Romə 12
12
Kwɛli hvilɛn bələ: yɛnɛ̨ɛ̨ nįnɛ̨
1Ną́n nonnii, gáá ká hvaŋąlɔi Yálá nwɔ ɲɛ̨imąąwɛli kaa laa hu, gɛ́; 'Ká ká kpɔwɔ kulɔ a haláá vulú mąą, mąąhəɠɛɛ, nwɛli ə ɓo Yálá ɓa. Yili ɓə gaa a kwɛli hvilɛn ŋąąi viɛlaɓoɔ. 2'Ká hvo ká kpɔɔ kɔ́ɔn háákələi yɛnɛ̨ɛ̨i ɓa, kɛlaa, ká nɛɛ laa, ka wɔɔ mɛ̨nį kɔlɔn gili ə ká pu ká nįnɛ̨ kɔlɔi, yili ɓə gaa a Yálá liiɓa, nɛlɛɛ, ɲąąnɛ̨ɛ̨, bɛliɛ ɉu.
3Mɛ̨inɛ̨ɛ̨i Yálá aa gɛ mą́ą́ ɉaalai ɓə gɛi, gɛ́ kɛ káá: 'Ká hvo ka kpɔwɔ hviala ɓo, kiliŋąhiɛ lɛlɛɛ ə kɛ kaa. Laa na laai Yálá aa dɛɛ ka pɔ, nu kəlee ə gbɔwɔ kaa yili hu. 4Nu tɔɔ-tɔɔi tamąąi mą, kɛlaa gəlee kɛ kólo yɛ ɓo a dee tee. 5Bələ lɔ ɓə gu kəlee gu yiliɛ la Kristə ɓa kɔ́lɔ tɔ̨nɔ̨ hu, nu tɔɔi ə ɓo mą. 6Nu kəlee kɛ kóló kulaai gee mu, yɛ bələi gu mɛ̨inɛ̨ɛ̨ hɔlɔɓo la Yálá yəi. Akɛ Yálá mɛ̨nį noloɓoɔ ɓə ə́ kaa moi, 'gɛ yɛ bələ laa na la kaa la. 7Akɛ ə́ wɛi ɓaa yɛ tínuą diɛ, 'yili kɛ. Nui nwɛi a kɛ a nuą mąąkwɛliɛ, ə gɛ. 8Nui nwɛi ɓaa a nuą hvaŋąlɔ, ə ŋąą wala yili ɓa. Nui nwɛi ɓaa mɛ̨inɛ̨ɛ̨ kɛɛ, ə gɛ, kiliŋąhiɛ takpɛli hvo kɛ mą. Nui nwɛi ɓaa nuą tɛnɛn dɔɔ, ə ɲąąwala mą. Nui nwɔ̨nɔ̨ nwɛi ɓaa kpɔnmąą tɛɛi nuą pɔ, ə yili kɛ a gwəinɛ̨ɛ̨.
9Ka wɛlikɛmąąlaa kɛ a tɛ̨ą, ka ɲɔw mɛ̨nį ma, ká pu dɔwɔ; 'ká mɛ̨nį lɛlɛɛ wɛlilakɛ. 10Gɛ́, lee-lon nwɛlikɛmąąlaa ə ka yili ka kee ɓa, ká wɛlikpɛɛmąąlaa kpɛ ká lɔwai. 11'Ká hvo hviɲɛ kulɔ, ka kólo kɛ a hvaŋą lɔ laa, ka tí gu Nąmu ɓa ka kwəi tɔ̨nɔ̨ mɛ̨i. 12Kwɛinɛ̨ɛ̨ ə kɛ ka yəi kilitɔɔmąąlaa hu, mɛ̨nį ɲąąnwąnąą a həli kaa, ka ka liikpələ. 'Ká tɔɔ kpaan Yálá hvɛliɛ hu. 13Ká kaayɔwɔɠaai kanąn gaa diɛ, ka di mąą kpɔnmąą ɓo; ka ka yee hee nwɛ̨ą mu a kwəinɛ̨ɛ̨.
14Nuąi da mɔ̨nɔ̨ɓo, 'ká, lúwɔ́ too diɛ. Ká hvo nu ta nɛ̨ŋɛ̨n naa, ka lúwɔ́ too nu kəlee ɓa. 15Nuąi da kɛ kwəinɛ̨ɛ̨ hu, ka diɛni ka gwəinɛ̨ɛ̨ tii kulɔ, nuąi da kɛi wɔlɔ, ka diɛ ni ka wɔlɔ. 16Ka nɛ̨ɛ̨ a ka kee, nu ta hvo gbɔwɔ ŋąąkɛnɛ̨. Mɛ̨nįi kpɔwɔ mąąyɛɛlaa kaa ɉu, nwɛli ə too kaa; ká hvo ká kpɔwɔ kaa a kilimąą nuą.
17Ká hvo mɛ̨nį ɲɔ̨n gwələ kulɔ a mɛ̨nį ɲɔ̨n. Ka mɛ̨nį lɛlɛɛ mąą kiliŋąhiɛ kɛ nu kəlee ɓa. 18Akɛ pɛli mąą a kɛ ɉu, ká hvaa mą ɓə-o, liilaa ə kɛ ka nu kəlee ka lɔwai. 19Nwɛ́likɛmąą nuą, ká hvo ka nwąną kulɔ kaa kpinįi. Kɛlaa, ka Yálá lɛɛ laa ə ka nwąną kulɔ. Mąąhɔlɔɓo, Yálá yɛ diɛ: «Ɲą́ą́ ɓə ŋą́ nuą nwąną kulɔ gɛ́ mɛ̨nį kwələ kulɔ.» 20Yɛ nwɔ̨nɔ̨ diɛ:
«Pulu a kɛ ə́ yowo ɓa, gɔ́ a kɔ̨nɔ̨n, kpələ wɛli a kɛ mą, yá tɛɛ bɔ.
Mąąhɔlɔɓo, yá kɛli gɛ ti, ə́ kɛɛ nwɔ̨n dəŋą pui ə́ yowo nwuɔ̨ li.»
21'Hvó nɛɛ laa mɛ̨nį ɲɔ̨n ɲee hvo tɛɛ yɛ́, kɛlaa, ə́ yee ə tɛɛ mɛ̨nį ɲɔ̨n ma a mɛ̨nį lɛlɛɛ kɛɛ.
Currently Selected:
Romə 12: BKPG
Highlight
Share
Compare
Copy
Want to have your highlights saved across all your devices? Sign up or sign in
