Romə 13

Ká lɛɛ nwun nąmįną woo pulu

1Mąąnɛ̨ɛ̨ nu kəlee di lɛɛ nwun nąmįną woo mu, mąąhɔlɔɓo, nwun nąmu ta hvo hee li Yálá tɛɠii. Nwun nąmįnąi di kaa yɛnɛ̨ɛ̨, Yálá ɓə gəlee hee. 2Yili ɓa, nui a gwɛli tee nwun nąmu ɓa, a kɛ ti aa gwɛli tee Yálá nwɔ tiɓo ɓa. Nui a gwɛli tee, a kɛ ti gaa gbɔwɔ kwɛli a kiti. 3Nui a mɛ̨nį lɛlɛɛ kɛ, hva ɲɔw kiti tee mun ma; mɛ̨nį ɲɔ̨n gɛ mun mə a ɲɔw kiti tee mun ma. Hvó bɔ hvó ɲɔw kiti tee mun ma? 'Mɛ̨nį lɛlɛɛ kɛ, ya nwɔ mąątɛ̨nɛ̨ hɔlɔɓo. 4Mąąhɔlɔɓo, gaa tíi Yálá ɓa, əgɛ, ə́ ə́ ɲąątɔɔ a mɛ̨nį lɛlɛɛ kɛɛ ɓa. Kɛlaa, akɛ yá mɛ̨nį ɲɔ̨n gɛi, 'ɲɔw kani kiti tee mun ma. Mąąhɔlɔɓo, hvaŋąi gaa ɲəi yɛ mɛ̨nį kɛ la, hvo ɲəi kpɛli, gaa Yálá ŋą kóló ɓa, yɛ Yálá nwąną kulɔ la, mɛ̨nį ɲɔn gɛmun ma. 5Yili ɓə gaa mą, mąąnɛ̨ɛ̨ gu lɛɛ nwun nąmįną woo mu, ə gɛ, gu həɠə Yálá nwɔ liiɲąnwąną tɔwɔ. Ɛlɛɛ, ə gɛ, mɛ̨nį ɲɔ̨n ə kulɔ guɔ kiliŋąhiɛ hu. Mąąhɔlɔɓo, guɔ kiliŋąhiɛ a nɛ guɔ yɛ gu lɛɛ nwoo mu laa kɛ.

6Mɛ̨nįi a gɛ nwɔ̨nɔ̨ guɔ nįihɔ̨nwɔ̨ kulɔ la, yaa li. Mąąhɔlɔɓo, nįihɔ̨nwɔ̨ hon nuąi ti, Yálá ɓə di tɔɔ la. 7'Ká nu kəlee nwɔ tɛɛ bɔ. 'Ká nįihɔ̨nwɔ̨ tɛɛ nįihɔ̨nwɔ̨ hon nuą pɔ, ka hɛn gɔw tee nąmu pɔ, nuąi nwumɛ̨ mąą kaa diɛ, 'ká nwumɛ̨ mąą tɛɛ di pɔ, nui mąąwiɛlaa, ka mąąwiɛ.

Ə ɓɛlan nu wɛli la kɛ

8Nu ta nwɔ kwələ hvo kɛ kaa, hvo kɛli lɔ nwɛlikɛmąą kwələi ka lɔwai. Mąąhɔlɔɓo, yá ə́ ɓɛlan gaalon nwɛlilakɛ, akɛ, yáá dɔ́n woo pɔ mɛ̨nį kpɛ kpɔ tɛ̨ɛ̨tɛ̨ɛ̨?. 9Hvó gaai, dɔ́n nwooɠaa ti ɓaa: 'Hvó wɛli kɛ, 'hvó nu paa, 'hvó nwuɔ̨ kɛ, 'hvó ɲɛ̨ikulɔbɔ kɛ, ə pɛlɛ la yiiɠaa ti diɛ, gəlee laa honŋąą kaa nwoo ŋɛ̨i hu: 'Ə́i ɓɛlan gaalon nwɛli la kɛ yɛ ə́ kpinį. 10Wɛlikɛmąąlaa hva mɛ̨nį ɲɔ̨n gɛ a nu. Wɛlikɛmąąlaa ɓə a dɔ́n nwoo laa hvɛɛ.

Kristə kaa pənəi ə pa ə́ kpɔwɔ pɛli

11'Ka ka keeni wɛli la kɛ, mąąhɔlɔɓo, nɔwai ŋɛ̨i gu kaa ɉu ka gɔlɔn. Ká ɲįnąąɓoi lɔwai ka. Hvó gaai, nwun mąąɓo mąą aa kpuɔ guɔ yiihu, ə tɛɛ la ɲələi gu laa la Kristə la, ɲələ ɓa. 12Kwiihɛ̨ą aa tɛɛ, yələ ɓɔi lɔwai aa lɛɠɛ. 'Ká gu lənə kpinį hu mɛ̨nįɠaa diɛ, ká guɔ kɛɛpono nwɔ kúláá hɛnŋaa kɛ guɔ. 13Ká gu kaa kɛɛpono hu, 'ká gu túwɔ́ a tələnmolaa. Gu hvo ɓowo pələ kɛ, gu hvo too lɔɔ kpələ kpun ɉu, gu hvo gu laai lɛɛ, gu hvo kɛ lɔ a wɛli hon nuą. Ɛlɛɛ, gu hvo hvaa kɛ, gu hvo tolo kulɔ. 14Kɛlaa, ka gu, gu Ną́mu Jesus Kristə kɛ a gu kwąną həɠə, 'ká hvo ká kpɔwɔ lɛɛ kɔlɔ yeekɔnma, ɲɛ̨ikulɔ bɔ laa yɛ hee la ká mɛ̨i.

Currently Selected:

Romə 13: BKPG

Highlight

Compare

Copy