Romə 15

Ka ka kee ni mąą liihɛlɛn Ɉee

1Guɔi ŋɛ̨i huwalawala kaa gu yəi laa na pələ mɛ̨i, manɛɛ gu kpɔnmąą tɛɛ hviikpɛɛ nuą pɔ; gu di hvaŋą lɔ, gu hvo gu kpɔɔ liiɓa kɛ! 2Mąąnɛ̨ɛ̨ gu gu kiliŋąhiɛ gu ɓɛlaa di wɔ mɛ̨nį lɛlɛɛ ɓa, ə gɛ, gu dɛ tɔwɔ laa na pələ mɛ̨i. 3Mąąhɔlɔɓo, Kristə hvo kɛ gbɔwɔ liiɓa kɛ li yɛnɛ̨ɛ̨, kɛlaa, yɛ pələi bɛ̨ɛ̨ la Yálá lawoo hɛɓɛ́ hu yɛ mą: «Ə lalan di mo, ɲą́ą́ ɓə di kɛ mą́ą́.» 4Yaan mɛ̨nįɠaai kpɔ bɛ̨ɛ̨ Yálá lawoo hɛɓɛ́ hu, di gəlee pɛ̨ɛ̨ gu mąąkwɛli mɛ̨nį ɓa. Ya ɓə a gɛ, liikpələ da hvaŋąlɔi Yálá lawoo a dɛɛ gu pɔ ɉaalai, gu kilitɔɔmąąlaa hɔlɔɓo. 5Gɛ́ Yálái niikpəlɛɛ, niilaa ə nɛ̨ɛ̨laa lɔ ka lɔwai, yɛ bələi Jesus Kristə kaa la bɔ. 6Ya ɓə a gɛ, ka wɔ kiliŋąhiɛ ə kɛ tanɔ̨n, woolaamąą hu, káá Yálá mąąwiɛ la, yai a gu Ną́mu Jesus Kristə Ną́n.

Ká ká yee hee ka kee mu

7Ka ka yee hee ka kee mu yɛ pələi Kristə ə ɲee hee la gu mu Yálá mąąwiɛ mɛ̨nį ɓa. 8Gáá moi kaa, Yálá ŋą kulɔ nwoo ɓa laa laa hu ɓə Kristə ə kɛ a Ɉuifəɠaa di wɔ tímun, ə gɛ, mɛ̨nįɠaai Yálá ə naakwɛlanmo di kalaɓɔlɔni diɛ bɔ mɛ̨nį ə kɛ. 9Yii ɓaa huwu takpɛliɠaa, da Yálá laa tɛ ŋą nu ɲɛ̨imąąwɛlikaa pələ mąą mɛ̨nį ɓa; yɛ bələi bɛ̨ɛ̨i la diɛ kɛ mą: Gáá pai ə́ laa tɛ huwu takpɛliɠa lɔwai, gɛ́ ə́ laa mąąwiaa mąą wələ too. 10Yɛ bələi nwɔ̨nɔ̨ bɛ̨ɛ̨i la, diɛ kɛ mą:

«Lɔi kəlee, 'ká kwəinɛ̨ɛ̨ kulɔ ká Yálá ŋą nu huwui ni.»

11Yɛ nwɔ̨nɔ̨ diɛ:

«Lɔi kəlee, 'ká gu Nąmu laa tɛ,

ɛlɛɛ, huwu kəlee ə ɲéélɔwa mą.»

12Esai yaa kpɛli yɛ mą:

«Ɉɛse lon gaa pai,

gaa pai tɔɔlaa kɛi hįi kəlee nwun na;

ɛlɛɛ, hįi kəlee yɛ gilitɔimą.»

13Gɛ́, Ɲálái gu kilitɔɔi mą, ə ká pilɛ a kwəinɛ̨ɛ̨ da liilaa laa na laa hu, ə gɛ, Nįį-Mąąhəɠɛɛ nwɔ hvaŋą ə ká pilɛ kilitɔɔmąąlaa hu.

Polə kɛ tíi

14Yii hvilɛn na ka mąą mɛ̨nį ɓa, ną́n nonnii, ɲą́ą́ kpinįi náái kpɔ na, gɛ́, ká laahvɛɛi a mɛ̨nį lɛlɛɛ kɛ mɛ̨nį, ká pilaa a mɛ̨nį kɔlɔnŋąą; ɛlɛɛ, káá pɛli ka keeni kilaa ponoi. 15Kɛlaa yaamun, ɉɛɓɛ́i ŋą́ dɛɛ kaa, ŋį́ mɛ̨nį taɠaa pɛ̨ɛ̨ ɉu, ə gɛ, yii mąąnɛ̨ɛ̨ ka mąą kwɛli, ka kɛ a gɔlɔn ŋąą. Ŋą́ gɛ́ tii, mɛ̨inɛ̨ɛ̨i Yálá ə gɛ mą́ą́ mąą mɛ̨nį ɓa. 16Ə gɛ ŋį́ kɛ a Jesus Kristə ŋą tímun, huwu takpɛliɠaa mąą mɛ̨nį ɓa. Daa ɉə́ɠə ɉu, Yálá nwɔ wɛlɛɛ lɛlɛɛi laa həli mɛ̨nį ɓa, ə gɛ, huwu takpɛliɠaa diɛ pɛli kɛi a haláá hɛn Nįį-Mąąhəɠɛɛ aa mąą həɠə, yɛ nɛ̨ɛ̨ Yálá ɓa. 17Ŋą́ pɛli gbɔ́wɔ́ ɲąą kɛnɛ̨ Yálá kólói mąą mɛ̨nį ɓa Jesus Kristə hu. 18Yili ɓa, vá pɛli mɛ̨nį takpɛli ɓoi, ə kulɔ lɔ, yii Kristə ə gɛ ɲéé, gɛ́ huwu takpɛliɠaa hvilɛn nwɔ pələi mɛ̨i, a nwóó da gɛ́-mɛ̨nį, 19a kpalo mɛ̨nį da kwɛlɛɛn mɛ̨nį nwɔ huwalawalalaa, a Nįį-Mąąhəɠɛɛ hvaŋą. Yili ɓa, ə həɠə kpɔ Ɉerusalɛmə, ə tɛɛ Iliri pələ, ŋą́ Kristə nwɔ wɛlɛɛ lɛlɛɛ laa həli kpɔ nąą kəlee. 20Kɛlaa nwɛ́i, ɓɛi di hvo ni kɛ Kristə mąą wɛlɛɛ lɛlɛɛ laa həli li laa, nąą ɓə ŋą́ ɉukulɔ laa. Ə gɛ, və́ pa kɛ nwɛ́i kɔwɔ hvilɛn nu takpɛli nwɔɔ mɛ̨i. 21Ɛlɛɛ, bələi Yálá lawoo hɛɓɛ́ kaa moi la, bələ ɓə gáá gɛi la, yɛ mą:

«Yiiɠaai di hvo kɛ Kristə mąą mɛ̨nį laa həli li diɛ, daa gaa.

Nuąi di hvo kɛ mąą mɛ̨nį mɛ̨n ni, da gbaɠala kaa.»

Polə kaa ni mɛ̨nį ɓoi Romə

22Mɛ̨nįɠaa aa gɛ və́ pai la ka pɔɔli yaa li. 23Yiihu kɛa, yɛ bələi ŋą́ą́ kpɛɛ la a nwɔ́ hiɛɠaai ti kulaa nɔiɠaa hu, aa kɛ kpɔ a kwɛlan damąą ŋį́ kɛ kpɔ bɔ ŋį́ pa ŋį́ ɲɛ̨́i tɔɔ kaa. 24Ŋą́ kɛli pa lii Ɛspaɲə lɔi hu, gáá pai həli ka pɔɔli. Ŋą́ kɛi tɛɛ gɛ́ li, gáá bɔ ŋą pa ŋį́ ɲɛ̨́i tɔɔ kaa, ə lɛɛ ŋį́ ka wɔ kpɔnmąą hɛn ɉɔlɔɓo gɛ́ li la nɔi ti hu, akɛ gwa kaa ni gwa lɔwai tawolo kɛ gu kee ɓa. 25Kɛlaa, yiihui ŋɛ̨i, gáá lii Ɉerusalɛmə Yálá nwɔ nuąi mąą mɛ̨nį ɓa. 26Mąąhɔlɔɓo, Masedoanə nuą da Akaiə nuą daa di kiliŋąhiɛ ə gɛ di mɛ̨inɛ̨ɛ̨ kɛ Yálá nwɔ nuą Ɉerusalɛmə diɛ, mąąhɔlɔɓo di yee ɲą aa kpɛɛ. 27Diɛ kpinįi kpɔ ɓə di kiliŋąhiɛ ti, a tɛ̨ą, ɛlɛɛ, hvo kɛli kɛ di gɛ tii, gbala ə tɔɔ, yii, huwu takpɛliɠaa di Ɉuifəɠaa di wɔɔ Yálá lon naa ta hɔlɔɓo, mąąnɛ̨ɛ̨ yiliɠaa diɛn di di wɔɔ hɔlɔɓo di kanąn mɛ̨nį hu. 28Ɓɛlɔwai kwá hɛnŋąą ti kulɔ la, ŋą́ li ŋą́ naa həli diɛ. Ŋą́ kɛli kɛa li Ɛspaɲə, ŋą́ tɛɛ ká pɔɔli pələ. 29Gíli kaa ɉu gɛ́, ŋą́ kɛli pa ka pɔɔli, Kristə nwɔ lúwɔ́ a lɛɛ ɲə́i kɛnɛ̨, ŋą́ paa la.

30Nąn nonnii, yii gáá vɛlii kaa gu Ną́mu Jesus Kristə laa hu, da Nįį-Mąąhəɠɛɛ nwɔ wɛlikɛmąąlaa hu, ya ɓa: 'Ká kpɔnmąą tɛɛ bɔ́ gɔi ŋɛ̨i hu, a Yálá hvɛlii ká mo mą́ą́ mɛ̨nį ɓa. 31Ka Yálá hvɛli mą́ą́, ə gɛ gili walawala nuąi di kaa Ɉude, ŋą́ kulɔ di yəi; əgɛ, ɉamą tiɛ̨i ŋɛ̨i gáá lii naa lɛi Ɉerusalɛmə Yálá nwɔ nuą pɔ, di di yee hee mu a kwəinɛ̨ɛ̨. 32Yili a kɛ tii, ŋą́ pa ká pɔɔli a kwəinɛ̨ɛ̨ hu, ɛlɛɛ, Yálá a hvaa mą, ŋį́ vį́i ta wolo tɔɔ ka pɔɔli. 33Gɛ́ liilaa Yálá ə kɛ ka kəlee ka pɔ; kɛi a mo tii Yálá ə kə! Mįiną!

Currently Selected:

Romə 15: BKPG

Highlight

Compare

Copy