛ pələ hu. 3Yili pulu, mɔ̨nɔ̨ɠaai laai guɔ, gu kwəi a nɛ̨ɛ̨ ɉu. Mąąhɔlɔɓo, gu gɔlɔn guɔ mɔ̨nɔ̨ mį́ɛ hu ɓə, liikpələ kaa laa. 4Liikpələ ɓə a tɔɔ a nwąnąilaa tɛɛ nu pɔ hukɔɔn mɛ̨nį hu, kulɔ nwooɓa yɛ kilitɔɔmąą laa huwalawala. 5Kilitɔɔmąą laa yaan hva nu ɓowo. Gbala ə tɔɔ, Yálá ə nwɔ wɛlikɛmąąlaa yɛɛ gu nįį pɔ Nįį-Mąąhəɠɛɛ háálai, yai ə dɛɛ gu pɔ.

6A tɛ̨ą, ɓɛlɔwai hvaŋą hvo kɛ la gu yəi, Yálá nwɔ yələi ə ɉəɠə ɉu ɉəliɛ, Kristə ə haa mɛ̨nį ɲɔ̨n gɛ nuą mąą mɛ̨nį ɓa. 7Nu hva pɛli haai tələnmomun mąą mɛ̨nį ɓa. Gbəli hu nu ta a pɛli ə niikpələ ə haa nu túwɔ́ pələ lɛlɛɛ ta mąą mɛ̨nį ɓa. 8Kɛlaa, bələi Yálá ə nwɔ wɛlikɛmąąlaa lɛ la guɔ, bələ ka: Ɓɛlɔwai gu kɛ la a nɛ̨ŋɛ̨n ɉəɠə nuą, nąąlɔwai ɓə Kristə ə haa la gu mąą mɛ̨nį ɓa. 9Ɛlɛɛ, yiihui ŋɛ̨i, aa gu mąąhəɠə la a ɲąmą, gu hvomun təɠa kɛ yii ŋɛ̨i kɛa, gaa pai gu nwun mąąɓoi la Yálá nwɔ lííholi yəi. 10Akɛ, ɓɛlɔwai gu kɛ la a Yálá ɲowoɠaa Yálá Lon ə haa ə gu lɔwai pɔnnaa kulɔ gwa Yálá ni, yiihui ŋɛ̨i kɛa, gwa Yálá ni gwaa nɛɛ, gu nwun mąą aa ɓo Non ɉaalai. 11Yili pulu yii gaa laa ya ɓaa: Gwa gu kpɔwɔɲąą Yálá mɛ̨nį hu gu Nąmu Jesus Kristə háálai, yaai gwa diɛ ni gu yee lɔ gee hu.

Adamə da Jesus Kristə

12Yɛ bələi gaa la, nu laa pɔɔ ɓə nɛ̨ŋɛ̨n nɔ yɛnɛ̨ɛ̨, mąą nui ɓaa Adamə, nɛ̨ŋɛ̨n ɲaan, ə pa a haa; yili ɓə gɛ haa yɛ həli nu kəlee ɓa, mąąhɔlɔɓo, nu Kɛlaa daa nɛ̨ŋɛ̨n ɉəɠə. 13Nɛ̨ŋɛ̨n ə gbɛa kɛ yɛnɛ̨ɛ̨, gɛɛ dɔ́n Ɉɛɓɛ́ hvo kɛ pai. Kɛlaa, dɔ́n və ni kɛ laa, nɛ̨ŋɛ̨n mąą mɛ̨nį hvo kɛli ɓo. 14Kɛlaa yaamun, ə həɠə Adamə nwɔ yələ ɓa ə həli la Moisə ɓa, haa ə kɛi tɔɔlaa kɛ nu kəlee mɛ̨i. Bələi mąn nu kəlee hvo Yálá woo tee la ɲą yɛ bələi Adamə ə gɛ la. Nui kɛi pa hɔlɔɓoi, Adamə ə kɛ a bɔɔ kɔ́ɔn. 15Kɛlaa, Adamə nwɔ hɔn ɲɔ̨n, hvo kɔ́ɔn ni Yálá nwɔ mɛ̨inɛ̨ɛ̨ ɓa. Nu tamąą haa a nu tɔ̨nɔ̨ laa pɔɔ, yili kaa tɛ̨ą. Kɛlaa, Yálá nwɔ mɛ̨inɛ̨ɛ̨ kɛnɛ̨ɛ̨i, ɛlɛɛ, mɛ̨inɛ̨ɛ̨ gɛ nu tamąą ɓa, ə gɛ diɛ nu tɔ̨nɔ̨ gbən háálai, ya ɓaa a Jesus Kristə. 16Yálá nwɔ mɛ̨inɛ̨ɛ̨ mɛ̨nį kɛnɛ̨i ə tɛɛ la nu tanɔ̨n ti ŋą nɛ̨ŋɛ̨n ma; yai vəla ɓaa a, Nwun na pili. Nu tamąą di wɔ nɛ̨ŋɛ̨n ɉəɠɛɛ pulu, mɛ̨inɛ̨ɛ̨ Yálá aa gɛ guɔ, vəla ɓaa, a mąąhəɠəlaa. 17Nu tanɔ̨n ti hɔn mə gɛ, haa yɛ hvilɛn nu kəlee pulu. Kɛlaa, Jesus Kristə tanɔ̨n gbən ɉaalai ɓə, gwaa mɛ̨nį lɛlɛɛ tamąą hɔlɔɓo la. Nuąi da Yálá nwɔ mɛ̨inɛ̨ɛ̨ hɔlɔɓo da tələnmolaa, da yɛnɛ̨ɛ̨ hva kpɛɛ hɔlɔɓo da tɔɔlaa Kristə laa hu.

18Yili ɓa, bələi lɔ Adamə yaa tɔ̨nɔ̨ gbən ɉɔn ə nu kəlee nwun na pili la, bələ lɔ ɓə, Jesus Kristə nwɔ tələnmo túwɔ́, aa nu kəlee ɓalo Yálá nwɔ kitii ɓa, ɛlɛɛ, yɛ ɓalo hva kpɛɛ tɛɛ di pɔ. 19Yɛ bələi nu tɔ̨nɔ̨ nwɔ kulɔ nwoo mu laa, ə nu kəlee kɛ la a nɛ̨ŋɛ̨n ɉəɠə nuą, bələ lɔ ɓə nu tɔ̨nɔ̨ nwɔ lɛɛ nwoo mu laa, a nu kəlee kɛ la a tələnmo nuą.

20Dɔ́n ə pa, nɛ̨ŋɛ̨n mąą ponoi. Kɛlaa, ɓɛi nɛ̨ŋɛ̨n ɉu ə kɛnɛ̨ laa, Yálá nwɔ mɛ̨inɛ̨ɛ̨ gboloon ə laa laa. 21Ya ɓə gɛ, yɛ bələi nɛ̨ŋɛ̨n ə hee la gu mɛ̨i a haa, bələ lɔ ɓə Yálá nwɔ mɛ̨inɛ̨ɛ̨ a tɔɔlaa kɛ la tələnmolaa háálai, ə gɛ, ə li a guɔ yɛnɛ̨ɛ̨ hva kpɛɛ hu, gu Ną́mu Jesus Kristə háálai.

Currently Selected:

Romə 5: BKPG

Highlight

Compare

Copy