Romə 16
16
Túwɔ́-woo
1Gáá gu mąąhala Febe mąą mɛ̨nį laa həlii káá, yai a Sankre Yálá kpɔn ŋą tínɛ̨ą. 2'Ká ka yee hee mu gu Nąmu laa hu, yɛ bələi da gɛ la a nu mąąhəɠɛɛ; 'ká kpɔnmąą tɛɛ bɔ ganąn mɛ̨nįɠaa kəlee hu. Hvo gaai, yaa kpinįlee ti, aa kpɔnmąą tɛɛ nu tamąą pɔ, gəlee ə mą kɛ ŋą́ą́ Polə.
3Gáá Priska da Akilasə di túwɔ́ɓoi diɛi di kaa a mɛ́laani Jesus Kristə nwɔ tiɓoi hu. 4Diɛ ɓə kɛi pa haai mą́ą́ mɛ̨nį hu. Ɲą́ą́ dɔ̨nɔ̨ hvei di mąmą ɓoi; ɲąą kwa gbɔnŋaai di kaa huwu takpɛliɠaa lɔwai kwa diɛni ɓə. 5Yálá nwɔ nuąi da kɛ di ɲąąkpɔn ɉii di yəi bɛlɛ́n, ŋą́ di tuwɔ ɓo. Epenɛtə yai ɲee hee Kristə mu tɔlɔɔ Asi lɔi hu, ŋį́ duwɔ ɓo. 6Ŋą́ Mari tuwɔ ɓo, yai mɔ̨nɔ̨ tamąą mįi ka mąą mɛ̨nį ɓa. 7Ŋą́ Andronikusə da nɛ̨ą Ɉuniasə di tuwɔ ɓo, diɛi di kaa a nwɔ nuą, kwa diɛni ku kaa gaho tɔ̨nɔ̨ ŋą. Di gbɛa kɛ a Kristə nwɔ kɛlaɠaa dɔ́wɔ́.
8Ampliatusə yai nwɛlikaa mą́ą́ gu Ną́mu hu, ŋį́ duwɔ ɓo. 9Urbɛn yai gwa diɛni gu yee kaa kóló tɔ̨nɔ̨ ɓa Kristə hu, da nwɛ́likɛmąąmun Stakisə ŋą́ di duwɔ ɓo. 10Apɛlɛsə yai nwɔ laa na laa lɛ Kristə hu, ŋį́ duwɔ ɓo. Ŋą́ Aristobulə da ɲəi bɛlɛ́n nuą di túwɔ́ɓo. 11Ŋą́ nąn non Herodiɔn tuwɔ ɓo. Ŋą́ Narsisə da ɲəi bɛlɛ́n nuąi gu Nąmu hu di túwɔ́ɓo. 12Ŋą́, Trifɛnə da Trifosə diɛi tíi gu Ną́mu ɓa, ŋį́ di tuwɔɓo. Ŋą́, Pɛrsisə yai tíi gu Nąmu ɓa kpɔ kɛnɛ̨ dúwɔ́ɓo. 13Ną́mu nwɔ tiɓomun gɛnɛ̨i a Rufusə ŋį́ duwɔɓo, ŋį nee tuwɔɓo, yai a kwa yaa ku lee. 14Ŋą́, Asinkritə, Flegɔn, Hɛrmɛsə, Patrobasə, Hɛrmasə, da gu nąn nonnii da diɛni di kaa laa, di túwɔ́ɓo. 15Ŋą́ Filologə da Ɉuli, Nere da mąąhala, Olimpasə da nu mąąhəɠɛɛɠaai da diɛni di kaa laa, di túwɔ́ɓo.
16Ka ka keeni yee tuwɔɓo, a wɛlikɛmąąlaa. Kristə nwɔ kpɔn kəlee kaa ka tuwɔɓoi.
Liɛwoo kpəli
17Ną́n nonnii, gáá ka liɛwoo ɓoi, gɛ́: nuąi di kaa a kɔ́wɔ tuwo kwɛni, diɛ ɓɛlaɓo too ka lɔwai, dɛ̨ąwooi di ka mąąkwɛlima daa nɛɛ laa, ka ka kpɔɔ mɛ̨i kaa di mąą mɛ̨nį ɓa; 'ká ka mąą kwɛa diɛ. 18Mąąhɔlɔɓo, nu huwuɠaai ti di hvo tíi gu Ną́mu Kristə ɓa, kɛlɛɛ di kaa tíi di koolon ma. Da kɛ nuą ɓowoi diɛ di mąątɛ̨nɛ̨ a woo nɛɛ-nɛɛɠaa. 19Nu kəlee kili kaa ɉu diɛ ka woo mɛ̨n naa kɛ. Ká mąą mɛ̨nį a gwə́inɛ̨ɛ̨, yii gáá bɔ ya ɓaa ka kɛ a kilimąą nuą, ka mɛ̨nį lɛlɛɛ kɛ ka mɛ̨nį ɲɔ̨n mąą laa. 20Ɉu hvo kɛa kwɛa li Liilaa-Yálá, yɛ pa ɓilihi nwun nwoloi ka kɔ́wɔ mu.
Gu Ną́mu Jesus nwɔ mɛ̨inɛ̨ɛ̨ ə kɛ ka pɔ!
21Timote yai kwa yaa ku kaa kólo kɛi gee ɓa, yɛ ka tuwɔ ɓo, ə mą kɛ Lusiusə, Ɉasɔn, da Sosipatrɔsə diɛi di kaa a ŋą́ nuą, diɛ kpɛli diɛ ka túwɔ́ɓo.
22Ɲą́ą́i a ɉɛɓɛ́kɛmun Tertiusə, gáá ka tuwɔ ɓoi, gu Nąmu laa hu.
23Gaiusə yai a nwɛ̨́ą́ ną́mu, yɛ ɓo a gbɔn nwɛ̨ą nąmu, yɛ ka túwɔ́ɓo. Erastə yai a daa hɛngɔw laikɛ mun, yɛ ka tuwɔ ɓo, ə mą kɛ, gu nąn non Kuartusə yaa kpɛli, yɛ ka tuwɔ ɓo.
24Gɛ́ gu Ną́mu Jesus Kristə nwɔ mɛ̨inɛ̨ɛ̨ ə kɛ ka kəlee ka pɔ.
Ɲələ wala too woo
25Nui a pɛli ka huwalawalai, yɛ bɛli nwɛlɛɛ lɛlɛɛi gáá naa həlii mą, yai vilɛn ŋąą Jesus Kristə ɓa, yɛ bələi mąą mɛ̨nį lowuɔ kaa la, a wɔlɔ-wɔlɔ mɛ̨nį, 26kɛlaa yiihu kɛa, mɛ̨nįi ti aa too ponoŋą, huwu takpɛliɠaa diɛ, Yálá kwəi mɛ̨nį hukulɔ nuą di wɔ hɛɓɛ́ pɛ̨ɛ̨ hu, yɛ bələi kpɔlɔ Yálá ə mo la, di laa na di lɛɛ nwoopulu.
27Yálá tanɔ̨n gbən yai mɛ̨nį kəlee kɔ́lɔn, mąąwiɛ ə kɛ mą, Jesus Kristə laa hu, a yələ kəlee! Ə kɛ ti.
Currently Selected:
Romə 16: BKPG
Highlight
Share
Compare
Copy
Want to have your highlights saved across all your devices? Sign up or sign in
